Ẹria Mu Utho Ugho Nọ Ohwo O Bi wo Epanọ A Sai Ro Ru ei

MA REHỌ iẹe nọ a ta kẹ owhẹ nọ who vo ame fihọ odrọmu nọ ahwo a be jọ rehọ ame ro ruiruo, yọ whọ rẹ ruẹ nọ odrọmu na ọ vọ mu unu ẹsikpobi. Ẹvẹ whọ sai ro ru ei? Nọ a be jẹ ame no odrọmu na, yọ who bi vo fihọ iẹe. Odrọmu na o rẹ sae vọ mu unu ẹsikpobi nọ who te bi kru obọ ga vo ame nọ a be jẹ noi na zihe fihọ iẹe.

Ere o rrọ re ohwo ọ rria uzuazọ mu utho ugho nọ o bi wo. Ma sae rehọ ugho nọ who bi wo dhesẹ ame nọ who bi vo fihọ odrọmu na. Araha ra kọ ame nọ iruiruo na a be jẹ no odrọmu na. Use-abọ na họ, epanọ whọ rẹ rọ ruẹ nọ ugho nọ whọ be raha u vi onọ who bi wo ho.

Dede nọ ẹme na ọ lọhọ ẹta, efihiruo riẹ o lọhọ tere he. Ahwo a rẹ sae whaha idhọvẹ abọ ugho buobu otẹrọnọ a rẹ daoma ru lele onana. Ẹvẹ a sai ro ru ei? Diẹse ma rẹ sae jọ duku ekpọvio nọ i re gine ru iruo? Ebaibol na yọ ehri obufihọ ulogbo evaọ ẹme nana. Joma dai rri ithubro nọ e rrọ Ebaibol na.

Ehri-Izi Ebaibol nọ I re Fi Obọ Họ

Ebaibol na o wo obọdẹ ehri-izi buobu nọ e rẹ sai fi obọ họ kẹ owhẹ yọrọ oma evaọ araha ugho. Ma te ta kpahe umutho rai jọ. Dai rri sọ ehri-izi nana e sai fi obọ họ kẹ owhẹ evaọ ẹraha ugho ra lele utho nọ who bi wo.

Wo Omaa-Araha. Re whọ sae yọrọ oma evaọ araha ugho, o gwọlọ nọ whọ rẹ riẹ ugho nọ who bi wo gbe oware nọ whọ be raha iẹe fihọ. Ebaibol ọ ta nọ: ‘Omaa omamọ ohwo o rẹ rehọ ọruẹriọ tha, rekọ ohwo kpobi nọ o re bru okpakpa ọ rẹ te jọ ababọ eware.’ (Itẹ 21:5) Ahwo jọ a rẹ rọ ẹnvẹlopu ma omaa araha rai. A re fi ugho họ ẹnvẹlopu sa-sa rọkẹ araha sa-sa, wọhọ oriruo, “Ugho emu,” “Ugho osa-uwou,” hayo “Ugho emuosẹ.” Te whọ rọ oghẹrẹ nana hayo edhere ọfa jọ ma omaa araha ra, oware nọ u wuzou họ, whọ riẹ eware nọ whọ be raha igho ra họ, be rọ eware nọ e mae r’oja karo orọnikọ erọ akpọriọ họ.

Whaha urusio. Ahwo buobu evaọ erẹwho nọ i bi rovie aro ze obọ a re siuru eware nọ ahwo erẹwho nọ i rovie aro no a wo. Makọ evaọ okegbe rai dede, ahwo buobu a rẹ gwọlọ siuru eware nọ erivẹ rai a bi ro dhesẹ oma. Onana o rẹ sae jọ agbefẹ. Ẹsejọ dede he, orọnikọ erivẹ itieye na a gine wo ugho obọrai nọ a rọ dẹ eware yena ha. Kọ eme whọ jẹ raro kele ohwo nọ o bi ru oware ugheghẹ, onọ u re fi owhẹ họ esa-eriọ? Ebaibol ọ kẹ unuovẹvẹ nọ: ‘Ohwo uvou-uthei o re lele esi efe tuatuatua, dede na yọ ọ riẹ onọ o rẹ te kariẹ he.’—Itẹ 28:22.

Yeri uzuazọ umutho. Jesu ọ hrẹ ilele riẹ inọ a ru ẹro rai “woma,” hayo lọhọ. (Matiu 6:22) Ẹro ofihọ eba gbe erro kpakiyọ idemevu  gbe ibiku eye ugho ra u te, o rẹ sae lẹliẹ owhẹ riesa. Iyẹrẹ jọ nọ i no Asian Development Bank ze i dhesẹ nọ, enwenọ abọvo ọrọ abasa ahwo nọ a be rria Philippines gbe bu vi abọvo ọrọ ahwo nọ a be rria India a be sae ruẹ ugho wọhọ ẹsiso (₦200.00) rọ kuoma kẹdẹ kẹdẹ hẹ, umutho ugho nọ oyogbere evaọ Asia ọ sai ro kru oma evaọ okpẹdẹ. Nọ ugho nọ ohwo o bi wo o tẹ kawo ere, o rrọ oware areghẹ re ọ tẹrovi eware nọ e mae r’oja. Makọ evaọ erẹwho nọ i fe dede, ehri-uzi ovona o rẹ sai fi obọ họ kẹ ahwo nọ a gbe ro si ebẹbẹ se omarai hi evaọ abọ ugho.

