‘Ọ Rẹ Ruẹ Oware nọ O Rrọ Eva Ohwo’
Si Kẹle Ọghẹnẹ
‘Ọ Rẹ Ruẹ Oware nọ O Rrọ Eva Ohwo’
OKAFE o rẹ sae viẹ ohwo họ. Orọnikọ oye o rẹ nwani dhesẹ oghẹrẹ nọ ohwo ọ rrọ evaọ obeva ha. Okafe ahwo-akpọ a rẹ mai riwi ro bruoziẹ. Rekọ o rrọ oware evawere inọ Jihova Ọghẹnẹ o re riwi vrẹ okafe. Onana u dhesẹ oma via vevẹ evaọ ikuigbe nọ e rrọ 1 Samuẹle 16:1-12.
Dae jọ iroro ra ruẹ oware nọ a gbiku riẹ na. Jihova ọ gwọlọ rọ ovie ọkpokpọ mu kẹ orẹwho Izrẹl. Ọghẹnẹ ọ ta kẹ Samuẹle ọruẹaro na inọ: “Nya kpo obọ Jẹsi ohwo Bẹtlehẹm na, keme mẹ gwọlọ ovie kẹ oma mẹ no evaọ udevie emezae Jẹsi.” (Owọ 1) Jihova ọ fodẹ odẹ ọmọzae na ha, ọ ta ọvo inọ ohwo nọ ọ salọ na yọ omọvo emezae Jẹsi. Nọ Samuẹle o bi kpohọ Bẹtlẹhẹm na, ẹsejọhọ yọ ọ be jọ eva riẹ ta nọ ‘Ẹvẹ mẹ te sai ro vuhu ọmọzae Jẹsi nọ Jihova ọ salọ na?’
Nọ Samuẹle o te Bẹtlẹhẹm no, o te se Jẹsi avọ emezae riẹ gboma kpohọ idheidhe. Okenọ Eliab, ọmọzae ọkpako Jẹsi ọ nyaze, erru riẹ ọ dhẹ ruọ Samuẹle oma. Samuẹle o roro nọ erru gbe uthethei Eliab u ti ru ei fo ovie, fikiere ọ tẹ ta kẹ omariẹ nọ: “Ọye họ ọnọ ỌNOWO na o wholo.”—Owọ avọ 6.
Dede na, Jihova ọ rehọ e riẹ ere he. Ọ ta kẹ Samuẹle nọ: “Who riwi eru hayo uthethei riẹ hẹ, keme mẹ se riẹ.” (Owọ avọ 7) Orọnikọ erru gbe uthethei Eliab họ eware nọ e jọ Jihova oja ha. Ibiaro Jihova nọ e rẹ ruẹ eware kpobi na, i re riwi vrẹ okafe kpohọ udu ohwo, oria nọ uvi erru o rẹ jọ.
Jihova o ru ẹme na vẹ kẹ Samuẹle inọ: “ỌNOWO na o re riwẹ epaọ ohwo ho; eru oma ọye ohwo o re riwẹ, rekọ ỌNOWO na kọ obọ eva.” (Owọ avọ 7) Ẹhẹ, udu hayo eva ohwo họ oware nọ Jihova o re riwi, keme etẹe iroro hayo uruemu ohwo u re notha. Jihova, ọnọ ọ rẹ “dawo [hayo kiẹ] ibiudu” na, ọ siọ Eliab gbe emezae Jẹsi ezeza edekọ nọ e rọ kpahe Eliab.—Itẹ 17:3.
Rekọ ọmọzae Jẹsi jọ o gbe kiọkọ, Devidi ubreyẹ na, nọ ọ nyae “sẹro igodẹ.” (Owọ avọ 11) Fikiere a tẹ nyai se Devidi no obọ ẹwo ze se Samuẹle. Jihova ọ tẹ ta kẹ Samuẹle nọ: “Tovrẹ, who wholo iei, keme ọnana họ ọye.” (Owọ avọ 12) Uzẹme, Devidi yọ ọmoha nọ ọ jọ “gbodo avọ ibiaro iwowoma, o te je wo eru.” Rekọ udu ezi nọ o wo họ oware nọ o lẹliẹ Ọghẹnẹ jẹe rehọ.—1 Samuẹle 13:14.
Dede nọ akpọ nọ ma be rria nẹnẹ o bi jiri erru okafe, o rẹ sae kẹ omai omosasọ nọ ma rọ riẹ inọ orọnikọ erru okafe Jihova o re rri hi. Uthethei hayo erru ohwo nọ amọfa a bi jiri orọnikọ oye o rrọ Jihova oja ha. Oware nọ o riẹe oja họ, epanọ udu ra o rrọ. Kọ evuhumu onana o gbẹ be lẹliẹ owhẹ gwọlọ wo iruemu nọ i re ru owhẹ wo erru evaọ aro Ọghẹnẹ?