Wuhrẹ Emọ ra

Shẹm Ọ Rọ Ẹro Ruẹ Eyoma ọrọ Uyerakpọ Ivẹ

ỌMỌZAE Noa jọ nọ a re se Shẹm ọ zọ nọ a raha uyerakpọ jọ, ọ tẹ jẹ rọ ẹro ruẹ uyerakpọ ofa. Kọ whọ riẹ oware nọ o soriẹ nọ a rọ raha uyerakpọ ọsosuọ nọ Shẹm ọ rria gbe epanọ a ro siwi ei avọ uviuwou riẹ ruọ uyerakpọ avivẹ?— * Joma ta ẹme kpahe iẹe.

Wọhọ epanọ Ebaibol e ta, “umuomu ohwo” o rro thesiwa evaọ okenọ Shẹm ọ gbẹ jọ ọmaha. Ahwo-akpọ a je roro kpahe “eyoma kẹse kẹse.” Kọ whọ riẹ oware nọ Ọghẹnẹ o ru?— Ọ rehọ ẹvo ze, onọ u kpe ahwo oyoma oke yena kpobi. Pita ukọ na o kere nọ: “Ẹvo nọ [o ku] akpọ ọyena ọ tẹ raha iẹe.”—Emuhọ 6:5; 2 Pita 3:6.

Kọ whọ gbẹ ruẹ oware nọ o soriẹ nọ Ọghẹnẹ ọ rọ raha uyerakpọ yena?— Ahwo na a jọ yoyoma, yọ a je roro kpahe “eyoma kẹse kẹse.” Jesu ọ ta kpahe onana. Ọ ta nọ taure “[ẹvo na] ọ tẹ ze,” ahwo na a jẹ riakpọ kuoma, a jẹ “re . . . jẹ da,” yọ “a jẹ rọwo, a jẹ rehọ kẹ rọwo.” Jesu o fibae nọ: ‘A riẹ hẹ bẹsenọ ẹvo na ọ rọ ze, ọ jẹ rehọ aikpobi vrẹ.’—Matiu 24:37-39.

Eme ahwo oke yena a muẹrohọ họ na?— Noa, ọsẹ Shẹm, ọ jọ “ọvuẹovuẹ ẹrẹreokie,” rekọ ahwo na a rọwo gaviezọ kẹ oware nọ o je whowho kẹ ae he. Noa ọ gaviezọ kẹ Ọghẹnẹ o te ku okọ, onọ tei te ahwo uviuwou riẹ a te jọ evaọ etoke Owhe Ologbo na. Noa, aye riẹ, emezae rai—Shẹm, Ham, gbe Jafẹt—avọ eyae rai ọvo họ enọ i muẹrohọ je ru oware nọ Ọghẹnẹ ọ gwọlọ nọ a ru. Ahwo nọ a kiọkọ kpobi a je ru oware nọ o were rai, fikiere Owhe na o te kpe aikpobi kufiẹ.—2 Pita 2:5; 1 Pita 3:20.

Nọ oware wọhọ ukpe ovo nọ Owhe na o ku vrẹ no, Shẹm gbe ahwo uviuwou riẹ kpobi a te no eva okọ na ze ruọ otọ oyaya. Ahwo oyoma na kpobi a whu no, rekọ u kri hi, eyoma ọ tẹ wariẹ muhọ evihọ. Kenan, ọmọzae oniọvo Shẹm nọ a re se Ham, o ru oware jọ nọ u yoma gaga te epanọ Noa ọ rọ ta nọ: “Eka i re te Kenan.” Nimrọd, uruọmọ Ham, o yoma gaga re. Ọ wọso Jihova, Ọghẹnẹ uzẹme na, ọ tẹ jẹ ta kẹ ahwo inọ a bọ uwou ukpehru jọ, onọ a se Bebẹl, re a ro ru odẹ  kẹ omarai. Ẹvẹ who roro nọ onana o jọ Shẹm gbe ọsẹ riẹ oma?—Emuhọ 9:25; 10:6-10; 11:4, 5.

O were rai hi, yọ o were Jihova gbe he. Kọ whọ riẹ oware nọ Jihova o ru?— Ọ wha ozighi họ ẹvẹrẹ rai, onọ u ru nọ a gbẹ jẹ sai wo otoriẹ ẹme ohwohwo ho. Fikiere ahwo na a tẹ siọ ebabọ na ba, enọ i w’otoriẹ ẹvẹrẹ ohwohwo a te kuomagbe nya kpohọ ọvuọ oborai. (Emuhọ 11:6-9) Rekọ Ọghẹnẹ o nwene ẹvẹrẹ Shẹm gbe ahwo uviuwou riẹ hẹ. Onana u ru nọ a gbẹ jẹ rọ rria kẹle oma, je fi obọ họ kẹ ohwohwo gọ Ọghẹnẹ. Kọ whọ riẹ epanọ Shẹm ọ gọ Jihova kri te?—

Shẹm ọ rria te ikpe egba ezeza (600). Ikpe udhone gbe ikpegberee ọ jọ nọ Owhe Ologbo na o ro ku, yọ ọ wariẹ rria ikpe egba isoi gbe ivẹ (502) nọ Owhe Ologbo na o ku vrẹ no. O rẹ sai mu omai ẹro inọ Shẹm o fi obọ họ kẹ Noa ọsẹ riẹ kare okọ nọ Ọghẹnẹ ọ ta kẹe nọ ọ kare jẹ vẹvẹ ahwo unu kpahe Owhe na. Rekọ eme who roro nọ Shẹm o ru evaọ ikpe nọ i bu vrẹ egba isoi (500) nọ Owhe na o ku vrẹ no?— Noa o se Jihova “Ọghẹnẹ Shẹm.” U muẹro nọ Shẹm ọ ruabọhọ egagọ Jihova, je fi obọ họ kẹ ahwo uviuwou riẹ ru epọvo na re. Uwhremu na, Abraham, Sera, gbe Aiziki a te ti no uyẹ Shẹm ze.—Emuhọ 9:26; 11:10-31; 21:1-3.

Whaọ, roro kpahe akpọ inẹnẹ, onọ u bi dhe eyeyoma anwọ oke Shẹm ze na. Eme ọ te via kẹ akpọ nana?— Ebaibol na e ta nọ ọ “rẹ te vrẹ.” Rekọ muẹrohọ eyaa na: “Ohwo nọ o re ru oreva Ọghẹnẹ ọ rẹ jọ bẹdẹ.” Fikiere, ma te ru oreva Ọghẹnẹ, ma sae jọ usu ahwo nọ a te zọ ruọ akpọ ọkpokpọ Ọghẹnẹ. Kẹsena, ma vẹ te rria otọakpọ na bẹdẹ bẹdẹ avọ evawere ẹkwoma obufihọ Ọghẹnẹ!—1 Jọn 2:17; Olezi 37:29; Aizaya 65:17.

[Oruvẹ-obotọ]

Enọ:

○ Oghẹrẹ uyerakpọ vẹ Shẹm ọ kake rria, kọ ẹjiroro ivẹ vẹ e lẹliẹ Ọghẹnẹ raha uyerakpọ yena?

○ Ẹvẹ Shẹm ọ rria kri te, kọ didi oghẹrẹ ohwo ọ jọ?

○ Eme ọ be te via kẹ akpọ nana kẹle?

○ Eme ma re ru hrọ re ma sae zọ okenọ a te raha akpọ nana?