Jọ umutho eware nọ e r’oja e da owhẹ ẹro. Onana o rọwokugbe ohrẹ nọ o ta nọ who yeri uzuazọ umutho. Ebaibol ọ kẹ ohrẹ nana evaọ 1 Timoti 6:8 inọ: “Otẹrọnọ ma wo emuore gbe emuẹgọ jọ enana e da omai ẹro.” Ahwo jọ nọ e be mae wereva kpaobọ evaọ akpọ na a wo ugho tere he; dede na, a bi wo evevọwẹ evaọ onọ a wo, onọ o kẹre te uyoyou ahwo uviuwou rai gbe orọ egbẹnyusu, orọnikọ ekwakwa akpọ oyeri ọvo ho.—Itẹ 15:17.

Who mu esa re he. Ẹme Ebaibol nana uzẹme: “Ọdafe o re su oyogbere, ọnọ o re momo ọ rẹ jọ ọrigbo kẹ ọnọ o momo mi na.” (Itẹ 22:7) Dede nọ eware jọ e riẹ nọ e rẹ sae gba ohwo họ riosa, ahwo nọ a re mu esa re fikinọ a gwọlọ dẹ oware jọ nọ u si rai urru a re fi omarai họ igbo esa-eriọ. O rẹ sae via enẹ maero nọ ohwo ọ tẹ be rehọ credit card (ekade nọ a rẹ rọ dẹ oware riosa) rọ dẹ eware. Obe-usi nọ a re se Time o ta nọ: “Ma te kru ekade nọ a rẹ rọ dẹ oware riosa họ obọ, ma rẹ gbẹ maa te re ma tẹ dẹ hẹ.” Eric nọ ọ be rria obọ Philippines ọ ta nọ: “Nọ ekade nọ a rẹ rọ dẹ oware riosa o tẹ rrọ omẹ obọ, ẹsibuobu mẹ rẹ dẹ eware vrẹ ẹsenọ me kru ugho họ obọ be rọ dẹ. Nọ mẹ tẹ be hwa ugho na oke ofa, mẹ rẹ ruẹ nọ mẹ re vrẹ omaa araha mẹ.” Kọ o gbẹ rrọ oware areghẹ re ma yọrọ oma nọ ma tẹ be rehọ ekade otiọye na dẹ eware?—2 Ivie 4:1; Matiu 18:25.

Koko ugho họ obọ taure whọ tẹ te dẹ. Dede nọ a sai rri onana wọhọ uruemu anwae, ugho nọ ma re koko re ma tẹ te dẹ oware yọ owojẹ areghẹ nọ u re fi obọ họ kẹ omai whaha igbo esa-eriọ. Oyena uruo u fi obọ họ kẹ ibuobu whaha esa-eriọ gbe ebẹbẹ nọ i re noi ze no, wọhọ ẹhwa isuo nọ i re dhe evievi, onọ u re ru oware nọ ohwo ọ dẹ na ghare thesiwa evaọ ukuhọ riẹ. Evaọ Ebaibol na, a dhesẹ ehẹhẹ wọhọ emera nọ i “wo areghẹ” fikinọ evaọ “oke uvo-ewhru a rẹ ruẹrẹ emu rai kpahe,” hayo koko emu họ kẹ odẹnotha.—Itẹ 6:6-8; 30:24, 25.

Wuhrẹ Mi Amọfa

Ithubro Ebaibol nọ ma ta ẹme kpahe na kpobi e rẹ sae jọ ezọ do wowoma, rekọ onọ na họ, kọ i bi gine fi obọ họ kẹ ahwo rria mu utho ugho nọ a bi wo? Joma ta kpahe iriruo ahwo jọ nọ i fi ithubro itieye na họ iruo jẹ sae yọrọ oma evaọ araha ugho no.

