“Ẹvẹ Me re Bo Ubo Obọufihọ . . . Krite?”

“Oware nọ mẹ gwọlọ kpobi họ, epanọ edada na i re ro kuhọ!” ere aye jọ nọ a re se Jayne ọ ta avọ oviẹ. O wo ẹyao-ọta, yọ ẹyao na ọ jẹ ruọ eria efa oma na. O jọ ahwo uviuwou gbe egbẹnyusu riẹ oma inọ dodokọ a rẹ sai si ẹyao na noi oma je ku edada riẹ họ. A jẹ lẹ se Ọghẹnẹ inọ o fi obọ họ kẹe. Kọ ọ te gaviezọ olẹ rai? Kọ ọ daezọ oviẹ rai?

ỌGHẸNẸ ọ be ruẹ uyero ahwo-akpọ. Ẹme riẹ, Ebaibol na e ta nọ: “Enama na soso i bi dimẹ eva [ọyawọ] usuovo na rifi enẹna.” (Ahwo Rom 8:22) Ọghẹnẹ ọ riẹ inọ ima ahwo gbidi gbidi, wọhọ Jayne, a be ruẹ uye edada ugboma hayo iroro kẹdẹ kẹdẹ. Ọghẹnẹ ọ be ruẹ ahwo ima 800 nọ i bi kiẹzẹ eveva kẹdẹ kẹdẹ, ima buobu efa nọ ahwo uviuwou rai a bi gboja kẹ, gbe eyewọ buobu nọ e be ruawa kpahe ewoma gbe obaro-akpọ emọ rai. Kọ who roro kpahe iẹe no ẹdẹjọ sọ Ọghẹnẹ o ti ru oware jọ kpahe ebẹbẹ nana? Dai roro iei, nọ o rọnọ oma o rẹ wọ omai fi obọ họ kẹ iyoyou mai, kọ who gbe roro nọ o rrọ isiuru Ọghẹnẹ re o fi obọ họ kẹ ahwo-akpọ nọ ọ ma?

Otẹrọnọ whọ nọ enọ yena no ẹdẹjọ, riẹ nọ whẹ ọvo o wo iroro yena ha. Oware wọhọ ikpe idu ivẹ gbe egba ezeza (2,600) nọ i kpemu, Habakuk, ọzae nọ ọ vọ avọ ẹrọwọ na o wo oghẹrẹ iroro yena, ọ nọ Ọghẹnẹ inọ: “O ỌNOWO, ẹvẹ me re bo ubo obọufihọ se owhẹ krite, nọ owhẹ ore yo ho? Hayo bo se owhẹ nọ ‘Oja yo,’ no who re siwẹ hẹ? Fikieme who je bi ru omẹ ruẹ eware ethọthọ jẹ ruẹ ukpokpoma? Araha avọ ofu ọgaga e rọ aro mẹ; ohọre avọ ẹhẹriẹ e tẹ via.” (Habakuk 1:2, 3) Habakuk, ọruẹaro nọ ọ jọ ohwo Ju na, ọ rọ ẹro ruẹ evegaga gbe ogbimaza evaọ oke riẹ. Nẹnẹ, ogbimaza otiọye na o zihe ruọ oware ikẹdẹ kẹdẹ no, nọ o be wha edada se enọ i wo udu ohrọ.

Kọ Ọghẹnẹ o gbolo aro kẹ ubo Habakuk na? Ijo. Ọ gaviezọ kẹ enọ Habakuk na, ọ tẹ jẹ kẹe uduotahawọ gbe omosasọ. Jihova Ọghẹnẹ ọ bọ ẹrọwọ Habakuk ga ẹkwoma eyaa nọ Ọ yaa inọ o ti ku uye-oruẹ họ. Ẹruore nọ Ọghẹnẹ ọ kẹ evaọ Ẹme riẹ o rẹ sae jọ omosasọ kẹ owhẹ re, wọhọ epanọ o via kẹ Jayne avọ uviuwou riẹ. Izoẹme nọ e rrọ aro na e te kẹ uyo enọ nana: Ẹvẹ o sai ro mu omai ẹro inọ Ọghẹnẹ ọ be ginẹ daezọ mai? Ẹvẹ Ọghẹnẹ o ti ro ku uye-oruẹ họ, kọ oke vẹ o ti ro ru ei?