Ẹta Evẹravẹrẹ Kọ Obọ Ọghẹnẹ U No ze?

DEVON ọ ta nọ: “Oware na u bi gbomẹ unu, evaọ ichọche nọ me bi kpohọ, koka koka o wọhọ nọ ẹzi ẹri ọ be hai te ahwo buobu obọ a vẹ be jẹ evẹravẹrẹ. Ejọ rai a bi yeri uzuazọ ọfariẹ. Whaọ, mẹ be daoma lele izi Ọghẹnẹ. Rekọ ghelọ epanọ mẹ lẹ kẹ ẹzi ẹri te, okẹ ẹzi na u bi te omẹ obọ vievie he. Fikieme mẹ gbẹ be sai wo okẹ ẹzi ẹri na ha?”

Epọvo na re, Gabriel o bi kpohọ ichọche nọ o wọhọ nọ ẹzi ẹri o bi jo te ahwo obọ nọ a be rọ jẹ evẹravẹrẹ. Gabriel ọ ta nọ: “Oware nọ o be mae kẹ omẹ uye họ, nọ mẹ tẹ be lẹ, edo ọgaga eme amọfa nọ uvumọ ohwo o bi wo otoriẹ rai hi i re ru iroro mẹ reghe no olẹ mẹ. Uvumọ ohwo o bi wo erere no eme nana ze he. Kọ o tẹ make kawo, ahwo a gbe wo erere jọ no okẹ ẹzi ọfuafo Ọghẹnẹ ze?”

Eware nọ Devon avọ Gabriel a muẹrohọ na e kpare uvi onọ jọ ze, Kọ obọ Ọghẹnẹ evẹravẹrẹ nọ a be jẹ evaọ ichọche nẹnẹ na u gine no ze? Re ma ruẹse kẹ uyo onọ nana, oware jọ nọ u ti fi obọ họ kẹ omai họ ẹkiẹriwi okẹ evẹravẹrẹ nọ u te Ileleikristi ikpe-udhusoi ọsosuọ obọ.

“Koyehọ Amu Evẹravẹrẹ Efa họ Ẹjẹ”

Ma rẹ jọ Ebaibol na se kpahe ezae gbe eyae jọ nọ a kẹ ẹgba nọ a jẹ rọ ta evẹravẹrẹ nọ a riẹ ẹta vẹre he. Orọ ọsosuọ nọ onana o rọ roma via o jọ ẹdẹ Pẹntikọst 33 C.E., umutho eka jọ nọ Jesu Kristi o whu no. Ẹdẹ yena, evaọ Jerusalẹm, “Ẹzi Ẹri ọ tẹ te vọ [ilele udhozeza Jesu] oma, koyehọ amu evẹravẹrẹ efa họ ẹjẹ.” Akpọ o gbe erara nọ i no erẹwho efa ze unu, “fiki epanọ ai kohwo kohwo o bi ro yo ẹvẹrẹ obọ riẹ.”—Iruẹru Ikọ Na 1:15; 2:1-6.

Ebaibol na e ta kpahe ilele Jesu efa evaọ ikpe-udhusoi ọsosuọ na nọ i wo okẹ nana. Wọhọ oriruo, fiki ẹgba nọ ẹzi ọfuafo na ọ kẹ Pọl ukọ na, ọ jẹ ta evẹravẹrẹ. (Iruẹru Ikọ Na 19:6; 1 Ahwo Kọrint 12:10, 28; 14:18) Rekọ u fo nọ okẹ ẹzi ọfuafo Ọghẹnẹ utioye u re wo uvi ẹjiroro. Kọ ẹjiroro vẹ evẹravẹrẹ nọ a jẹ ta evaọ oke ikọ na u ru gba?

