Oware nọ Jesu O Wuhrẹ Kpahe Uvie Ọghẹnẹ

“O [je] kpo ewho gbe iwhre, ọ vuẹ ovuẹ . . . usiuwoma uvie Ọghẹnẹ.”—LUK 8:1.

MA RẸ gwọlọ ta ẹme kpahe eware nọ e rrọ omai oja. Wọhọ epanọ Jesu omariẹ ọ ta, “eme ibuobu nọ erọ eva na unu a rẹ rọ tae via.” (Matiu 12:34) Nọ ma tẹ kiẹ eware nọ Jesu ọ ta kpahe evaọ odibọgba riẹ riwi, ma rẹ sae ta nọ Uvie Ọghẹnẹ o jariẹ oja.

Eme họ Uvie Ọghẹnẹ? Uvie yọ egọmeti nọ ovie o bi su. Fikiere, Uvie Ọghẹnẹ yọ egọmeti nọ Ọghẹnẹ o ro mu. Jesu ọ ta ẹme kpahe Uvie Ọghẹnẹ gaga, oye o jọ uzoẹme ovuẹ riẹ. A jọ ikere Usiuwoma ene na ta ẹme kpahe Uvie na vrẹ asia udhusoi gbikpe (110). Rekọ orọnọ ẹmeunu ọvo Jesu o je ro wuhrẹ hẹ. Ọ rọ uruemu riẹ wuhrẹ ahwo eware buobu kpahe Uvie Ọghẹnẹ re, gbe oware nọ Uvie na u ti ru.

Ono họ Ovie ọrọ Uvie na? Orọnikọ ahwo-akpọ a ru ivotu nọ a rọ rehọ Ovie Uvie Ọghẹnẹ mu hu. Ukpoye, Ọghẹnẹ omariẹ ọ salọ Ovie nana. Jesu ọ jọ iwuhrẹ riẹ dhesẹ via inọ ọye họ ọnọ Ọghẹnẹ ọ salọ re ọ jọ Ovie.

Jesu ọ riẹ nọ a ruẹaro fihọ Ebaibol na inọ Mesaya nọ a ya eyaa riẹ na ọ te jọ Ovie ọrọ Uvie nọ o te jọ bẹdẹ bẹdẹ. (2 Samuẹle 7:12-14; Daniẹl 7:13, 14; Matiu 26:63, 64) Kareghẹhọ nọ Jesu omariẹ ọ ta vevẹ nọ ọye họ Mesaya nọ a ruẹaro riẹ na. Jesu ọ rọ ere dhesẹ inọ ọye họ Ovie nọ Ọghẹnẹ o ro mu. (Jọn 4:25, 26) U fo kẹhẹ inọ Jesu ọ rehọ ẹme na “Uvie mẹ” ba ẹme ta unuẹse buobu!—Jọn 18:36.

Jesu ọ ta re inọ amọfa a ti lele iei su evaọ Uvie na. (Luk 22:28-30) O se ibe isu yena “uthuru okakao,” keme a te jọ umutho ahwo. Ọ ta kẹ ae nọ: “O were Ọsẹ rai nọ ọrẹ rehọ uvie na kẹ owhai.” (Luk 12:32) Obe urere Ebaibol na u dhesẹ inọ ahwo idu udhuhrẹ gbe ene (144,000) a ti wo uvẹ-ọghọ nọ a ti ro lele Kristi su.—Eviavia 5:9, 10; 14:1.

Bovẹ Uvie na o rrọ? Jesu ọ ta kẹ Pọntiọs Pailet, osu ubrotọ Rom jọ, inọ: “Uvie mẹ orọ akpọ na ha.” (Jọn 18:36) Orọnikọ ẹkwoma ọruẹrẹfihotọ ahwo-akpọ Kristi o ti ro su Uvie Ọghẹnẹ na ha. Ẹsibuobu Jesu o se Uvie na “uvie odhiwu.” * (Matiu 4:17; 5:3, 10, 19, 20) Fikiere, Uvie Ọghẹnẹ yọ egọmeti obọ odhiwu.

 Jesu ọ riẹ nọ ọ te wariẹ zihe kpohọ odhiwu nọ o te ku iruẹru riẹ evaọ otọakpọ na họ no. Ọ ta nọ ọ te jọ obei “ruẹrẹ eria” họ kẹ otu nọ o ti ku oma gbei lele iei su.—Jọn 14:2, 3.

Eme Uvie na u ti ru? Jesu o wuhrẹ ilele riẹ nọ a lẹ se Ọghẹnẹ inọ: “Uvie ra oze, epanọ a rọ obọ odhiwu ru orọ eva ra, ru re a jọ akpọ na ru ere re.” (Matiu 6:9, 10) A bi ru oreva Ọghẹnẹ evaọ obọ odhiwu. Ẹkwoma Uvie na a ti ro ru oreva Ọghẹnẹ kpahe otọakpọ na gba. Re oyena o ruẹse gbabọ, Uvie na o te wha inwene ilogbo ze evaọ otọakpọ na.

Eme Uvie na u ti ru evaọ otọakpọ? Jesu o wuhrẹ nọ Uvie Ọghẹnẹ u ti si emuemu no ẹkwoma ẹraha ahwo nọ a gwọlọ si obọ no emuemu hu. (Matiu 25:31-34, 46) Onana u dhesẹ nọ ogbekuo gbe eyoma kpobi o ti notọ riẹriẹriẹ. Jesu o wuhrẹ nọ ahwo nọ a te jọ otọakpọ na họ, enọ e “rọ oma kpotọ,” ikiẹrẹe, otu nọ i wo ohrọ, enọ i “wo eva efuafo” gbe ahwo nọ i re ru udhedhẹ.—Matiu 5:5-9.

