Si Kẹle Ọghẹnẹ

Jihova Ọ Kẹ Omai Uvẹ nọ Ma rẹ rọ Salọ Onọ Ma re Ru

Iziewariẹ 30:11-20

“ẸSIBUOBU iroro ethọthọ e jẹ hae ziọ omẹ udu inọ ẹsejọhọ me ti kie no egagọ Jihova.” Enẹ aye jọ nọ ọ rrọ Oleleikristi ọ ta kpahe omariẹ fiki eware iyoma nọ e via kẹe okenọ ọ jọ ọmaha. Kọ ere o gine rrọ? Kọ ginọ uzẹme inọ eware iyoma nọ e via kẹ omai hayo oghẹrẹ uzuazọ nọ ma yeri notọ ze u re ru nọ ma gbẹ sae gọ Ọghẹnẹ dẹdẹ hẹ? Ijo. Jihova Ọghẹnẹ ọ kẹ omai ufuoma iroro-ejẹ, yọ ma rẹ sae salọ oghẹrẹ uzuazọ nọ ma gwọlọ yeri. Jihova ọ gwọlọ nọ ma salọ edhere uzuazọ nọ u kiehọ, yọ Ẹme riẹ, Ebaibol na ọ vuẹ omai epanọ ma sai ro ru ere. Roro kpahe eme Mosis nọ a kere fihọ Iziewariẹ uzou avọ 30.

Kọ o rrọ bẹbẹ re ma riẹ je ru oware nọ Ọghẹnẹ ọ gwọlọ mi omai? * Mosis ọ ta nọ: “Uzi onana nọ me je kẹ owhai nẹnẹ na o rẹ gaga kẹ owhai hi, hayo u theri abọ họ.” (Owọ avọ 11) Jihova ọ rẹ yare oware nọ ma rẹ sai ru hu mi omai hi. Eware nọ ọ gwọlọ mi omai e ga hrọ họ, ma rẹ sai ru ai. Yọ e rẹ bẹ ẹriẹ hẹ. U du gwọlọ nọ ma re kpohọ “obọ ehru” hayo “abọ obei abade” re ma tẹ riẹ oware nọ Ọghẹnẹ ọ gwọlọ mi omai hi. (Owọ avọ 12, 13) Ebaibol na e vuẹ omai vevẹ oghẹrẹ nọ u fo nọ ma re yeri uzuazọ.—Maeka 6:8.

Dede na, Jihova ọ rẹ gba omai họ yoẹme kẹe he. Mosis ọ ta nọ: “Me fi enana họ kẹ owhai, uzuazọ gbe ewoma, uwhu gbe eyoma.” (Owọ avọ 15) Ma wo ufuoma nọ ma rẹ rọ salọ uzuazọ hayo uwhu, ewoma hayo eyoma. Ma sae salọ nọ ma gwọlọ yoẹme kẹ Ọghẹnẹ avọ eghale nọ i re lele iei, hayo ghẹmeeyo avọ uye nọ u re noi ze. Onọ ma gwọlọ kpobi, obọ mai o rrọ.—Owọ avọ 16-18; Ahwo Galesha 6:7, 8.

Kọ onọ ma salọ kpobi u muẹme kẹ Jihova? Ẹhẹ, u muẹme! Ọghẹnẹ ọ kẹ Mosis ẹgba ẹzi ro kere nọ: ‘Salọ uzuazọ.’ (Owọ avọ 19) Rekọ, ẹvẹ ma rẹ rọ salọ uzuazọ? Mosis ọ ta nọ: “Wha you ỌNOWO na Ọghẹnẹ rai, je yo uru riẹ, jẹ dhẹ gbalọ iẹe.” (Owọ avọ 20) Ma te you Jihova, ma rẹ romakpotọ gaviezọ kẹe jẹ dhẹ gbalọ iẹe ghelọ oware kpobi nọ ma rẹriẹ ovao dhe. Ẹkwoma ere oruo ma rẹ rọ salọ uzuazọ—uzuazọ uyero nọ o mai woma kpaobọ enẹna avọ ẹruore uzuazọ ebẹdẹ bẹdẹ evaọ akpọ ọkpokpọ Ọghẹnẹ nọ ọ be tha.—2 Pita 3:11-13; 1 Jọn 5:3.

Eme ọ Mosis na i wuhrẹ omai ugogo uzẹme jọ nọ o rẹ kẹ uduotahawọ. Ghelọ oware kpobi nọ o via kẹ owhẹ no evaọ akpọ omuomu nana kẹhẹ, ẹruore ọ gbẹ riẹ kẹ owhẹ. Jihova ọ kẹ owhẹ uvẹ-ọghọ nọ whọ rẹ rọ salọ oghẹrẹ uzuazọ nọ whọ gwọlọ yeri. Ẹhẹ, whọ rẹ sae salọ inọ who re you Jihova, yoẹme kẹe, jẹ dadamu abọ riẹ. Who te ru ere, Jihova ọ te ghale omodawọ ra.

Uzẹme nana—inọ ma wo ufuoma nọ ma rẹ rọ salọ inọ ma re you Jihova jẹ gọe—o kẹ aye nọ ma wariẹ ẹme riẹ evaọ obehru na omosasọ. Aye na ọ ta nọ: “Me you Jihova. Ẹsejọ o jẹ hae thọrọ omẹ ẹro inọ oware nọ o mai wuzou họ, inọ me you Jihova. Fikiere mẹ rẹ sae gọe te urere.” Avọ obufihọ Jihova, whọ rẹ sai ru epọvo na re.

[Oruvẹ-obotọ]