Imuẹro Uketha Ọghẹnẹ

Nọ o je kere se Ileleikristi nọ e jọ Kọrint, nọ u muẹro nọ ejọ rai a jẹ ta evẹravẹrẹ, Pọl ukọ na o ru rie vẹ inọ “evẹrẹ . . . e rọ eka rọkẹ otu nọ e rọ ababọ ẹrọwọ.”  (1 Ahwo Kọrint 14:22) Fikiere, okẹ evẹravẹrẹ gbe ekẹ igbunu efa e jọ eka kẹ ahwo otafe inọ ukoko Ileleikristi nọ o tohọ obọ na u wo ọjẹrehọ avọ uketha Ọghẹnẹ. Ekẹ igbunu ẹzi na e jọ wọhọ esaebọdo nọ a kere odẹ iyẹrẹ fihọ nọ u re fi obọ họ kẹ ahwo nọ e jẹ gwọlọ uzẹme na ruẹ ahwo nọ Ọghẹnẹ ọ jẹrehọ.

O rrọ oware nọ a muẹrohọ inọ Ebaibol na e ta ha inọ Jesu hayo eruẹaro nọ e jọ taure oke Ileleikristi u te ti te a ta evẹravẹrẹ evaọ edhere igbunu. Fikiere, u muẹro inọ okẹ evẹravẹrẹ nọ a kẹ ilele Jesu na u wo ẹjiroro ọfa jọ re.

U Fi Obọ họ Evaọ Ẹvaha Emamọ Usi Na

Evaọ emuhọ odibọgba riẹ, Jesu ọ ta kẹ ilele riẹ inọ a whowho emamọ usi Uvie Ọghẹnẹ na kẹ ahwo Ju ọvo. (Matiu 10:6; 15:24) Fikiere, ọthobọ gheghe ilele na a rọ ta usiuwoma ruọ ekwotọ efa. Rekọ u kri hi re oyena u te ti nwene.

Nọ o whu jẹ kparoma ze no evaọ ukpe 33 C.E., Jesu o te jie uzi kẹ ilele riẹ inọ a nyai “wuhrẹ ahwo erẹwho kpobi.” Ọ tẹ jẹ vuẹ ilele riẹ inọ a rẹ te jọ isẹri riẹ “rite ọnyaba akpọ na.” (Matiu 28:19; Iruẹru Ikọ Na 1:8) Re a ruẹse vaha emamọ usi na kẹre tere, o gwọlọ nọ a rẹ jẹ evẹrẹ efa u te no ẹvẹrẹ Hibru no.

Whaọ ibuobu ilele ọsosuọ yena a jọ ahwo nọ “a wuhrẹ hẹ,” nọ a kpohọ isukulu tere he. (Iruẹru Ikọ Na 4:13) Kọ ẹvẹ a te sae rọ ta usiuwoma na evaọ erẹwho ugbothabọ nọ a be jọ jẹ evẹrẹ nọ a ri yo kpahe ẹdẹvo ho kabikọ ẹta dede? Ẹzi ọfuafo na ọ kẹ otujọ evaọ usu ilele ajọwha yena ẹgba igbunu nọ a jẹ rọ ta usiuwoma na evaọ evẹrẹ nọ a wuhrẹ ẹdẹvo ho.

Fikiere, okẹ igbunu orọ evẹravẹrẹ na u ru ẹjiroro ivẹ gba. Orọ ọsosuọ, o jọ oka nọ o kẹ imuẹro uketha Ọghẹnẹ. Orọ avivẹ, u fi obọ họ kẹ Ileleikristi ikpe-udhusoi ọsosuọ ta usiuwoma na kẹ ahwo evẹrẹ buobu. Kọ evẹravẹrẹ nọ a be ta evaọ ichọche buobu nẹnẹ na u bi ru ẹjiroro ivẹ nana gba?

Kọ Evẹravẹrẹ Eta Nẹnẹ Yọ Oka Imuẹro Uketha Ọghẹnẹ?