Kọ otọakpọ nọ a nua jẹ raha no ahwo otiọye nọ a wo ẹrọwọ na a te rria? Vievie! Jesu ọ ya eyaa nọ a ti ru akpọ na woma ziezi evaọ otọ Uvie Ọghẹnẹ. Ọzae jọ nọ a kare kẹle Jesu ọ ta nọ: “Jesu roro omẹ, okenọ whọ ze ogaga uvie ra.” Jesu ọ tẹ kẹe uyo nọ: “Uzẹme mẹ ta kẹ [owhẹ nẹnẹ na], who re ti lele omẹ jọ obọ Paradais.” (Luk 23:42, 43) Ẹhẹ, Uvie Ọghẹnẹ u ti zihe otọakpọ na soso ruọ aparadase—wọhọ epanọ ọgbọ Idẹn ọ jọ.

Eme ọfa Uvie na u ti ru kẹ ahwo-akpọ? Orọnikọ eyaa oware nọ Uvie Ọghẹnẹ u ti ru kẹ ahwo-akpọ ọvo Jesu ọ yaa ha. O ru eware  jọ ro dhesẹ oware nọ Uvie na u ti ru. Jesu ọ rọ edhere igbunu siwi ahwo, rọ ere dhesẹ ẹmẹvo ọrọ oware nọ o ti ru evaọ obaro nọ o te muhọ esuo no. Ikere Usiuwoma nọ a rọ ẹzi ọfuafo kere na e ta kpahe Jesu nọ: “Ọ . . . nya Galili kpobi, o wuhrẹ eva uwouegagọ ọ jẹ vuẹ ovuẹ usiuwoma uvie na, o je siwi oghẹrẹ emo kpobi gbe oghẹrẹ ẹyao kpobi nọ i mu ahwo.”—Matiu 4:23.

Jesu o siwi eghẹrẹ eyao buobu. O “rovie aro ohwo nọ a yẹ tuaro.” (Jọn 9:1-7, 32, 33) Jesu ọ rọ obọ te ọzae jọ nọ o wo ẹyao oti, ẹyao na o te kpo. (Mak 1:40-42) Nọ a rehọ ọzae jọ nọ ‘o diezọ’ nọ “uleliutagha o rọ ẹrọo” bru rie ze, Jesu o dhesẹ via inọ ọ rẹ sai ru “idiezọ yo ẹme, gbe idienu ta ẹme.”—Mak 7:31-37.

Makọ uwhu dede o ga vi Jesu abọ họ, Ovie nọ Ọghẹnẹ o ro mu na. Evaọ isiasa jọ nọ a kere fihotọ, Jesu ọ kpare ahwo no uwhu ze. Ọ kpare ọmọvo ọrọ aye-uku jọ, ọmọtẹ ikpe 12 jọ, gbe Lazarọs, ogbẹnyusu ọghaghae riẹ.—Luk 7:11-15; 8:41-55; Jọn 11:38-44.

Nọ Jesu o je dhesẹ eghale nọ e rrọ obaro kẹ ahwo nọ e te jọ otọ esuo Uvie Ọghẹnẹ, ọ rọ ẹkwoma Jọn ukọ na ta nọ: “Rri oria ẹria Ọghẹnẹ o rọ udevie ahwo, a vọ ae a gbẹ te ria, a rẹ te jọ ahwo riẹ gbe Ọghẹnẹ oma riẹ a gbẹ te jọ, ọ vẹ te jọ Ọghẹnẹ rai. Ọghẹnẹ o ve ti ririe irui kpobi no aro rai; uwhu o gbẹte jọ ofa ha, hayo kọ uweri hi, hayo oviẹ hẹ, hayo edada ọvuọvo ho, keme eware anwae evrẹ no.” (Eviavia 1:1; 21:3, 4) Dai roro iei—akpọ nọ oviẹ orọ uweri o te jọ họ, nọ edada gbe uwhu e te jọ họ! Kẹsena olẹ na inọ a jọ otọakpọ na ru oreva Ọghẹnẹ wọhọ epanọ o rrọ obọ odhiwu na, u ve ti rugba vọvọ.

Oke vẹ Uvie Ọghẹnẹ o te rọ ze? Jesu ọ ta nọ etoke obọdẹ orọ eware oka, onọ o se “ẹtha” hayo ọzino riẹ u ti kpokahọ emuhọ esuo riẹ. Evaọ eruẹaruẹ nana, Jesu ọ ta eware buobu nọ i ti dhesẹ okenọ ọzino riẹ na wọhọ ovie u ti ro muhọ. Eware okpẹtu e te via wariẹ akpọ-soso họ nọ i ti kpokahọ etoke nana, te emo, ohọo, etọ nọ i re ti nyuhu, eyao, gbe emuemu nọ o re ti vihọ. (Matiu 24:3, 7-12; Luk 21:10, 11) Enana gbe eware efa nọ Jesu ọ ruẹaro rai na e be via evaọ edhere ologbo anwọ 1914 ze, ukpe nọ a ro fi Ẹmo Akpọ Ọsosuọ. Onana u dhesẹ nọ Jesu o muhọ esuo no enẹna. Kẹle na, Uvie na o te ze je ru nọ a te rọ jọ otọakpọ na ru oreva Ọghẹnẹ. *

Eme who ti wo no Uvie Ọghẹnẹ nọ o be tha na ze? Uyo na o roma hwa oghẹrẹ owọ nọ whọ jẹ kpahe ovuẹ Jesu.

[Oruvẹ-obotọ]