“O, Ọghẹnẹ Mẹ, Kareghẹhọ Omẹ, Fiki Ewoma”
Si Kẹle Ọghẹnẹ
“O, Ọghẹnẹ Mẹ, Kareghẹhọ Omẹ, Fiki Ewoma”
“ME JE roro nọ Jihova nọ ọ riẹ omẹ lafi na ọ rẹ sai you hayo jẹ omẹ rehọ vievie he.” Ere aye jọ nọ ọ rrọ Oleleikristi nọ o roro inọ ọye o fioka ha, o kere. Kọ who wo iroro itieye na no ẹdẹjọ, inọ who te ohwo nọ Ọghẹnẹ ọ rẹ daezọ riẹ hẹ, kabikọ ọnọ ọ rẹ jẹrehọ? O tẹ rrọ ere, eme nọ a kere fihọ Nehemaya 13:31 e sae kẹ owhẹ uduotahawọ.
Nehemaya nọ ọ jọ osu ahwo Ju evaọ ikpe-udhusoi avọ isoi taure Kristi ọ tẹ ze, ọ dawo utho ẹgba riẹ kpobi re ọ ruẹ nọ o ru Ọghẹnẹ eva were. Ọ kobaro evaọ ọwariẹbọ igbẹhẹ Jerusalẹm ghelọ ọwọsuọ ewegrẹ. O fi ẹgba họ ekoko izi Ọghẹnẹ, o fi obọ họ kẹ otu nọ a je kienyẹ, jẹ daoma bọ ẹrọwọ ibe emọ Izrẹl ga. Kọ Ọghẹnẹ o muẹrohọ eware iwoma nọ ọzae nana nọ o wo ẹrọwọ na o ru? Kọ Jihova ọ jẹ Nehemaya rehọ? Ma rẹ sae ruẹ uyo na evaọ eme obọ ekuhọ obe Ebaibol nọ a rọ odẹ riẹ se.
Nehemaya ọ lẹ nọ: “O, Ọghẹnẹ mẹ, kareghẹhọ omẹ, fiki ewoma.” * Kọ ozọ u je mu Nehemaya inọ Ọghẹnẹ o mu ẹro họ eware iwoma nọ o ru hu hayo inọ ọyomariẹ ọ te thọrọ Ọghẹnẹ ẹro? Ijo. U muẹro inọ Nehemaya ọ riẹ oware nọ ahwo jọ nọ a kere ebe Ebaibol jọ no a ta kpahe uvi isiuru nọ Jihova o wo kpahe idibo riẹ gbe eware iwoma nọ a ru. (Ọnyano 32:32, 33; Olezi 56:8) Kọ eme ọ jẹ yare Ọghẹnẹ inọ o ru kẹe na? Obe jọ o ta nọ ẹme Hibru nọ a jọ etenẹ fa “kareghẹhọ” na u dhesẹ “uyoyou udidi nọ a re wo kẹ ohwo gbe owojẹ nọ u re lele iei.” Avọ evaifihọ nọ o wo inọ olẹ u re ruiruo, Nehemaya ọ yare Ọghẹnẹ inọ o wo uyoyou udidi kẹe, kareghẹhọ iẹe, re ọ jẹ ghale iẹe.—Nehemaya 2:4.
Kọ Jihova ọ te kuyo olẹ nọ Nehemaya ọ rọ yare iẹe inọ ọ kareghẹhọ iẹe na? Evaọ abọjọ, o ru ere no. Uvẹ nọ Jihova ọ kẹ re a kere ayare Nehemaya na fihọ Ebaibol na nọ a rọ ẹgba ẹzi riẹ kere na o kẹ omai imuẹro inọ o wo uyoyou udidi kẹ Nehemaya jẹ kareghẹhọ iẹe. Rekọ “ọnọ o re yo elẹ” na o ti gbe ru eware efa rọ k’uyo ayare Nehemaya na.—Olezi 65:2.
Ọghẹnẹ ọ te gbẹ hwosa kẹ Nehemaya fiki eware iwoma nọ o ru evaọ ẹwhaharo egagọ uzẹme. (Ahwo Hibru 11:6) Evaọ akpọ ọkpokpọ nọ Jihova ọ ya eyaa riẹ nọ ọ be tha na, ọ te ghale Nehemaya ẹkwoma ẹkpare nọ ọ te kpare iẹe no uwhu ze. * (2 Pita 3:13; Eviavia 21:3, 4) Nọ Nehemaya ọ tẹ kparoma ze no evaọ aparadase otọakpọ nọ o ti jo wo uzuazọ ebẹdẹ bẹdẹ na, ọ te ruẹ inọ Jihova ọ ginẹ kareghẹhọ iẹe fiki ewoma riẹ.
Olẹ Nehemaya na u dhesẹ uzẹme eme Devidi ovie na inọ: “Whẹ họ ọnọ ọ rẹ ghale enọ ikiẹrẹe, O ỌNOWO; whọ rehọ aruoriwo ruru ei, wọhọ ojese.” (Olezi 5:12) Ẹhẹ, Ọghẹnẹ o re muẹrohọ omodawọ nọ u no udu mai ze nọ ma re ro ru ei eva were, yọ o rri onana ghaghae. Nọ whọ be dawo oma ra kpobi gọe na, o sai mu owhẹ ẹro inọ o ti wo uyoyou kẹ owhẹ, kareghẹhọ owhẹ jẹ ghale owhẹ ziezi.
[Oruvẹ-obotọ]
^ edhe-ẹme 5 Onana họ orọ urere evaọ isiane nọ ayare nana ọ romavia evaọ obe Ebaibol nana nọ Nehemaya ọ rọ lẹ se Ọghẹnẹ inọ ọ ghale iẹe fiki eware iwoma nọ o ru.—Nehemaya 5:19; 13:14, 22, 31.
^ edhe-ẹme 7 Rọkẹ evuẹ efa kpahe ẹjiroro Ọghẹnẹ rọkẹ ahwo-akpọ nọ a wo ẹrọwọ, rri uzou avọ 3 gbe orọ avọ 7 evaọ obe na Eme Ebaibol na O Gine Wuhrẹ?, onọ Isẹri Jihova a kere.