Hai Dhesẹ Edẹro
Oware Udidi Avọ 3
Hai Dhesẹ Edẹro
EME EBAIBOL NA O WUHRẸ? “Wha kẹ [uyere] eva eware kpobi.”—1 Ahwo Tẹsalonika 5:18.
USE-ABỌ VẸ O RIẸ? Ma be rria udevie ahwo nọ a wo omovia jẹ kare uyere, yọ a rẹ sae whẹ iruemu itienana họ omai. (2 Timoti 3:1, 2) U te no ere no, ma rẹ sae rabọ si eware efa ba iruẹru ikẹdẹ nọ e da omai abọ fia no vẹre. Ebẹbẹ hayo ilale omobọ mai e rẹ sai sinẹ omai te epanọ ma gbẹ sae ruẹ uvẹ dhesẹ edẹro kẹ eware nọ ma wo no hayo yere amọfa kẹ eware nọ a ru kẹ omai hi.
EME WHỌ RẸ SAI RU? Ẹsejọ, hae roma totọ roro kpahe emamọ eware nọ whọ be reawere rai enẹna. Uzẹme, ebẹbẹ e rẹ sae lẹliẹ udu whrehe owhẹ. Rekọ roro kpahe oriruo Devidi ovie na. Evaọ ẹsejọ ebẹbẹ e kẹ riẹ elọhoma, te epanọ udu o gbẹ rọ jariẹ awọ họ. O make jọ ere na, ọ lẹ se Ọghẹnẹ inọ: “Me . . . roro eware no who ru no; me te wo awere kẹ iruo nọ abọ ra o ru.” (Olezi 143:3-5) Ghelọ ebẹbẹ nọ ọ rọ ẹro ruẹ, Devidi ọ kẹ Ọghẹnẹ uyere je wo edẹro evaọ uzuazọ.
Roro kpahe eware nọ amọfa a ru ro fi obọ họ kẹ owhẹ no, re who yere ai kẹ oyena. Jesu o fi oriruo ologbo họ otọ evaọ abọ nana. Wọhọ oriruo, okenọ Meri ogbẹnyusu riẹ o ku udẹ oghaghae ku uzou gbe awọ Jesu, ahwo jọ a nọ inọ: “Fikieme a jẹ be raha udẹ onana?” * Ahwo nọ a ta oyena a rehọ e riẹ inọ o hẹ mai woma re a zẹ udẹ na, jẹ rehọ igho na kẹ iyogbere. Jesu ọ kpahe kẹ ae nọ: “Wha vu ei wa; eme wha jẹ be lahiẹe?” Kẹsena, o te fibae nọ: “O ru onọ ọ sai ruẹ.” (Mak 14:3-8; Jọn 12:3) Ukpenọ Jesu ọ tẹrovi oware nọ Meri o ru hu, o dhesẹ edẹro kẹ onọ o ru.
Nọ uwhu u te kpe ohwo uviuwou hayo ogbẹnyusu ahwo jọ hayo nọ usu rai o tẹ fa, hayo nọ oware jọ nọ a wo u te vru mi ae, ẹsiẹe a rẹ rọ riẹ aghare rai. Whọ rẹ sae whaha oja-oviẹ utioye na ẹkwoma eroro kpahe emamọ eware nọ whọ be reawere rai enẹna! Kọ u gbe woma re who roro kpahe hayo kere eware iwoma nọ whọ be rọ fiki rai yere Ọghẹnẹ fihotọ?
Nọ orọnọ obọ Ọghẹnẹ ‘okẹ uwoma kpobi’ u re no ze na, u fo re ma hae jọ olẹ yere iei kẹ onana. (Jemis 1:17) Ma tẹ be hai ru ere ẹsikpobi, u re fi obọ họ kẹ omai wo ẹzi edẹro.—Ahwo Filipai 4:6, 7.
[Oruvẹ-obotọ]
^ edhe-ẹme 6 Evaọ etoke ikpe-udhusoi ọsosuọ, udẹ nọ a re ku họ uzou ọrara o jọ oka odederehọ; re a ku udẹ họ awọ ọrara yọ oka omaurokpotọ nọ a dhesẹ kẹe.
[Uwoho nọ o rrọ ẹwẹ-obe avọ 6]
Kọ whọ be hai yere amọfa kẹ eware nọ a ru kẹ owhẹ?