Oware nọ Jesu O Wuhrẹ Kpahe Omariẹ

“Jesu o wo avro vievie he kpahe oghẹrẹ ohwo nọ ọ jọ, obonọ o no ze, oware nọ o soriẹ nọ ọ rọ ziọ otọakpọ, gbe oghẹrẹ ohwo nọ ọ te jọ evaọ obaro.”—OKERE-EBE NA, HERBERT LOCKYER.

RE MA sae jẹ eware nọ Jesu o wuhrẹ rehọ je fi ẹrọwọ họ ae, o gwọlọ nọ ma rẹ riẹ eware jọ kpahe ọyomariẹ tao. Ginọ ono họ Jesu? Bovẹ o no ze? Ẹjiroro vẹ ọ rọ ziọ otọakpọ? Evaọ ikere Usiuwoma na—Matiu, Mak, Luk, gbe Jọn—ma rẹ sae ruẹ uyo nọ Jesu omariẹ ọ rehọ unu riẹ kẹ.

Ọ jọ uzuazọ no taure a te ti yẹe evaọ otọakpọ Jesu ọ ta nọ: ‘Nọ Abraham ọ re te jọ họ, yọ omẹ rrọ no.’ (Jọn 8:58) No oke Abraham rite oke nọ a ro yẹ Jesu, oware wọhọ ikpe idu ivẹ (2,000) e ruemu. Ghele na, Jesu ọ jọ uzuazọ no taure a te ti yẹ Abraham. Kọ diẹse Jesu ọ jọ oke yena? Jesu omariẹ ọ ta nọ: “Me no obọ odhiwu ze.”—Jọn 6:38.

Ọmọ Ọghẹnẹ Jihova ọ ma ijẹle buobu nọ e rrọ emọ kẹe. Rekọ Jesu o wo ohẹriẹ evaọ usu rai. O se omariẹ “Ọmọvo Ọghẹnẹ na.” (Jọn 3:18) Ẹme ọyena o dhesẹ inọ Jesu họ omama nọ Ọghẹnẹ ọvo ọ rehọ obọriẹ ma. Ẹkwoma Ọmọvo na Ọghẹnẹ ọ rọ ma eware nọ i kiọkọ kpobi.—Ahwo Kọlọsi 1:16.

“Ọmọ ohwo” Jesu ọ rehọ ẹme nana dhesẹ omariẹ unuẹse buobu vi eme efa kpobi. (Matiu 8:20) Ọ rehọ enẹ dhesẹ inọ orọnikọ ọyomariẹ yọ ẹnjẹle nọ o rerẹ hayo nwene oma ruọ ohwo-akpọ họ. Ukpoye, ọ jọ ohwo-akpọ dẹẹ. Ọghẹnẹ ọ rehọ ẹkwoma ẹzi ọfuafo riẹ vi uzuazọ Ọmọ na no odhiwu ze fihọ edhede Meri nọ ọ riẹ ọzae he. Onana o whariẹ ze nọ a ro yẹ Jesu wọhọ ohwo ọgbagba nọ ọ kare uzioraha.—Matiu 1:18; Luk 1:35; Jọn 8:46.

Mesaya nọ a ya eyaa riẹ na Aye Sameria jọ ọ ta kẹ Jesu nọ: “Mẹ riẹ nọ, Mesaya ọ be tha.” Jesu ọ tẹ kpahe kẹe nọ: “Mẹ nọ ọ be ta ẹme kẹ owhẹ na, mẹ họ ọ ye.” (Jọn 4:25, 26) Otofa ẹme na “Mesaya” hayo “Kristi” họ, “Ọnọ A Wholo.” Ọghẹnẹ o wholo hayo rehọ Jesu mu ọkwa obọdẹ jọ evaọ orugba eyaa Ọghẹnẹ.

Ugogo iruo nọ ọ nyaze ti ru Jesu ọ ta nọ: “Mẹ rẹ vuẹovuẹ usiuwoma uvie Ọghẹnẹ . . . keme fiki onana a je vi omẹ ze.” (Luk 4:43) Dede nọ o ru iruo igbunu buobu kẹ ahwo nọ ebẹbẹ e jọ oma, usiuwoma ota Uvie Ọghẹnẹ họ ugogo iruo nọ ọ rọ karo. Ma te ta kpahe eware nọ o wuhrẹ kpahe Uvie yena nọ ma be nyaharo na.

O rrọ vevẹ inọ Jesu ọ jọ ohwo-akpọ gheghe he. * Wọhọ epanọ ma be te ruẹ na, uzuazọ nọ o yeri evaọ obọ odhiwu u ru nọ eware nọ o wuhrẹ evaọ otọakpọ i ro vẹ ziezi. Agbẹta nọ ovuẹ nọ o whowho u bi ro kpomahọ ima ahwo buobu wariẹ akpọ na họ na!

[Oruvẹ-obotọ]