“Oke” nọ a Fihọ na o Kẹle No

KPORO

“Oke” nọ a Fihọ na o Kẹle No

WỌHỌ ọruẹaro na Habakuk, ilele Jesu a jẹ rọ ọwhọ rẹro ekuhọ uye-oruẹ. Nọ ilele na e riẹ oware nọ Uvie Ọghẹnẹ u ti ru rọ kpọ eware vi evaọ otọakpọ no, a tẹ nọ Jesu nọ: “Oke ovẹ eware nana ete via, gbe eme ọ rẹ te jọ oka ẹtha ra [wọhọ Ovie] gbe urere akpọ na?” (Matiu 24:3) Nọ ọ jẹ kẹ ae uyo, Jesu ọ ta nọ Jihova Ọghẹnẹ ọvo ọ riẹ ugogo oke nọ Uvie na u ti ro mu otọakpọ na soso họ esuo. (Matiu 24:36; Mak 13:32) Rekọ Jesu gbe ahwo jọ nọ i kere abọjọ Ebaibol na a fodẹ eware jọ nọ e te via nọ i ti dhesẹ nọ oke na o kẹle no.—Rri ẹkpẹti nọ ọ rrọ obọze na.

Kọ whọ gbẹ be ruẹ eware nana nọ e be via nẹnẹ? Jesu ọ ta re inọ a ti ru iruo ewuhrẹ jọ nya akpọ na soso duwu. Ọ ta nọ: “A rẹ te vuẹ ovuẹ usiuwoma uvie na kẹ akpọ na kpobi, re o jọ isẹi kẹ erẹwho akpọ na kpobi; kẹsena urere u te zi te.”—Matiu 24:14.

Oyena o be via nẹnẹ. Isẹri Jihova a bi ru iruo yena. Evaọ ekwotọ nọ i bu te egba ivẹ gbe ọgba gbezeza (236), Isẹri Jihova nọ i bu vi ima ihrẹ a be vuẹ ahwo oware nọ Uvie na u ti ru, je bi fi obọ họ kẹ ae wuhrẹ epanọ a re ro yeri uzuazọ lele izi ikiẹrẹe Ọghẹnẹ, ọnọ ọ jiroro nọ o bi ti si uye-oruẹ gbe edada no. Ruabọhọ ewuhrẹ kpahe Uvie Ọghẹnẹ, who ti wo ẹruore uzuazọ evaọ akpọ nọ ọ kare uye-oruẹ—bẹdẹ bẹdẹ.

[Ẹkpẹti nọ ọ rrọ ẹwẹ-obe avọ 8]

Ikereakere nọ E Ta Ẹme Kpahe Edẹ Urere Na

MATIU 24:6, 7; EVIAVIA 6:4

• Ẹmo-ofio nọ a re ruẹ obọ riẹ hẹ

MATIU 24:7; MAK 13:8

• Etọ nọ i re ti nuhu gaga

• Emu nọ ọ te kare

LUK 21:11; EVIAVIA 6:8

• Eyao sa-sa

MATIU 24:12

• Emuemu o ti vihọ

• Uyoyou u re ti kiekpo