Orọwọ Nọ U Notọ Ze 2: Irumuomu A Rẹ Ruẹ Uye Evaọ Ehẹle

Ẹvẹ uwuhrẹ nana u ro muhọ? “Evaọ usu egbaeriariẹ Griki nọ e mae viodẹ, Plato họ ọnọ eriwo riẹ ọ mai kpomahọ uwuhrẹ Ehẹle nọ ahwo a rọwo.”—Histoire des enfers (Ikuigbe Uwuhrẹ Ehẹle), onọ Georges Minois o kere, ẹwẹ-obe avọ 50.

“No udevie ikpe-udhusoi avọ 2 AD na vrẹ, Ileleikristi nọ a rehọ ereghẹ-ididi Griki jọ wuhrẹ a te w’iroro na inọ a rẹ rehọ eriwo egbaeriariẹ Griki ro dhesẹ ẹrọwọ rai via . . . Ereghẹ-ididi nọ e mai kiehọ ae oma họ erọ Plato.”—The New Encyclopædia Britannica (1988), Uko avọ 25, ẹwẹ-obe avọ 890.

“Uwuhrẹ Ichọche o ta vevẹ inọ ehẹle e rrọ, gbe inọ o rrọ oria uye ebẹdẹ bẹdẹ. Nọ erahaizi e tẹ nwani whu, ẹzi rai o ve kpohọ ehẹle, oria nọ a rẹ jọ ruẹ uye ‘erae ebẹdẹ bẹdẹ.’ Ugogo uye ehẹle họ ebrudhe ibẹdẹ bẹdẹ nọ o rẹ hẹriẹ usu nọ ohwo o wo kugbe Ọghẹnẹ.”—Catechism of the Catholic Church, ukere 1994, ẹwẹ-obe avọ 270.

Eme Ebaibol e ta? “Enọ e rọ uzuazọ a riẹ nọ a reti whuẹ, rekọ iwhuowhu e riẹ oware ovo ho, . . . keme iruo hayo iroro hayo eriariẹ hayo areghẹ e rọ eva ẹri hi, obonọ who bi kpohọ na.”—Ọtausiuwoma Na 9:5, 10.

Ubiẹme nọ a jọ etenẹ fa ẹri na họ Sheol evaọ Hibru, onọ u dhesẹ “oria iwhuowhu,” yọ a jọ Ebaibol efa jọ fae “ehẹle.” Eme etenẹ Ebaibol na o dhesẹ kpahe uyero iwhuowhu na? Kọ a rẹ jọ ẹri hayo Sheol ruẹ uye wọhọ osohwa izieraha? Ijo, keme a “riẹ oware ovo ho.” Oye o wha riẹ ze nọ evaọ okenọ Job ọ jẹ ruẹ uye ẹyao ọgaga jọ, ọ tẹ lẹ Ọghẹnẹ inọ: “Si omẹ no obọ Ẹriwi [hayo, Sheol evaọ Hibru].” (Job 14:13) Kọ ayare riẹ na ọ hai w’otọ otẹrọnọ Sheol yọ oria nọ a rẹ jọ ruẹ uye bẹdẹ bẹdẹ? Wọhọ epaọ uwuhrẹ Ebaibol, ehẹle yọ uki gheghe, oria nọ a rẹ jọ riẹ onahona ha.

Kọ ogbẹrọnọ otofa ehẹle onana o mai wo iroro jẹ rọwo kugbe Ikereakere na? Uzioraha vẹ o rẹ ga te epanọ Ọghẹnẹ oyoyou na ọ rẹ rọ lahiẹ ohwo bẹdẹ bẹdẹ? (1 Jọn 4:8) Rekọ otẹrọnọ uwuhrẹ erae ehẹle yọ uwuhrẹ ọrue, kọ ẹvẹ kpahe uwuhrẹ inọ ahwo woma kpobi a bi kpohọ odhiwu?

Rri eria Ebaibol nana: Olezi 146:3, 4; Iruẹru Ikọ Na 2:25-27; Ahwo Rom 6:7, 23

UZẸME ẸME NA:

Ọghẹnẹ ọ rẹ lahiẹ ahwo evaọ ehẹle he

[Ọnọ o wo uwoho nọ o rrọ ẹwẹ-obe avọ 11]

Barrators—Giampolo/The Doré Illustrations For Dante’s Divine Comedy/Dover Publications Inc.