Ọghẹnẹ Ọ Be Ginẹ Daezọ Mai—Epanọ ma rọ riẹ

ONỌ jọ nọ u wuzou gaga nọ ahwo a be nọ anwọ ikpe buobu ze na họ: Otẹrọnọ Ọghẹnẹ o you omai, fikieme uye-oruẹ u je bu akpọ te enẹ? U muẹro inọ who te wo uyoyou kẹ ohwo, whọ te gwọlọ nọ ọ ruẹ uye he, yọ otẹrọnọ ọ rrọ ẹbẹbẹ jọ, whọ te daoma fi obọ họ kẹe. Fiki oyena, ibuobu ahwo a re roro inọ uye-oruẹ nọ o vọ akpọ na u dhesẹ inọ o wọhọ nọ Ọghẹnẹ ọ be daezọ mai hi. Fikiere, joma kaki roro kpahe eware nọ e kẹ imuẹro inọ Ọghẹnẹ o you omai, gbe inọ ọ be ginẹ daezọ mai.

Emama I Dhesẹ Uyoyou Ọghẹnẹ Via

Jihova Ọghẹnẹ họ Ọnọ “ọ ma odhiwu gbe akpọ gbe abade, gbe [eware nọ] e rọ eva rai kpobi.” (Iruẹru Ikọ Na 4:24) Nọ ma bi roro kpahe eware nọ Jihova ọ ma na, u ti mu omai ẹro inọ o you omai. Wọhọ oriruo, roro kpahe eware nọ e rẹ kẹ owhẹ evawere gbe oghọghọ. Kọ emamọ emu ọ rẹ were owhẹ? Jihova ọ hae sae kẹ omai oghẹrẹ emu ọvo. Rekọ o ru ere he, ọ kẹ omai oghoghẹrẹ emu nọ ma rẹ reawere rai. Epọvo na re, Jihova ọ rọ oghoghẹrẹ ire, idodo, gbe okegbe nọ o re siuru whẹ erru họ otọakpọ na re ma ruẹse reawere uzuazọ.

Ofariẹ, roro kpahe oghẹrẹ nọ Ọghẹnẹ ọ ma ugboma mai na. Ma rẹ sae hwẹ nọ ma tẹ ruẹ oware nọ u fou ehwẹ, oma o rẹ were omai nọ ma tẹ ruẹ oware nọ u wo erru, ma rẹ sae reawere ole, orọnikọ eware nana i re ru omai jọ uzuazọ họ, rekọ Ọghẹnẹ o ru onana re ma sae reawere uzuazọ. Je roro kpahe usu ra kugbe amọfa. Ono usu emamọ ogbẹnyusu o rẹ were he, hayo nọ oma o rẹ were he nọ ohwo nọ o you ọ tẹ gbalọ iẹe? Makọ uyoyou nọ ma re wo kẹ ohwohwo  na dede yọ okẹ nọ u no obọ Ọghẹnẹ oyoyou na ze! Nọ orọnọ Ọghẹnẹ ọ ma ahwo-akpọ avọ isiuru nọ a re ro you ohwohwo na, u muẹro inọ Ọghẹnẹ o gine wo uyoyou.

Ebaibol E Kẹ Omai Imuẹro Uyoyou Ọghẹnẹ

Ebaibol e vuẹ omai inọ Ọghẹnẹ họ uyoyou. (1 Jọn 4:8) Orọnikọ eware nọ Ọghẹnẹ ọ ma ọvo ma rẹ jọ ruẹ uyoyou riẹ hẹ, rekọ uyoyou riẹ u dhesẹ oma via re evaọ Ẹme riẹ, Ebaibol na. Wọhọ oriruo, Ebaibol na e kẹ ekpọvio nọ i re fi obọ họ kẹ omai wo omokpokpọ, e tuduhọ uruemu owowa evaọ oware kpobi, jẹ vẹvẹ omai unu kpahe idieda thomawa gbe emu nọ a rẹ re vrẹta.—1 Ahwo Kọrint 6:9, 10.

Ebaibol e tẹ jẹ kẹ omai ohrẹ kpahe epanọ ma re yeri kugbe amọfa, ta udu họ omai awọ nọ ma you amọfa jẹ rehọ ẹwo gbe adhẹẹ ro lele ai yeri je bru ọghọ họ ae oma. (Matiu 7:12) Ebaibol na i mukpahe iruemu nọ i re su ohwo ruọ uye—iguẹgu, uvo-uthei, ihri-eriọ, ẹnwae-obro, gbe ohwo-okpe. O hae jọnọ ohwo kpobi ọ rẹ daoma fi ehrẹ Ikereakere na họ iruo, u muẹro inọ uye nọ o rrọ akpọ na o hai te enẹ hẹ.

Rekọ edhere nọ ọ mae rro nọ Ọghẹnẹ o ro dhesẹ uyoyou riẹ no họ, Ọmọ riẹ, Jesu, nọ o siobọno re ọ ta ahwo-akpọ no igbo. Jọn 3:16 o ta nọ: “Ọghẹnẹ o you akpọ na hrọ, ọ jẹ rehọ Ọmọvo riẹ kẹ, re kohwo kohwo nọ ọ rọwo riẹ o gbe vrẹ hẹ rekọ o re wo uzuazọ ebẹdẹ bẹdẹ.” Fikiere, Jihova o ru ọruẹrẹfihotọ no re o si uwhu gbe oghoghẹrẹ uye-oruẹ kpobi no bẹdẹ bẹdẹ.—1 Jọn 3:8.

Ẹhẹ, imuẹro e vọ riẹ nọ i dhesẹ inọ Jihova o you omai. Fikiere, u muẹro inọ o rẹ were Ọghẹnẹ hẹ nọ ma tẹ be ruẹ uye. O ti ku uye-oruẹ họ. Ebaibol na e vuẹ omai vevẹ oghẹrẹ nọ Ọghẹnẹ o ti ro si uye-oruẹ notọ.

[Uwoho nọ o rrọ ẹwẹ-obe avọ 4]

Uyoyou yọ okẹ nọ u no obọ Ọghẹnẹ oyoyou na ze