Enọ I Bi Se Ebe Mai A Nọ Inọ . . .

Kọ Isẹri Jihova A re Ru Usiwo Igbunu?

▪ Isẹri Jihova a ri ti ru usiwo igbunu ẹdẹvo ho. Wọhọ Jesu, a rehọ e riẹ inọ ugogo iruo rai họ re a ta usiuwoma Uvie Ọghẹnẹ. Yọ a rọwo inọ orọnikọ usiwo igbunu a re ro vuhu Ileleikristi uzẹme he, rekọ oware jọ nọ u wuzou viere.

Uzẹme, usiwo igbunu nọ ohrọ-oriọ o wọ Jesu Kristi ru evaọ ikpe-udhusoi ọsosuọ na u wuzou gaga kẹ omai kpobi. Ọ rọ ere kẹ imuẹro inọ evaọ otọ esuo riẹ wọhọ Ovie Uvie Ọghẹnẹ, “ohwo ọvo nọ ọ be ria eva riẹ nọ ọ rẹte ta no, ‘Mẹ be mọ,’ ọ rọ họ.”—Aizaya 33:24.

Kọ ẹvẹ kpahe inẹnẹ? Otu Kristẹndọm gbe ahwo egagọ efa jọ a rẹ ta inọ a wo ogaga nọ a bi ro ru usiwo igbunu. Rekọ Jesu ọ kẹ unuovẹvẹ ogaga kpahe ahwo nọ a rẹ te ta kẹe inọ a rehọ odẹ riẹ “ru iruo ilogbo buobu.” Ọ te ta kẹ ae nọ: “Mẹ riẹ owhai vievie he; wha nya no omẹ no, whai irumuomu.” (Matiu 7:22, 23) Kọ ahwo nọ a be ta nẹnẹ inọ a bi ru usiwo igbunu a gine wo ọjẹrehọ hayo uketha Ọghẹnẹ?

Roro kpahe oware nọ Ebaibol na e ta kpahe usiwo igbunu nọ Jesu o ru. Nọ ma tẹ rehọ usiwo igbunu nọ Jesu o ru rọ wawọ erọ ahwo nọ a be ta inọ a wo ogaga usiwo igbunu nẹnẹ, ma rẹ sae riẹ sọ obọ Ọghẹnẹ i no ze.

Jesu ọ rehọ usiwo igbunu ruiruo wọhọ oware nọ o re ro se ilele hayo ogbotu lele oma ha. Iruo igbunu buobu nọ o ru e jọ erọ ẹgbede he. Ẹsibuobu ọ jẹ hae vuẹ ahwo nọ o siwi inọ a ta kẹ uvumọ ohwo ho.—Luk 5:13, 14.

Jesu o mi ugho vievie he rọkẹ usiwo igbunu nọ o ru. (Matiu 10:8) Yọ ẹyao ọvo ọ bẹ riẹ esiwo ho. O siwi ahwo kpobi nọ e jẹ mọ nọ a bru rie ze, yọ orọnọ ẹrọwọ ahwo na u ru nọ Jesu ọ sai ro siwi ai hi. (Luk 6:19; Jọn 5:5-9, 13) Ẹhẹ, Jesu ọ kpare ahwo nọ a whu dede!—Luk 7:11-17; 8:40-56; Jọn 11:38-44.

Dede nọ Jesu o ru iruo igbunu yena, orọnikọ ẹjiroro riẹ họ re o ru urirẹ mu ahwo re a rọ ere su lele iei hi. Ukpoye, ugogo iruo nọ ọ rọ karo họ ewhowho emamọ usi Uvie Ọghẹnẹ. Jesu o wuhrẹ ilele riẹ re a jọ iru-ilele, enọ i re wuhrẹ amọfa kpahe ẹruore ọrọ ewo omokpokpọ ogbagba evaọ otọ esuo Uvie Ọghẹnẹ.—Matiu 28:19, 20.

Uzẹme, ilele Jesu jọ evaọ ikpe-udhusoi ọsosuọ a wo okẹ usiwo igbunu, rekọ Ebaibol e ta nọ okẹ nana u ti serihọ nọ oke jọ o tẹ vrẹ no. (1 Ahwo Kọrint 12:29, 30; 13:8, 13) Uyoyou omolahiẹ kẹ ohwohwo a re ro vuhu Ileleikristi uzẹme nẹnẹ, orọnikọ usiwo igbunu hu. (Jọn 13:35) Usiwo igbunu inẹnẹ o re te sai ru ahwo wo uvi okugbe Ileleikristi nọ i wo uyoyou utioye he evaọ udevie ahwo uyẹ gbe uyero sa-sa.

Dede na, utu Ileleikristi jọ o riẹ nọ uyoyou ogaga o whẹ kugbe, uyoyou nọ o ga te epanọ a rẹ rọ se inọ a rẹ nwa ohwohwo hayo amọfa dede oma ha—makọ evaọ etoke ẹmo. Utu ahwo vẹ oye? Isẹri Jihova. A jọ akpọ na soso riẹ ae inọ a rrọ ahwo nọ a wo ọkpọ uyoyou Kristi. O rrọ oware igbunu re a wo okugbe evaọ udevie ahwo ovioma, uyẹ, gbe erẹwho sa-sa, yọ ẹzi ọfuafo Ọghẹnẹ ọvo u ru nọ onana o sae rọ lọhọ. Kọ who gbe kpohọ ewuhrẹ rai jọ re whọ ruẹ onana kẹ omara?

[Uwoho nọ o rrọ ẹwẹ-obe avọ 27]

Kọ ahwo nọ a bi ru usiwo igbunu nẹnẹ (nọ uwoho rai o rrọ obọze na) a gine wo uketha Ọghẹnẹ?