Oware Nọ Ma Wuhrẹ Mi Jesu

Kpahe Egagọ Uzẹme

Kọ Egagọ Kpobi Ọghẹnẹ Ọ Jẹrehọ?

▪ Jesu ọ re ohrọ ahwo nọ egagọ erue e viẹhọ. Ọ kẹ unuovẹvẹ kpahe “eruẹaro erue, e nọ e rẹ gọ ẹgọ iwu igodẹ . . . rekọ eva rai erao ijihẹ.” (Matiu 7:15) Kọ who muẹrohọ no inọ ahwo jọ a be rọ egagọ wha iruẹru iyoma rai haro?

Jesu ọ ta kẹ Ọghẹnẹ evaọ olẹ nọ: “Ẹme ra uzẹme.” (Jọn 17:17) Ẹhẹ, Ọghẹnẹ ọ rẹ siọ egagọ nọ iwuhrẹ rai e wọso uzẹme Ebaibol na. Fikiere, Jesu ọ wariẹ ẹme Ọghẹnẹ nana kẹ otu-egagọ eviẹhọ jọ inọ: “A be gọ omẹ gheghe, uwuhrẹ rai epa orọ ijaje ahwo.”—Matiu 15:9.

Kọ u wo ugogo egagọ jọ nọ e rrọ orọ uzẹme?

▪ Nọ Jesu ọ nyaku aye jọ evaọ Sameria, ọnọ egagọ erue e viẹhọ no, ọ ta kẹe nọ: ‘Wha be gọ ọnọ wha riẹ hẹ . . . Enọ e rẹ ghinẹ gọ Ọsẹ na, a rẹ te rehọ ẹzi gbe uzẹme gọ Ọsẹ na; keme itieye Ọsẹ na ọ guọlọ nọ e rẹ gọe.’ (Jọn 4:22, 23) U re vevẹ, a rẹ sai duku egagọ uzẹme.

Jesu ọ ta nọ: “Mẹ be rọ oma obọ mẹ ru oware ovo ho, rekọ epanọ Ọsẹ o wuhrẹ omẹ, mẹ rọ ta eme eware enana.” Ẹhẹ, Jesu ọ riẹ inọ egagọ nọ o bi wuhrẹ amọfa kpahe na ọvo họ erọ uzẹme. (Jọn 8:28) Fikiere ọ ta nọ: “Mẹ họ edhere na, gbe uzẹme, gbe uzuazọ; ohwo ọvo o [re] bru Ọsẹ na ze he, rekọ fiki mẹ.” (Jọn 14:6) Nọ o rọnọ edhere ọvo uvi eg’Ọghẹnẹ a rẹ rọ nya bru Ọsẹ na, o gbahọ nọ a rẹ jọ okugbe evaọ egagọ uzẹme ọvo.

 Ẹvẹ whọ sai ro vuhu eg’Ọghẹnẹ uzẹme?

▪ Ohwo nọ o bi lele Jesu Kristi họ Oleleikristi. Roro kpahe idhere ene jọ nọ uvi ilele Jesu a rẹ rọ raro kele iei, onọ ahwo a sai ro vuhu ai.

1. Jesu Kristi ọ ta kẹ Jihova evaọ olẹ nọ: “Me dhesẹ odẹ ra kẹ ae.” (Jọn 17:26) Ileleikristi uzẹme a re ru epọvo na re.

2. Jesu ọ ta usiuwoma Uvie Jihova, o te je vi ilele riẹ nọ a ru epọvo na re no uwou ruọ uwou. Ọ ta nọ: “Kẹwho kẹwho hayo kiwhre kiwhre nọ wha rẹ te rua, wha guọlọ ohwo eva riẹ nọ o te.” Ọ ta kẹ ilele riẹ uwhremu na nọ: “Wha wuhrẹ ahwo erẹwho kpobi.” (Matiu 10:7, 11; 28:19) Ileleikristi uzẹme a rẹ bẹ evuhu nẹnẹ hẹ keme a bi ru iruo evona.

3. Jesu o dhomahọ esuo akpọ na ha. Fikiere ọ ta kpahe ilele riẹ nọ: “A rọ e rọ akpọ na ha, wọhọ epanọ mẹ rọ ọ rọ akpọ na ha.” (Jọn 17:14) Eg’Ọghẹnẹ uzẹme a rẹ jọ abọ ọvuọvo ho evaọ isuẹsu.

4. Jesu o wo uyoyou omolahiẹ kẹ amọfa. Ọ ta nọ: “Onana ahwo kpobi a jẹ riẹ nọ whai ilele mẹ re whai ohwo o te you ohwo.” (Jọn 13:35) Ileleikristi uzẹme a re you ohwohwo, yọ a re wobọ evaọ ẹmo ho.

Ẹvẹ egagọ uzẹme e sae rọ kẹ owhẹ erere?

▪ Re whọ sae jọ egagọ uzẹme, o gwọlọ nọ whọ rẹ kake riẹ Jihova ziezi. Eriariẹ Ọghẹnẹ i ti fi obọ họ kẹ owhẹ yeri uzuazọ nọ o mai woma kpaobọ, jẹ lẹliẹ owhẹ you Ọghẹnẹ ziezi. Jihova ọ ya eyaa uzuazọ ebẹdẹ bẹdẹ kẹ ahwo nọ a you rie. Oyejabọ nọ Jesu ọ rọ ta nọ: “Onana họ uzuazọ ebẹdẹ bẹdẹ, re a riẹ owhẹ nọ whẹ ọvo họ uvi Ọghẹnẹ.”—Jọn 17:3.

Rọkẹ evuẹ efa, rri uzou avọ 15 evaọ obe nana, Eme Ebaibol Na O Gine Wuhrẹ? onọ Isẹri Jihova a kere.

[Uwoho nọ o rrọ ẹwẹ-obe avọ 16]

“Wha sẹro oma rai obọ eruẹaro erue, e nọ e rẹ gọ ẹgọ iwu igodẹ bru owhai tha rekọ eva rai erao ijihẹ.”—Matiu 7:15