Oware Udidi Avọ 5

Ru Ẹgwọlọ Abọ-Ẹzi Ra Gba

EME EBAIBOL NA O WUHRẸ? “Eva e were ahwo nọ a vuhu ẹgwọlọ abọ-ẹzi rai mu.”—Matiu 5:3, NW.

USE-ABỌ VẸ O RIẸ? Egagọ buobu e vọ akpọ na, yọ ibuobu rai a bi wuhrẹ eware sa-sa nọ e rọwokugbe ohwohwo ho kpahe epanọ ohwo o re ro ru ẹgwọlọ abọ-ẹzi riẹ gba. Kọ ẹvẹ whọ sae rọ riẹ ugogo egagọ nọ u bi wuhrẹ uzẹme na je bi gine ru oware nọ o rẹ were Ọghẹnẹ? Ikere-ebe jọ nọ e viodẹ a ta nọ o rrọ oware ugheghẹ, tubọ oware enwoma re a fi ẹrọwọ họ Ọghẹnẹ jẹ roma kẹe. Obe-usi jọ nọ a re se Maclean o ta iroro ohwo jọ nọ ọ viodẹ evaọ usu ahwo nọ a rọwo Ọghẹnẹ hẹ, inọ: “Orọwọ nọ Ileleikristi a wo na inọ u wo oware jọ nọ u kpehru vi umuo nọ otokiẹ-eriariẹ gbe ibiaro mai e rẹ sae ruẹ . . . u ru uzuazọ mai ahwo-akpọ kuẹku je bi ru omai wo ẹzi ozighi.”

EME WHỌ RẸ SAI RU? Kiẹ imuẹro nọ i dhesẹ inọ Ọghẹnẹ ọ rrọ riwi. (Ahwo Rom 1:20; Ahwo Hibru 3:4) Whọ kuvẹ hẹ re ohwo jọ o ru owhẹ siọ iyo enọ nọ i wuzou ba ẹgwọlọ, enọ wọhọ: Fikieme ma jẹ rrọ uzuazọ? Kọ ohwo o re kpohọ oria jọ nyae rria nọ o te whu no? Fikieme uye-oruẹ u je bu akpọ na t’enẹ? Eme Ọghẹnẹ ọ gwọlọ mi omẹ? Iyo nọ e rẹ vọ eva nọ whọ rẹ ruẹ kẹ enọ nana yọ ugogo oware jọ nọ u re fi obọ họ kẹ owhẹ ruẹ uvi edẹro hayo evevọwẹ evaọ uzuazọ.

Dede na, whọ nwane jẹ ẹme kpobi nọ amọfa a ta kẹ owhẹ rehọ họ. Ẹme Ọghẹnẹ ọ tuduhọ owhẹ awọ inọ whọ rehọ “ẹgba otoriẹ” ra kiẹ je vuhu oware nọ Ọghẹnẹ ọ rẹ jẹrehọ. (Ahwo Rom 12:1, 2, NW) Ọghẹnẹ ọ te ghale omodawọ ra. Whọ tẹ be ruẹrẹ oke họ ro wuhrẹ Ebaibol na je fi ehrẹ riẹ họ iruo, ebẹbẹ buobu e te thọ owhẹ wa, u ti bru awaọruọ ra kpotọ, je fi obọ họ kẹ owhẹ ruẹ omawere ziezi evaọ uzuazọ. Onana o rrọ oware nọ u muẹro. Ima ahwo buobu nọ a no eria sa-sa ze gbe enọ i je yeri oghẹrẹ uzuazọ sa-sa a wo erere no ẹkwoma uzẹme kpahe Ọghẹnẹ gbe ẹjiroro riẹ nọ a wuhrẹ. Wọhọ oriruo, se ikuigbe uzuazọ ahwo jọ evaọ ẹwẹ-obe avọ 18 rite 21 orọ emagazini nana.

Nọ who bi wo erere evaọ ẹnyalele ohrẹ Ebaibol na, u ti ru ọtamuo ra ọrọ omarọkẹ Ọghẹnẹ ga viere. Kọ whọ gbẹ jẹ uzizie nọ Isẹri Jihova a re ro wuhrẹ Ebaibol na kugbe owhẹ rehọ? Who te ru ere, whọ te ruẹ uzẹme orọ ẹme Pọl ukọ na ọnọ ọ ta nọ: “Erere ologbo ọ ghinẹ rọ kẹ ohwo nọ o bi lele Ọghẹnẹ otẹrọnọ utho oware nọ o woi o rẹ dae ẹro.”—1 Timoti 6:6.

[Uwoho nọ o rrọ ẹwẹ-obe avọ 8]

Kiẹ je vuhu oware nọ Ọghẹnẹ ọ rẹ jẹrehọ