Whọ tẹ gwọlọ fi oka họ oria nọ u re fi obọ họ kẹ ahwo buobu evaọ okegbe ra riẹ kpahe oware jọ, diẹse who re fi ei fihọ? Kọ eva umuwou osese jọ? Kakaka! Ikuigbe oware nọ o via evaọ ẹdẹ Pẹntikọst na e ta inọ ahwo buobu nọ a jẹ nya vrẹ a ruẹ oka orọ okẹ igbunu evẹravẹrẹ nọ ilele na a jẹ ta. Ẹhẹ, fiki onana “ahwo nọ a kuomagbe [ukoko Ileleikristi na] ẹdẹọyena a te idu ahwo esa.” (Iruẹru Ikọ Na 2:5, 6, 41) Nọ ahwo a tẹ ta nẹnẹ inọ a wo okẹ evẹravẹrẹ, nọ a jẹ be jẹ evẹravẹrẹ evaọ uwou ichọche, ẹvẹ onana o sae rọ jọ oka ẹgbede kẹ ogbotu ahwo nọ a riẹ Ọghẹnẹ hẹ?

Ebaibol na e fodẹ igberẹ-ibro gbe “iruo uwo” efa wọhọ eware nọ e wọso ẹzi ọfuafo na, i te je fibae nọ “enọ ibi ru eware nana a rẹ sai reuku uvie Ọghẹnẹ hẹ.” (Ahwo Galesha 5:17-21) Whọ tẹ ruẹ ahwo nọ uruemu rai o fo ho nọ a be jẹ evẹravẹrẹ, whọ rẹ sae nọ omara nọ, ‘Kọ onana u gbe fo avro, tube ru edhere Ọghẹnẹ bada ahwo aro dede, otẹrọnọ Ọghẹnẹ ọ rẹ rehọ ẹzi ọfuafo riẹ kẹ ahwo nọ a bi ru eware nọ e wọso izi Ebaibol?’ Oyena o rẹ wọhọ ẹsenọ a fi oka othọthọ họ edhere nọ u re ru edhere bada ahwo aro.

Kọ Evẹravẹrẹ Eta Nẹnẹ Yọ Edhere nọ A be Rọ Vaha Emamọ Usi Na?

Kọ ẹvẹ kpahe ẹjiroro avivẹ nọ okẹ evẹravẹrẹ eta u rugba evaọ ikpe-udhusoi ọsosuọ na? Kọ evẹravẹrẹ nọ a be jọ ichọche jẹ nẹnẹ na yọ edhere nọ a be rọ ta usiuwoma na kẹ ahwo evẹrẹ sa-sa? Kareghẹhọ inọ ahwo nọ a nyaze Jerusalẹm evaọ ẹdẹ Pẹntikọst 33 C.E. na a no eria sa-sa ze, yọ a wo otoriẹ evẹrẹ nọ ilele na a jẹ rọ edhere igbunu jẹ na. Wo ohẹriẹ, ahwo nọ a be jẹ  evẹravẹrẹ nẹnẹ, a be hae jẹ evẹrẹ nọ uvumọ ohwo ọ rẹ sai wo otoriẹ rai hi.

O rrọ vevẹ, evẹravẹrẹ nọ ahwo a be jẹ nẹnẹ i wo ohẹriẹ gaga no okẹ ẹzi ọfuafo nọ u te ilele Jesu obọ evaọ ikpe-udhusoi ọsosuọ. Evaọ uzẹme, imuẹro evuevo e riẹ hẹ inọ okẹ ẹzi ọfuafo orọ evẹravẹrẹ eta oyena nọ u te ikọ na obọ evaọ ikpe-udhusoi ọsosuọ na u te omọfa jọ obọ no anwẹnọ ikọ na a ro whu no. Onana u re gbe ahwo nọ a bi se Ebaibol na unu hu. Pọl ukọ na nọ a kẹ ẹgba ẹzi ọfuafo na o kere kpahe ekẹ iruo igbunu, onọ o kẹre te okẹ evẹravẹrẹ eta inọ: “I reti serihọ.” (1 Ahwo Kọrint 13:8) Rekọ ẹvẹ a sae rọ riẹ ahwo nọ a wo ẹzi ọfuafo na nẹnẹ?

