Orọwọ Nọ U Notọ Ze 3: Ahwo Woma Kpobi A Re Kpohọ Odhiwu

Ẹvẹ uwuhrẹ nana u ro muhọ? Evaọ emuhọ ikpe-udhusoi avivẹ, nọ ikọ Jesu a whu no, Ilorida Ichọche oke yena e tẹ d’owọ muotọ. Obe na New Catholic Encyclopedia (2003), Uko avọ 6, o jọ ẹwẹ-obe avọ 687 ta kpahe uwuhrẹ rai nọ: “Ofẹ nọ uwuhrẹ rai o mae tẹrovi họ, nọ ohwo o te whu, ẹzi riẹ o re kpohọ oria nọ a re jo ru ei fo, kẹsena o ve kpohọ odhiwu nyae reawere uzuazọ.”

Eme Ebaibol e ta? ‘Ahwo nọ a rọ oma kpotọ eva e were ae, keme a te rria akpọ na.’—Matiu 5:5.

Dede nọ Jesu ọ ya eyaa kẹ ilele riẹ inọ ọ te “ruẹrẹ oria” họ kẹ ae evaọ obọ odhiwu, o dhesẹ inọ orọnikọ ohwo ọ tẹ nwani kiẹrẹe o ve kpohọ obei hi. (Jọn 3:13; 14:2, 3) Kọ ogbẹrọnọ ọye ọ lẹ inọ ‘epanọ a rrọ obọ odhiwu ru oreva Ọghẹnẹ na, a jọ akpọ na ru ere re’? (Matiu 6:9, 10) Uzẹme riẹ họ, ikiẹrẹe na i ti wo osohwa uzuazọ evaọ eria ivẹ. Umutho rai jọ a ti lele Kristi su evaọ obọ odhiwu, rekọ ibuobu rai a te rria otọakpọ na bẹdẹ bẹdẹ.—Eviavia 5:10.

Nọ oke o be nyaharo na, ichọche na a te go iruo nọ u fo nọ a re ru evaọ otọakpọ na họ akotọ. Eme o no rie ze? Obe na The New Encyclopædia Britannica, o ta nọ, “Ichọche na a tẹ te rọ ẹmẹrera rọ oware ofa nwene ẹta Uvie Ọghẹnẹ nọ a je rẹro riẹ na.” Ichọche na i te mu ogaga họ ewo ẹkwoma oma-udhehọ esuo-ohrowo, be rọ ere gbabọkẹ ẹme nọ Jesu ọ ta inọ ilele riẹ a rẹ jọ erọ “akpọ na ha.” (Jọn 15:19; 17:14-16; 18:36) Evaọ etoke esuo riẹ, ọba Rom na Constantine o ru nọ ichọche na e rọ rehọ iwuhrẹ efa gua orọwọ rai, utionana jọ họ uwuhrẹ kpahe oghẹrẹ nọ Ọghẹnẹ ọ rrọ.

Rri eria Ebaibol nana: Olezi 37:10, 11, 29; Jọn 17:3; 2 Timoti 2:11, 12

UZẸME ẸME NA:

Otọakpọ na ibuobu ahwo woma a te rria bẹdẹ bẹdẹ, orọnikọ obọ odhiwu hu

[Ọnọ o wo uwoho nọ o rrọ ẹwẹ-obe avọ 12]

Art Resource, NY