Si Kẹle Ọghẹnẹ

Ọnọ O re Ru Eyaa Riẹ Gba

JOSHUA 23:14

KỌ O rrọ bẹbẹ kẹ owhẹ re who fi eva họ amọfa? U yoma kẹhẹ inọ ma be rria akpọ nọ ahwo a bi jo ru lele ẹme rai ẹsibuobu hu. Otẹrọnọ ohwo jọ nọ who fi eva họ o ru owhẹ oware odada jọ—ẹsejọhọ o gu ọruẹ kẹ owhẹ hayo ọ ya eyaa jọ kẹ owhẹ nọ o rugba ha—onana o rẹ sae raha evaifihọ nọ who wo kpahe iẹe. Dede na, ohwo jọ ọ riẹ nọ whọ rẹ sai fi eva họ nọ ọ rẹ viẹ owhẹ họ vievie he. Itẹ 3:5 o ta udu họ omai awọ nọ: “Rehọ ẹroọrọsuọ ra kpobi kpahe ỌNOWO na.” Fikieme Jihova o ro te Ọnọ ma rẹ rẹroso—nọ ma re fi eva kpobi họ? Re ma ruẹse kẹ uyo onọ yena, joma kiẹ eme Joshua riwi—ọzae nọ o fi eva kpobi họ Jihova—wọhọ epanọ o rrọ Joshua 23:14.

Muẹrohọ uyero na. Joshua nọ ọ rehọ ẹta Mosis bi su emọ Izrẹl kpohọ Ẹkwotọ Eyaa na ọ joma kpako te ikpe udhusoi gbe ikpe (110) no. Evaọ etoke uzuazọ riẹ kpobi, ọ rọ ẹro ruẹ eware igbunu buobu nọ Jihova o ru kẹ emọ Izrẹl, te edhere igbunu nọ o ro siwi ai evaọ Abade Ọwawae na oware wọhọ ikpe udhosa nọ i kpemu. Nọ Joshua o bi roro kpahe eware igbunu nọ Ọghẹnẹ o ru kẹ ai no na, o te se “ekpako [Izrẹl], avọ iletu, te ibruoziẹ avọ ikere [rai].” (Joshua 23:2) Orọnikọ areghẹ ọkpako ọvo u dhesẹ oma via evaọ ẹme nọ ọ ta kẹ ae he, rekọ te iroro ididi erọ ohwo nọ o wo ẹrọwọ.

Joshua ọ ta nọ: “Mẹ whoma nya idhere akpọ na kpobi re no.” Ẹme nọ Joshua ọ jẹ ta na họ, “Mẹ be kẹle uwhu no.” Avro ọ riẹ hẹ, nọ Joshua ọ riẹ nọ ọ kẹle uwhu no, o te je roro kpahe eware buobu evaọ uzuazọ riẹ. Eme urere vẹ ọ gwọlọ ta kẹ ibe egegagọ riẹ?

Joshua ọ ruabọhọ ẹme riẹ inọ: “Eware iwoma kpobi nọ ỌNOWO na Ọghẹnẹ rai ọ yeya kẹ owhai na o ru rai gba re, ovo u fi rie abọ kie he.” Nọ eme ohwo nọ o fi eva kpobi họ Ọghẹnẹ. Eme ọ wha evaifihọ riẹ na ze? Nọ Joshua o roro kpahe eware kpobi nọ ọ rọ ẹro ruẹ no, o vuhumu inọ Jihova o re ru eyaa riẹ gba—ẹsikpobi. * Ẹjiroro ẹme riẹ na o re vevẹ: Joshua ọ gwọlọ nọ ibe emọ Izrẹl a fi ẹrọwọ họ eyaa kpobi nọ Jihova ọ yaa kẹ ae, e te seba erugba ha.

Obe jọ nọ a kere kpahe eme Ebaibol o ta kpahe Joshua 23:14 inọ: “Roro kpahe eyaa jọ kpobi evaọ Ebaibol na; kiẹ ikuigbe eware nọ e jọ akpọ na via vrẹ no; jẹ nọ omama kpobi evaọ eva riẹ, sọ whọ te ruẹ eyaa Ọghẹnẹ jọ nọ o rugba ha hayo nọ o thọrọ e riẹ ẹro.” O hae jọnọ a rẹ sai ru ekiakiẹ itieye na, oware ovona nọ Joshua ọ ta na ma te ruẹ—eyaa Jihova kpobi i re rugba.—1 Ivie 8:56; Aizaya 55:10, 11.

Ma rẹ jọ Ebaibol na ruẹ eyaa Ọghẹnẹ nọ i rugba no, te enọ i bi rugba nẹnẹ na nọ ma be rọ ẹro ruẹ. Ma rẹ jẹ jariẹ ruẹ eyaa iwoma nọ Jihova ọ yaa kpahe obaro na. * Kọ eme whọ gbẹ kiẹ eyaa nana riwi kẹ oma ra ha? Whọ tẹ roma totọ kiẹ Ebaibol na, o te sai mu owhẹ ẹro inọ Ọnọ o re ru eyaa riẹ gba na o te Ọnọ who re fi eva họ.

[Oruvẹ-obotọ]