Orọwọ Nọ U Notọ Ze 1: Oware Jọ O Rrọ Oma Ohwo-akpọ Nọ U Re

Kpohọ Obọfa Nyae Rria Nọ Ohwo O Te whu

Ẹvẹ uwuhrẹ nana u ro muhọ? Obe na The New Encyclopædia Britannica (1988), Uko avọ 11, ẹwẹ-obe avọ 25 o ta nọ egbaeriariẹ Ileleikristi ọsosuọ a jẹ uwuhrẹ ahwo Griki na rehọ inọ oware jọ o rrọ oma ohwo-akpọ nọ u re kpohọ obọfa nyae rria nọ ohwo o te whu, yọ okenọ a ro di eva ohwo họ Ọghẹnẹ o re ro fi ei họ ohwo oma.

Eme Ebaibol e ta? “O ve zihe kpo ẹkpẹ, evaọ ẹdẹọvo ọyena, oma iruo riẹ kpobi ovẹ raha.”—Olezi 146:4.

Kọ ohwo-akpọ o wo “ẹzi” jọ nọ o re noi oma kpohọ obọfa nyae rria nọ ohwo o te whu? Ebaibol e ta inọ Ọghẹnẹ ọ kẹ ahwo-akpọ gbe erao ẹgba uzuazọ, hayo ẹzi, nọ u re ru ohwo jọ uzuazọ ẹkwoma ẹwẹ-ọwẹ. Ẹgba uzuazọ nana oye u re ru ohwo jọ uzuazọ. Rekọ nọ ohwo hayo arao o te sẹwẹ họ, onọ u re ru nọ ẹgba uzuazọ nọ Ọghẹnẹ ọ kẹ riẹ na u gbe ro ruiruo ho, koyehọ o whu no. Ọ rẹ gbẹ sae riẹ onahona ha.—Emuhọ 3:19; Ọtausiuwoma Na 3:19-21; 9:5.

No emuhọ riẹ ze, uwuhrẹ na inọ oware jọ o rrọ oma ohwo-akpọ nọ u re kpohọ obọfa nyae rria nọ ohwo o te whu no o wha enọ jọ ze: Bovẹ oware yena u re kpohọ nọ ohwo o te whu no? Eme ọ rẹ via kẹ ahwo omuomu nọ a te whu? Nọ otu nọ i se omarai Ileleikristi oke yena a jẹ uwuhrẹ nana rehọ no, u te su kpohọ ọjẹrehọ uwuhrẹ ofa—uwuhrẹ erae ehẹle.

Rri eria Ebaibol nana: Ọtausiuwoma Na 3:19; Matiu 10:28; Iruẹru Ikọ Na 3:23

UZẸME ẸME NA:

Nọ ohwo o te whu, yọ uzuazọ riẹ u kuhọ no