Enọ I Bi Se Ebe Mai A Nọ Inọ . . .

Kọ Jesu Họ Maekẹl, Ukọ-Odhiwu Oride Na?

▪ Re ma tae kpẹkpẹe, uyo na họ Ee. A jọ eria buobu wo uruemu nọ ohwo o re ro wo vrẹ odẹ ovo. Uruemu utioye na o jariẹ evaọ okenọ a ro kere Ebaibol na. Wọhọ oriruo, Izrẹl yọ odẹ ofa nọ a ro se Jekọp. (Emuhọ 35:10) A rehọ edẹ isoi sa-sa se Pita ukọ na—Simiọn, Saimọn, Pita, Kifas, gbe Saimọn Pita. (Matiu 10:2; 16:16; Jọn 1:42; Iruẹru Ikọ Na 15:7, 14) Ẹvẹ o sai ro mu omai ẹro inọ Maekẹl yọ odẹ ofa Jesu? Roro kpahe Ikereakere nọ e rrọ obotọ na nọ e kẹ imuẹro onana.

Ebaibol na e ta ẹme te Maekẹl omama ẹzi ulogbo na isiasoi. Isiasa a jọ obe Daniẹl ta ẹme tei. Ma jọ Daniẹl 10:13, 21 se inọ Maekẹl o fi obọ họ kẹ ukọ-odhiwu jọ nọ a vi uwou, a jọ etẹe se Maekẹl “omọvo isu emọ-ivie” gbe “ọmọzae ovie rai.” Ofariẹ, Daniẹl 12:1 u dhesẹ inọ evaọ oke urere na, “Maekẹl o re ti muẹ, ọmọ-ovie ologbo nọ owouzou ahwo ra.”

A wariẹ ta ẹme te Maekẹl evaọ Eviavia 12:7, onọ o ta nọ “Maekẹl avọ ikọ-odhiwu riẹ” a họre uvi ohọre jọ, onọ a jo le Setan Ẹdhọ na gbe ikọ imuomu riẹ no odhiwu.

Muẹrohọ inọ evaọ Ikereakere obehru na kpobi, a dhesẹ Maekẹl wọhọ ukọ-odhiwu ọgbaẹmo nọ ọ be họre kẹ jẹ be thọ ahwo Ọghẹnẹ, be tubẹ rẹriẹ ovao dhe Setan, ọnọ ọ rrọ ọwegrẹ Jihova nọ ọ mae rro.

A jọ Jud owọ avọ 9 se Maekẹl “ukọ-odhiwu oride na.” Ẹme na “oride,” u dhesẹ “ọnọ o wuzou” hayo “oletu,” yọ a jọ Ebaibol na rehọ ẹme na “ukọ-odhiwu oride” se imava ha. Oria ofa nọ a jọ fodẹ ukọ-odhiwu oride họ obe 1 Ahwo Tẹsalonika 4:16, onọ Pọl ọ jọ ta ẹme kpahe Jesu nọ ọ kparoma no na inọ: “Ọnowo [Jesu] omariẹ ọvo o re ti mu no obọ odhiwu tha, avọ edo gbe uru ukọ-odhiwu oride, gbe edo ọgba Ọghẹnẹ.” Fikiere, a jọ etenẹ dhesẹ nọ Jesu Kristi họ ukọ-odhiwu oride na.

Ma te roro kpahe eware nọ ma ta ẹme te no na, ẹvẹ ma rẹ sai ku ẹme na họ? Jesu Kristi họ Maekẹl, ukọ-odhiwu oride na. Edẹ ivẹ na—Maekẹl (nọ otofa riẹ o rrọ “Ono Ọ Wọhọ Ọghẹnẹ?”) gbe Jesu (nọ otofa riẹ o rrọ “Jihova Họ Esiwo”)—e tẹrovi ọkwa Jesu wọhọ ọnọ ọ karo evaọ ewhowho esuo-okpehru Ọghẹnẹ. Ahwo Filipai 2:9 o ta nọ: “Ọghẹnẹ o je ru [Jesu] ro kpo-ehru gaga ọ jẹ kẹe odẹ nọ o ro vi edẹ kpobi.”

U wuzou re ma riẹ inọ orọnikọ oke nọ a ro yẹ Jesu evaọ otọakpọ oye uzuazọ riẹ u ro muhọ họ. Taure a te ti yẹ Jesu, ukọ-odhiwu jọ ọ nya bru Meri jẹ vuẹe inọ ọ te rọ ẹkwoma ẹzi ẹri dihọ, gbe inọ odẹ nọ o re se ọmọ na họ Jesu. (Luk 1:31) Evaọ etoke iruo odibọgba riẹ, ẹsibuobu Jesu ọ ta ẹme kpahe uzuazọ riẹ evaọ oke nọ ọ re ziọ otọakpọ họ.—Jọn 3:13; 8:23, 58.

Fikiere, Jesu họ Maekẹl ukọ-odhiwu oride na, evaọ okenọ ọ re ziọ otọakpọ họ. Nọ ọ kparoma je zihe kpohọ odhiwu no, Jesu ọ tẹ wariẹ mu iruo riẹ họ wọhọ Maekẹl, ukọ-odhiwu oride na, “rọ kẹ oruaro Ọghẹnẹ Ọsẹ na.”—Ahwo Filipai 2:11.