Amono A be Kẹ Imuẹro Inọ A Wo Ẹzi Ọfuafo Na?

Jesu ọ riẹ vevẹ nọ okẹ evẹravẹrẹ eta u ti serihọ nọ ukoko Ileleikristi na o tẹ d’owọ muotọ no. Taure ọ tẹ nwane whu, Jesu ọ fodẹ oka nọ o rẹ te jọ ribri nọ a ti ro vuhu ilele uzẹme riẹ. Ọ ta nọ: “Onana ahwo kpobi a jẹ riẹ nọ whai ilele mẹ re whai ohwo o te you ohwo.” (Jọn 13:35) Ẹhẹ, evaọ owọ ikere nọ Ebaibol na e jọ ta nọ ekẹ iruo igbunu i ti serihọ na, etẹe ọvona ọ ta nọ: “Uyoyou u re re he,” koyehọ u re serihọ họ.—1 Ahwo Kọrint 13:8.

Uyoyou họ orọ ọsosuọ evaọ usu eware izii nọ i ru “ubi” ẹzi ọfuafo Ọghẹnẹ via. (Ahwo Galesha 5:22, 23) Fikiere ahwo nọ a gine wo ẹzi ọfuafo Ọghẹnẹ—nọ i wo uketha Ọghẹnẹ—a re wo uvi uyoyou kẹ ohwohwo. U te no ere no, udhedhẹ họ okwakwa avesa nọ u ru ubi ẹzi ọfuafo na via. Fikiere, ahwo nọ a wo ẹzi ọfuafo na nẹnẹ a re le udhedhẹ, a rẹ daoma whaha iruemu wọhọ omagbẹre, omohẹriẹ-uyẹ, gbe ozighi.

Ofariẹ, kareghẹhọ eruẹaruẹ Jesu nọ a kere fihọ obe Iruẹru Ikọ Na 1:8. Jesu ọ ta nọ ilele riẹ a ti wo ogaga nọ a ti ro se isẹri riẹ “rite ọnyaba akpọ na.” Jesu ọ ta re inọ iruo nana e te nyaharo rite “urere akpọ na.” (Matiu 28:20) Fikiere, iruo usiuwoma ota akpọ-soso nana e te jọ oka nọ a re ro vuhu ahwo nọ a gine wo okẹ ẹzi ọfuafo na.

Ẹvẹ who roro? Utu ahwo vẹ whọ be jọ oma rai ruẹ imuẹro ẹzi ọfuafo na nẹnẹ? Amono a bi dhesẹ ubi ẹzi na via, maero kọ uyoyou gbe udhedhẹ wariẹ akpọ na họ, te epanọ egọmeti ọ be rọ kẹ ai uye fikinọ a se inọ a rẹ wọ uresa ha? (Aizaya 2:4) Amono a be daoma whaha iruo uwo wọhọ igberẹ-ibro, nọ a re tube si ahwo nọ a bi ru iruemu itieye na nọ e rọwo kurẹriẹ hẹ no udevie rai? (1 Ahwo Kọrint 5:11-13) Amono a be jọ akpọ na soso ta usiuwoma inọ Uvie Ọghẹnẹ họ ẹruore ọvo nọ ọ rrọ kẹ ahwo-akpọ kpobi?—Matiu 24:14.

Ahwo nọ a kere emagazini nana a re dhizu hu re a tẹ ta nọ Isẹri Jihova a fo udhesẹ Ebaibol orọ ahwo nọ a wo ẹzi ọfuafo na. Kọ whọ gbẹ daoma riẹ ae ziezi re whọ ruẹ sọ a gine wo uketha Ọghẹnẹ?