Enọ I Bi Se Ebe Mai A Nọ Inọ . . .

Eme họ Ọgwa Uvie?

▪ Ọgwa Uvie yọ uwou nọ Isẹri Jihova a re jo ru iruẹru egagọ rai. Isẹri Jihova a wo Egwa Uvie buobu wariẹ akpọ na họ. Ikoko Isẹri Jihova nọ i bu vi idu udhusoi gbisoi (105,000) a be jọ egwa itieye na kuomagbe k’oka k’oka.

Ọgwa Uvie kpobi o wo oria-ẹkeria nọ a rẹ jọ gaviezọ kẹ ovuẹ je ru uwuhrẹ Ebaibol. A rẹ jariẹ wo eplatfọmo hayo ukpehru-ẹmeọta nọ ohwo o re kpohọ jọ kẹ ovuẹ. Evaọ Egwa Uvie buobu, oria-ẹkeria na o rẹ gba ahwo nọ a bu te udhusoi (100) hayo udhusoi akuasa (300). Ọgwa Uvie ọ sai je wo ibruwou efa nọ a re jo ru uwuhrẹ re, ọfisi, gbe oria nọ a re fi ebe nọ a kere no Ebaibol ze họ nọ ohwo kpobi evaọ ukoko na ọ rẹ sai kpohọ jo ru ekiakiẹ.

Dede na whọ rẹ jọ Ọgwa Uvie ruẹ iwoho gbe emema egagọ hayo oria jọ sa nọ a rehọ fihọ ọrẹri hi wọhọ epanọ a rẹ jọ iwou ichọche Kristẹndọm buobu ruẹ. A rẹ jọ Egwa Uvie ruẹ emema hayo uruwhere gbe umukpẹ-aruẹri hi. Fikieme? Isẹri Jihova a rọwo inọ eware itieye na e wọso uzi Ebaibol na nọ o ta nọ: “Wha siọ edhegọ ba.” (1 Ahwo Kọrint 10:14; Jọn 4:24) Ichọche gbe eria egagọ buobu e vọ avọ onaa gbe ekwakwa nọ a rọ whẹ erru họ ae. Wo ohẹriẹ, a bọ Egwa Uvie mai kpatiẹ epanọ a sae rọ jarai ru ẹjiroro nọ a rọ bọ ae. Uwuhrẹ Ebaibol nọ a rẹ jarai ru họ ugogo oware nọ o mai wuzou, orọnikọ epanọ iwou na e rro te hayo wo erru te he.

Fikieme a bi ro se iwou na Egwa Uvie? Ugogo oware nọ Isẹri Jihova a re ru nọ a te kuomagbe evaọ Ọgwa Uvie họ, ewuhrẹ Ebaibol na gbe ovuẹ orọ “uvie Ọghẹnẹ” onọ o rrọ ugogo uzoẹme Ebaibol na, nọ o jọ uzoẹme odibọgba Jesu. (Luk 4:43) Fikiere, odẹ na Ọgwa Uvie, onọ a bi ro se uwou egagọ na anwọ ikpe ọ 1930 ze na o nwani dhesẹ ẹjiroro nọ a rọ bọe—ẹwhaharo egagọ uzẹme gbe ewhowho “ovuẹ usiuwoma uvie na.” (Matiu 24:14) Fikiere Egwa Uvie na e rrọ eria omakugbe otu gheghe hayo iruẹru ekiọthuọ họ. Igho unevaze a bi ro ru ebabọ gbe ẹruorote Egwa Uvie gbe eware nọ a rrọ etẹe ru. A rẹ jọ etẹe ghoro umudo vievie he. Ukpoye, a re fi ẹkpẹti unevaze họ oria jọ nọ ohwo nọ ọ gwọlọ ru unevaze o re fi ugho họ.

Dedenọ a bọ rai oghoghẹrẹ yọ ejọ e rẹ sae rro vi ejọ, ẹjiroro ọvona Egwa Uvie wariẹ akpọ na họ i bi rugba. Eware nọ i re dhesẹ oghẹrẹ Ọgwa Uvie nọ a rẹ bọ fihọ oria họ, eware ebabọ nọ a rẹ sae jọ ẹkwotọ na ruẹ, oghẹrẹ nọ ẹkwotọ na o re dhẹ hayo rroro te, gbe epanọ Isẹri Jihova erọ ẹkwotọ na a wo obọ te. A rẹ rọ ibriki, ire, hayo itho bọ ejọ. Efa jọ yọ iwou nọ a rọ ire thihi jẹ rọ ebiesa hwa ehru rai ababọ igbẹhẹ nọ a bọ fihọ ae.

Ma re dede ohwo kpobi rehọ ziọ iwuhrẹ evaọ Ọgwa Uvie kpobi. (Ahwo Hibru 10:25) A rẹ kẹ ovuẹ ogbotu k’oka k’oka, onọ o rẹ jọ uzoẹme uwuhrẹ nọ a rehọ no Ebaibol ze nọ o rẹ jọ erere kẹ ahwo ukoko na gbe amọfa nọ a nyaze. Kọ whọ gbẹ dai weze kpohọ Ọgwa Uvie nọ ọ rrọ okegbe ra?

[Uwoho nọ o rrọ ẹwẹ-obe avọ 10]

Malawi, Africa

[Iwoho nọ e rrọ ẹwẹ-obe avọ 10]

England, Great Britain