Jesu Kristi—Epanọ Ovuẹ Riẹ U Kpomahọ Ahwo Te

“Uzẹme, isẹri nọ e mae rro kpahe ọzae owareghẹ obọ Kapaniọm na họ, eme iwowolẹ riẹ i gbe bi duobọte udu gbe iroro ahwo nẹnẹ.” *—OKERE-EBE NA, GREGG EASTERBROOK.

EME i wo ẹgba gaga. Eme ọ areghẹ nọ a riẹ salọ i re duobọte ahwo udu, kẹ ẹruore, je nwene uzuazọ ahwo. Ohwo ọvo ọ re ta eme nọ i wo ẹgba vi eme Jesu Kristi hi. Ohwo jọ nọ ọ jariẹ okenọ Jesu ọ kẹ Ovuẹ obọ Ugbehru Riẹ nọ a riẹ gaga na o kere uwhremu na nọ: “Nọ Jesu o ku eme nana họ no, ewuhrẹ riẹ o te gbe ahwo buobu na enu.”—Matiu 7:28.

Rite inẹnẹ, ahwo a riẹ eme Jesu buobu wariẹ akpọ na soso họ. Roro kpahe umutho eme obọdẹ nana jọ.

“Wha sai ru iruo kẹ Ọghẹnẹ gbe efe he.”—Matiu 6:24.

“Koware koware nọ wha guọlọ nọ ahwo a ru kẹ owhai, wha ru i tieye kẹ ai re.”—Matiu 7:12.

“Wha rehọ eware Siza kẹ Siza, re wha rehọ eware Ọghẹnẹ kẹ Ọghẹnẹ.”—Matiu 22:21.

“Ẹkẹ oghale o mae rọ vi emio.”—Iruẹru Ikọ Na 20:35.

Orọnikọ eme Jesu yọ eme obọdẹ gheghe ọvo ho. Ovuẹ nọ o whowho u wo ẹgba keme u dhesẹ uzẹme kpahe Ọghẹnẹ via, u wuhrẹ ahwo epanọ a sai ro yeri uvi uzuazọ, u te je dhesẹ ifue orọ uye-oruẹ ahwo-akpọ, Uvie Ọghẹnẹ. Nọ ma be te kiẹ ovuẹ nana riwi evaọ ewẹ-obe nọ e rrọ aro na, ma te ruẹ oware nọ o soriẹ nọ ‘eme iwowolẹ Jesu i gbe bi ro duobọte udu gbe iroro ima ahwo buobu nẹnẹ.’

[Oruvẹ-obotọ]