Si Kẹle Ọghẹnẹ

Eme Jihova Ọ Jọ Obọ Mai Gwọlọ?

Iziewariẹ 10:12, 13

IRORO-EJẸ onọ ohwo o re ru—sọ o re yoẹme hayo ghẹmeeyo, o rẹ lọhọ ẹsikpobi hi. Ohwo nọ o wuzou ahwo o te bi siaro, ẹgo ahwo nọ a rrọ otọ riẹ a re ro yoẹme kẹe. Wo ohẹriẹ, unevaze ahwo nọ a be gọ Jihova Ọghẹnẹ a bi ro yoẹme kẹe. Fikieme? Re ma sae kẹ uyo na, joma kiẹ eme Mosis nọ e rrọ Iziewariẹ 10:12, 13 na riwi. *

Nọ Mosis ọ jẹ gba eware nọ Ọghẹnẹ ọ gwọlọ mi idibo riẹ ekru, ọ nọ onọ isiuru nana: “Eme ỌNOWO na Ọghẹnẹ rai ọ jọ obọ rai gwọlọ?” (Owọ avọ 12) Ọghẹnẹ o wo udu nọ ọ rẹ rọ yare oware kpobi nọ o were riẹ mi omai. O rrọ ere keme ọye họ Olori Osu, Ọnọ ọ kẹ omai uzuazọ gbe Osiwi mai. (Olezi 36:9; Aizaya 33:22) Fikiere, Jihova o te ọnọ ma re yoẹme kẹ. Ghele na, ọ gwọlọ nọ ma rọ ọgbahọ yoẹme kẹe he. Eme ọ jọ obọ mai gwọlọ? Ọ gwọlọ nọ ma yoẹme “no eva” ze.—Ahwo Rom 6:17.

Kọ eme o rẹ sae wọ omai rọ unevaze yoẹme kẹ Ọghẹnẹ? Mosis ọ fodẹ oware ovo jọ: “Ozọ ỌNOWO Ọghẹnẹ.” * (Owọ avọ 12) Ozọ nana orọnikọ iguegue orọ uye nọ u re no aghẹmeeyo ze he, rekọ adhẹẹ rọkẹ Ọghẹnẹ gbe izi riẹ. Ma te wo uvi ozodhẹ Ọghẹnẹ utiona, ma te whaha oware nọ o rẹ dhae eva.

Eme họ ugogo oware nọ u fo nọ o rẹ wọ omai yoẹme kẹ Ọghẹnẹ? Mosis ọ ta nọ: “Yo [Jihova] . . . rehọ eva rai kpobi ga ỌNOWO na Ọghẹnẹ rai, gbe ẹzi rai kpobi.” (Owọ avọ 12) Uyoyou nọ a re wo kẹ Ọghẹnẹ u vi ọwhewhe nọ a re wo kẹe. Obe jọ o ta nọ: “Ẹsejọ, eme Hibru nọ a re ro dhesẹ ọwhewhe hayo oware nọ u te ohwo udu o rẹ sai je dhesẹ owojẹ nọ u re lele iei.” Obe nana o ta re inọ re a you Ọghẹnẹ u dhesẹ nọ ohwo ọ rẹ “rọ uyoyou jowọ” evaọ usu riẹ kugbe Ọghẹnẹ. Koyehọ, otẹrọnọ ma gine you Ọghẹnẹ, ma te jowọ hayo ru eware nọ ma riẹ nọ e rẹ were iẹe.—Itẹ 27:11.

Ẹvẹ ẹmeoyo mai kẹ Ọghẹnẹ o re diwi te? Mosis ọ ta nọ: “Wha . . . nya eva idhere riẹ.” (Owọ avọ 12) Jihova ọ gwọlọ nọ ma ru oware kpobi nọ ọ ta kẹ omai. Kọ ẹmeoyo otiọye o rẹ sae jọ ọzadhe kẹ ewoma mai? Vievie.

Unevaze nọ ma re ro yoẹme o rẹ wha eghale se omai. Mosis o kere nọ: “Koko izi . . . no me je kẹ owhai nẹnẹ na fiki ewoma rai.” (Owọ avọ 13) Ẹhẹ, uzi Jihova kpobi—oware kpobi nọ ọ ta kẹ omai—o rrọ kẹ ewoma mai. Ẹvẹ o gbẹ jọ ere he? Ebaibol e ta nọ “Ọghẹnẹ họ uyoyou.” (1 Jọn 4:8) Fikiere, izi nọ e rrọ kẹ ewoma ibẹdẹ bẹdẹ mai ọvo ọ kẹ omai. (Aizaya 48:17) Eruo oware kpobi nọ Jihova ọ ta kẹ omai, o te thọ omai no idhọvẹ buobu enẹna je su kpohọ eghale nọ i wo oba ha evaọ otọ esuo Uvie riẹ. *

Evaọ oware nọ Jihova ọ gwọlọ mi omai, iroro-ejẹ sọ ma re yoẹme hayo ghẹmeeyo—o rrọ oware nọ ma re dhizu fihọ tao ho. Unevaze nọ ma re ro yoẹme kẹe evaọ oware kpobi họ oware areghẹ nọ u fo eruo. Ẹmeoyo otiọye o re si omai kẹle Jihova, Ọghẹnẹ oyoyou nọ o wo ewoma mai họ eva ẹsikpobi na.

[Oruvẹ-obotọ]