Kọ Oware O rẹ Da Ọghẹnẹ?
Si Kẹle Ọghẹnẹ
Kọ Oware O rẹ Da Ọghẹnẹ?
MAI ahwo-akpọ nọ a gba ha, ma rẹ vioja owojẹ mai ẹsejọ. Wọhọ oriruo, o rẹ sae da omai nọ ma te vuhumu nọ oware jọ nọ ma ru o thọ. U gbunu gaga inọ Ebaibol na i dhesẹ nọ oware o rẹ da Jihova. Whọ sae jọ udu ra ta nọ: ‘Rekọ Ọghẹnẹ ọ gba re, oware ovo o rẹ thọe obọ họ!’ Nọ o rrọ ere na, edhere vẹ oware o sae rọ dae? Uyo onọ nana o rẹ sai fi obọ họ kẹ omai wo otoriẹ uzẹme jọ nọ u gbunu gaga: Oware u re duobọte Jihova udu, yọ owọjẹ mai o rẹ sae dae hayo kẹe evawere. Roro kpahe eme nọ e rrọ Ibruoziẹ 2:11-18.
Obe Ibruoziẹ evaọ Ebaibol na o ta kpahe etoke obẹbẹ jọ evaọ ikuigbe orẹwho Izrẹl. Orẹwho Izrẹl o ruọ Kenan no, ẹkwotọ nọ Ọghẹnẹ ọ ya eyaa riẹ kẹ Abraham. Evaọ ikpe buobu nọ i lele i rie, uzuazọ orẹwho Izrẹl u te zihe ruọ onọ a rẹ sae rọ idhere ene dhesẹ: uzou-uveghe, okienyẹ, ubo-ayare, gbe esiwo. *
Uzou-Uveghe. Usu okpekpe nọ a wo kugbe ahwo Kenan o lẹliẹ orẹwho Izrẹl “se ỌNOWO na,” a tẹ jẹ gọ edhọ erẹwho efa; a tubẹ “gọ Ebale jegbe Ashtarọt.” * Aghẹmeeyo otiọye na o dhesẹ nọ a siọ Jihova. Agbẹta nọ onana u ro “ru Ọghẹnẹ eva dha” na, ọnọ o siwi rai no igbo Ijipti!—Owọ avọ 11-13; Ibruoziẹ 2:1.
Okienyẹ. Avọ evedha inọ ahwo riẹ a bi kiuke ku ei, Jihova ọ vẹ siọ ae ba ẹthọ. “Ewegrẹ” Izrẹl a ve fi ai kparobọ, jẹ rọ ogaga mi ae eware rai.—Owọ avọ 14.
Ubo-Ayare. Nọ oja na u je ti te ai uvo no, emọ Izrẹl a ve kurẹriẹ no uruemu uyoma rai, a ve bo bru Ọghẹnẹ kẹ obufihọ. Ẹme wọhọ, “a be viẹ, fiki ahwo nọ a bi kpokpo ai,” o rẹ sai dhesẹ ubo-ayare nọ a je bo se Ọghẹnẹ. (Owọ avọ 18) Enẹ ahwo Izrẹl a jẹ hai dhe erueru nọ a te ru Ọghẹnẹ thọ no. (Ibruoziẹ 3:9, 15; 4:3; 6:6, 7; 10:10) Eme Ọghẹnẹ ọ jẹ hai ru?
Esiwo. Jihova ọ vẹ gaviezọ kẹ oviẹ ahwo Izrẹl, jẹ ‘re ohrọ rai’ keme oja nọ a jẹ re o jẹ dae. Ubiẹme Hibru nọ a fa “ohrọ” na o rẹ sai dhesẹ epanọ oware o rẹ da ohwo, o vẹ wọe “nwene iroro hayo owojẹ riẹ.” Obe jọ o ta nọ: “Oviẹ rai o wọ Jihova nwene iroro kpahe uye nọ ọ kuvẹ re u te ai, o ve siwi ai.” Fiki ohrọ, Jihova ọ vẹ rehọ “ibruoziẹ mu kẹ ae,” enọ i re siwi ai no obọ ewegrẹ rai.—Owọ avọ 18.
Kọ who muẹrohọ oware nọ o jẹ wọ Ọghẹnẹ re ohrọ hayo nwene iroro riẹ? Ekurẹriẹ hayo obusino uruemu uyoma rai. Wọhọ oriruo: Ọsẹ oyoyou ọ rẹ sae whọku ọmọ riẹ nọ o bi veghe uzou, ẹsejọhọ whaha iẹe oware jọ nọ o rẹ were iẹe. Rekọ nọ ọ tẹ ruẹ nọ ọmọ na o gine kurẹriẹ, ọ sae dobọ uye nọ ọ be kẹe na ji.
Eme ma jọ ikuigbe nana wuhrẹ kpahe Jihova? Inọ ahwo a te bi keke aro fihọ raha izi riẹ, u re ru eva dhae, rekọ ọ rẹ re ohrọ ahwo nọ a kurẹriẹ. Fikiere, ẹriẹ inọ oware nọ ma ru o rẹ sai ru eva were Ọghẹnẹ hayo ru eva dhae o rẹ lẹliẹ omai roro te re ma tẹ jowọ. Kọ who gbe wuhrẹ epanọ whọ sai ro ru “eva were” Jihova? (Itẹ 27:11) Whọ te vioja riẹ vievie he.
[Oruvẹ-obotọ]
^ edhe-ẹme 5 Ibruoziẹ 2:11-18 yọ abọjọ ọrọ ọdhẹduwu ikuigbe oghẹrẹ uzuazọ nọ orẹwho Izrẹl u je yeri, yọ a jọ izou nọ i lele i rie roma totọ gbiku eware nọ e via.
^ edhe-ẹme 6 Ebale họ ẹdhọ nọ ahwo Kenan a jẹ mae kẹ ọghọ, yọ a rehọ Ashtarọt, ẹdhọ-aye na, wọhọ aye Ebale.