Enọ I Bi Se Ebe Mai A Nọ Inọ . . .

Kọ Isẹri Jihova a rẹ jẹ usiwo-imu rehọ?

▪ Jesu ọ ta nọ “enọ oma o gae a . . . guọlọ ọbo ho, rekọ enọ e rẹ mọ ọvo.” (Matiu 9:12) Ẹme Jesu na u dhesẹ nọ o wọso Ikereakere na ha re ohwo nọ ọ be mọ ọ nya bru ọbo-imu rọkẹ usiwo. Fikiere, Isẹri Jihova a rẹ rehọ imu hayo jẹ usiwo-imu rehọ. O rrọ isiuru rai re a wo omokpokpọ jẹ rria tọ. Wọhọ Luk, Oleleikristi jọ evaọ ikpe-udhusoi ọsosuọ nọ ọ jọ ọbo, Isẹri Jihova jọ yọ ebo.—Ahwo Kọlọsi 4:14.

Dede na, Isẹri Jihova a rẹ jẹ eghẹrẹ usiwo-imu nọ e wọso ehri-izi Ebaibol rehọ họ. Wọhọ oriruo, a rẹ rọwo nọ a se azẹ fihọ ae oma ha, keme Ebaibol ọ ghọ azẹ nọ a rẹ rehọ fihọ oma. (Emuhọ 9:4; Iruo-Izerẹ 17:1-14; Iruẹru Ikọ Na 15:28, 29) Ebaibol ọ tẹ jẹ ghọ usiwo nọ u wobọ kugbe “ogaga imizi.”—Aizaya 1:13, NW; Ahwo Galesha 5:19-21.

Enẹna, ebo-imu buobu a be rọ eghẹrẹ usiwo nọ e wọso ehri-izi Ebaibol ho siwi ahwo. Ẹsibuobu, eghẹrẹ usiwo-imu itienana, enọ Isẹri Jihova buobu a rẹ jẹrehọ na, i re ru iruo woma vi enọ e wọso izi Ọghẹnẹ.

Uzẹme, evaọ ẹme usiwo-imu, eriwo sa-sa e riẹ. Ẹsejọ, oware nọ o rẹ sai ru iruo evaọ oma ohwo jọ o rẹ sai ru iruo eva oma omọfa ha. Fikiere, ahwo nọ a be gwọlọ riẹ ugogo ẹyao nọ a be mọ gbe usiwo-imu nọ u fo kẹe a rẹ sae nya bru ebo-imu sa-sa.—Itẹ 14:15.

Isẹri Jihova kpobi a sae nwane salọ oghẹrẹ usiwo-imu ovona ha. Nọ oware o gbẹ wọso uzi Ebaibol ho, Ẹme Ọghẹnẹ ọ kẹ uvẹ nọ Ileleikristi a sae rọ rehọ obroziẹ-iroro rai salọ ọvuọ onọ u je ohwo. (Ahwo Rom 14:2-4) Fikiere, o gwọlọ nọ omomọvo ọ rẹ nabe roma totọ kiẹ oghẹrẹ usiwo-imu kpobi nọ ọ gwọlọ rehọ re ọ ruẹ nọ o wọso obroziẹ-iroro riẹ nọ ọ rehọ Ebaibol wuhrẹ no ho.—Ahwo Galesha 6:5; Ahwo Hibru 5:14.

Nọ Osẹri Jihova ọ tẹ be jiroro, o re fi omariẹ họ ẹta edraeva nọ ọ be dhẹ kẹle edhere adasa nọ imoto buobu e vọ be jọ dhẹ. Edraeva na ọ tẹ dhẹ ogogidi lele imoto nọ e rrọ aro riẹ, ọ rẹ sae wha asidẹnte ze. Edraeva nọ o wo areghẹ ọ rẹ dina thihi ibreki re o muẹrohọ edhadhẹ imoto efa taure ọ tẹ ruabọhọ ẹdhẹ. Epọvo na re, Isẹri Jihova a rẹ rọ ugidi jiroro nọ i wobọ kugbe usiwo-imu hu, yọ a rẹ nwane jẹ usiwo jọ rehọ fikinọ ahwo a bi kie lele iei hi. Ukpoye, a rẹ roma totọ wawo eghẹrẹ usiwo nọ e riẹ jẹ kiẹ ehri-izi Ebaibol riwi taure a tẹ te salọ.

Isẹri Jihova a wo ovuhumuo kẹ iruo egaga erọ ebo-imu nọ e be daoma siwi ahwo. A te je wo edẹro kẹ ufuoma nọ ebo-imu a be kẹ otu nọ e be mọ ẹkwoma esiwi ẹyao rai.