Oware Udidi Avọ 4

Salọ Egbẹnyusu Ra avọ Orimuo

EME EBAIBOL NA O WUHRẸ? “Ọnọ ọ nya lele ahwo owareghẹ o re wo areghẹ.”—Itẹ 13:20.

USE-ABỌ VẸ O RIẸ? Egbẹnyusu mai e rẹ sai ru omai wo ẹzi edẹro viere hayo ru omai gbabọkẹ ẹzi edẹro. Uruemu gbe eme egbẹnyusu mai i re kpomahọ eriwo mai kpahe uzuazọ.—1 Ahwo Kọrint 15:33.

Wọhọ oriruo, roro kpahe ikuigbe jọ evaọ Ebaibol na nọ e ta kpahe ezae ikpegbivẹ jọ nọ a vi uwou kpohọ Kenan. Nọ a kpozi, ibuobu rai a “rehọ usi uyoma [kpahe] otọ nọ a nya i riwi [na] se ahwo Izrẹl.” Dede na, ezae ivẹ evaọ usu rai a ta emamọ ẹme kpahe Kenan, a se rie “emamọ otọ.” Rekọ ẹme oyoma ekiotọ ikpe na ọ vaha ruọ udevie ahwo na kpobi. Ikuigbe na e ta nọ: “Ogbotu na kpobi a te bo via whawha; . . . ahwo Izrẹl kpobi a tẹ [be] go.”—Ikelakele 13:30-14:9.

Epọvo na nẹnẹ, ahwo buobu a “rẹ gua-imimẹ.” (Jud 16) O rrọ bẹbẹ re ohwo o wo edẹro nọ o te bi lele ahwo nọ oware o rẹ da ẹro ho nyusu.

EME WHỌ RẸ SAI RU? Roma totọ kiẹ oghẹrẹ ẹmeọta ra kugbe egbẹnyusu ra. Kọ egbẹnyusu ra a rẹ rehọ eware nọ a wo ro seha ẹsikpobi, hayo kọ a re bruenu ẹsikpobi kpahe eware nọ a wo ho? Oghẹrẹ ogbẹnyusu vẹ whọ rrọ kẹ ae? Kọ who bi ru re egbẹnyusu ra a re owhẹ ihri, manikọ whọ be tuduhọ ae awọ re a wo edẹro kẹ umutho eware nọ a wo?

Roro kpahe oriruo Devidi, ọnọ a bi ti ro mu ovie, gbe Jonatan, ọmọzae Sọl ovie na. Devidi ọ dhẹ nyai si oma no igbrẹwọ fiki Sọl. Sọl ovie na o je roro inọ Devidi o bi ti mi ei ọkwa uvie riẹ no, fikiere ọ jẹ gwọlọ epanọ o re ro kpe Devidi. Dede nọ Jonatan họ ohwo nọ ọkwa uvie na o hai te nọ u te no ọsẹ riẹ no, ọ jọ ogbẹnyusu ọkpekpe Devidi. Jonatan o vuhumu inọ Ọghẹnẹ ọ rehọ Devidi mu no re ọ rehọ ẹta uvie na, yọ uvẹ-ọghọ orọ uketha nọ ọ rẹ kẹ Devidi o da riẹe ẹro.—1 Samuẹle 19:1, 2; 20:30-33; 23:14-18.

Eghẹrẹ egbẹnyusu itieye na u fo nọ who re wo, egbẹnyusu nọ oware o rẹ da ẹro, enọ e rẹ gwọlọ ewoma ra. (Itẹ 17:17) Rekọ re whọ sai wo eghẹrẹ egbẹnyusu itieye na, o gwọlọ nọ who re wo eghẹrẹ iruemu itieye na re.—Ahwo Filipai 2:3, 4.

[Uwoho nọ o rrọ ẹwẹ-obe avọ 7]

Kọ egbẹnyusu ra a bi ru owhẹ wo ẹzi edẹro manikọ a bi ru owhẹ gbabọkẹ ẹzi edẹro?