Ọghẹnẹ gbe Egbẹnyusu Riẹ A You Rie
Wuhrẹ Emọ ra
Ọghẹnẹ gbe Egbẹnyusu Riẹ A You Rie
NẸNẸ, ohwo ọvo ọ riẹ odẹ ọmọtẹ nọ ma be ta ẹme kpahe na ha. Odẹ ọsẹ riẹ nọ a re se Jẹfta ọvo a rọ riẹe. Joma jọ Ebaibol na wuhrẹ eware jọ kpahe aimava na. Ma te ruẹ inọ Ọghẹnẹ gbe egbẹnyusu ọmọtẹ na a you rie.
Ma rẹ sai se kpahe Jẹfta avọ ọmọtẹ riẹ evaọ uzou avọ 11 orọ obe Ibruoziẹ evaọ Ebaibol na. Nọ orọnọ Jẹfta yọ odibo Ọghẹnẹ nọ o wo ẹrọwọ na, u muẹro inọ ọ jẹ hae rehọ Ikereakere na wuhrẹ ọmọtẹ riẹ.
Jẹfta ọ rria je whu no taure emọ Izrẹl a tẹ te yare inọ a gwọlọ ohwo-akpọ nọ ọ rẹ jọ ovie kẹ ae. Jẹfta yọ ọzae nọ ọ goma gaga. Fikiere, emọ Izrẹl a tẹ lẹe inọ ọ kobaro kẹ ae nyae họre ahwo Ammọn, orẹwho jọ nọ o kẹle rai nọ o jẹ hae wọ ohọre bru ai ze.
Jẹfta ọ gwọlọ uketha Ọghẹnẹ re ọ sai fi ahwo Ammọn kparobọ, fikiere, ọ tẹ ya eyaa jọ. Jẹfta ọ ta nọ otẹrọnọ Jihova o fi obọ họ kẹe fi ahwo Ammọn kparobọ, ọ te rehọ ohwo uviuwou riẹ nọ ọ kake dhẹ ze ti dede iei evaọ okenọ o ti zihe no ẹmo kpozi rọkẹ Jihova. Ohwo yena ọ te rọ edẹ uzuazọ riẹ nọ i kiọkọ kpobi gọ Ọghẹnẹ evaọ uwou-udhu Ọghẹnẹ—oria nọ a jẹ jọ gọ Ọghẹnẹ oke yena. Kọ whọ riẹ ohwo nọ ọ kake dhẹ ze ti dede iei?— *
Ẹhẹ, ọmọtẹ riẹ! Onana o kẹ Jẹfta uye gaga. Ọmọ yena ọvo o wo. Whaọ, ọ ya eyaa kẹ Jihova no, yọ ọ rẹ siọ eyaa na ba erugba ha. Ọmọtẹ riẹ ọ tẹ nwane ta kẹe nọ: “Ọsẹ mẹ, otẹrọnọ who rovie unu ra kẹ ỌNOWO na no, ru omẹ wọhọ epanọ whọ tae.” Kẹsena, ọ tẹ yare inọ a kẹe uvẹ emerae ivẹ re o kpohọ obọ igbehru nyae viẹ. Eme o kẹ riẹ uweri na? Re ọ sai ru epanọ ọsẹ riẹ ọ ya na gba, ọ rẹ siọ orọo gbe emọ-iyẹ ba. O make jọ ere na, ọ rehọ ẹgwọlọ omobọriẹ wọhọ oware nọ o mae roja ha. O jọ isiuru riẹ re o yoẹme kẹ ọsẹ riẹ jẹ romakpotọ kẹ Jihova. Kọ who roro nọ o ru Jihova gbe ọsẹ riẹ eva were?—
Fikiere, Jẹfta o te si obọ no ọmọtẹ riẹ avọ egbẹnyusu riẹ vrẹ emerae ivẹ. Nọ ọmọtẹ na o zihe ze, ọsẹ riẹ o te ru eyaa riẹ gba ẹkwoma ọmọtẹ na nọ o si obọ no kẹ Ọghẹnẹ re ọ jọ uwou-udhu Ọghẹnẹ nọ o jọ Shailo ru iruo evaọ edẹ uzuazọ riẹ nọ i kiọkọ kpobi. K’ukpe k’ukpe, eyae Izrẹl e jẹ hai kpobọ Shailo nyae ruẹ ọmọtẹ Jẹfta na, jẹ kẹe ọbọga.
Kọ whọ riẹ emaha jọ nọ i you Jihova, je bi yoẹme kẹ esẹgbini rai?— U re woma re ma riẹ emọ itieye na ziezi je mu usu kugbe ai. Whọ tẹ be raro kele ọmọtẹ Jẹfta, je bi yoẹme avọ omaurokpotọ, who ti wo emamọ egbẹnyusu. Onana u ti ru ọsẹgboni ra were eva, Jihova o ti you owhẹ re.
Jọ Ebaibol ra se
[Oruvẹ-obotọ]
^ edhe-ẹme 6 Who te bi se onana kugbe ọmọ, usi nana—o rẹ kareghẹhọ owhẹ inọ who s’unu họ jẹ ta udu họ iẹe awọ re ọ kpahe ẹme.
Enana E Sae jẹ Were Owhẹ
JỌ OGBẸNYUSU JIHOVA
Yoẹme kẹ Ọsẹgboni Ra
Fikieme who re ro yoẹme kẹ ọsẹgboni ra? Rri ividio nana re whẹ avọ Kelẹb wha wuhrẹ oware nọ o rọ gwọlọ nọ a re yoẹme.
JỌ OGBẸNYUSU JIHOVA
Yoẹme kẹ Jihova
Kọ oware kpobi whọ rẹ rọ zaharo? Rri ividio nana re whọ ruẹ epanọ Kelẹb o ro zihe ruọ ogbẹnyusu Jihova.
UWOU-ERORO NA
Jesu Kristi—Ẹvẹ U Fo nọ Ma rẹ rọ Kareghẹhọ iẹe?
Kọ ma rẹ kareghẹhọ Jesu wọhọ ọmọboba nọ a wọ họ obọ? Amono họ ezae iwoareghẹ nọ e nyae ruẹ Jesu na? Eme Jesu o bi ru enẹna?
UWOU-ERORO NA
Ma Sai Ru Ọghẹnẹ Eva Dha—Epanọ Ma Sai Ro Ru Ei Eva Were
Kọ whọ riẹ nọ whọ sai ru Jihova eva dha? Se kpahe oghẹrẹ nọ Adamu avọ Ivi a ro ru eva dha Jihova.