Ọzae jọ nọ a re se Diosdado nọ o wo emọ ene ọ ta nọ ẹbẹbẹ ekọ nọ i kie nọ o romavia kẹlena u bi ru ei bẹbẹ kẹe re ọ rẹrote ẹgwọlọ uviuwou riẹ. Dede na, ọ ruẹ aghare ọrọ omaa araha ugho nọ a re wo. Ọ ta nọ: “Mẹ rẹ momaa araha ukọba kpobi nọ me bi wo. Me wo obe nọ me re kere oware kpobi nọ mẹ be raha ugho kẹ fihọ.”  Ọzae nọ a re se Danilo o bi ru epọvo na. Eki nọ ọyomariẹ avọ aye riẹ a jẹ tho o kie. Ghele na, a be sae ruẹ ugho rẹrote omarai ẹkwoma omaa araha nọ a ru nọ a bi fiẹrohọ ziezi. Ọzae na ọ ta nọ: “Ma riẹ umutho ugho nọ u bi te omai obọ kamara kamara gbe onọ u bi no omai obọ. Avọ onana nọ ma wo họ iroro, ma rẹ keria momaa unuigho nọ ma rẹ sae raha.”

Re a sae raha ugho lele omaa rai, ahwo jọ a ruẹ nọ u fo re a bru araha rai kpotọ evaọ ofẹ jọ. Aye-uku jọ nọ a re se Myrna nọ emọ esa e rrọ obọ ọ ta nọ: “Ukpenọ ma rẹ ruọ imoto-ofa kpohọ iwuhrẹ Ileleikristi, otọ mẹ avọ emọ mẹ ma be nya enẹna.” Myrna ọ be daoma fi obọ họ kẹ emọ riẹ wuhrẹ aghare ọrọ eyeri uzuazọ umutho. Ọ ta nọ: “Mẹ be daoma fi emamọ oriruo h’otọ ẹkwoma efihiruo ehri-uzi nọ o rrọ 1 Timoti 6:8-10, onọ u dhesẹ epanọ u ro wuzou re ohwo o wo edẹro evaọ umutho eware nọ o wo.”

Ọzae jọ nọ a re se Gerald nọ o wo emọ ivẹ o bi ru epọvo na. Ọ ta nọ: “Evaọ etoke uwuhrẹ Ebaibol uviuwou mai, ma rẹ ta ẹme kpahe ikuigbe Ileleikristi nọ e tẹrovi oware nọ u gine wuzou, eware abọ-ẹzi. Emamọ iyẹrẹ i bi no onana ze keme u ru nọ emọ mai a gbẹ be rọ yare eware nọ e r’oja ha mi omai hi.”

Janet yọ ọmọtẹ nọ o ri wo ọzae he nọ ọ be rọ unevaze wuhrẹ ahwo Ebaibol na oke-kpobi evaọ obọ Philippines. A si rie no iruo kẹle na, rekọ ọ be daoma yeri uzuazọ lele umutho ugho nọ o bi wo. Ọ ta nọ: “Oghẹrẹ nọ mẹ be sai ro ru onana họ, mẹ be ta họ omamẹ obọ je dhesẹ orimuo.” O fibae nọ: “Ukpenọ me re kpohọ iwou-eki ilogbo nyae dẹ eware ghaghae, me re kpohọ iwou-eki esese nọ e rẹ zẹ eware ku. Kọ eme mẹ jẹ dẹ oware ghaghae kpakiyọ mẹ rẹ sae dẹ oware ovona kuẹku evaọ oria ofa? Mẹ be jẹ daoma whaha uruemu ẹro-ọruẹ-k’ẹdẹ.” Janet ọ ruẹ epanọ o rrọ oware areghẹ te re a koko ugho kpahotọ kẹ oware. Ọ ta nọ: “Ugho jọ u te kiọkọ no araha mẹ ze, makọ o kawo, me re fi ei họ oria, re mẹ ruẹse ruẹ tọlọ odẹnotha nọ araha idudhe jọ ọ tẹ romavia.”

Eric, ọzae nọ ma ta ẹme te no vẹre na ọ ta kpahe ekade nọ a rẹ rọ dẹ oware riosa inọ: “Mẹ gba riẹ mu inọ mẹ rẹ rọ ekade na dẹ oware he ajokpaọ oware idudhe jọ nọ mẹ rẹ sae whaha ha.” Diosdado ọ ta re inọ: “Oghẹrẹ nọ mẹ rẹ rọ ta họ omamẹ obọ họ, mẹ rẹ nyasiọ ekade mẹ ba obọ ọfisi.”

Whọ rẹ Sae Rria Mu Utho Ugho nọ Who bi Wo

Ẹhẹ, ahwo buobu a be ruẹ vuhumu inọ dede nọ usu mai kugbe Jihova họ ugogo oware nọ Ebaibol na ọ ta kpahe, u wo ekpọvio nọ e rẹ sae kẹ omai erere evaọ abọ-iwo. (Itẹ 2:6; Matiu 6:25-34) Who te fi ehri-izi Ebaibol nọ ma ta ẹme kpahe evaọ uzoẹme nana họ iruo, je bi wuhrẹ mi amọfa nọ a wo erere no ehri-izi Ebaibol nana ze no, whọ rẹ sae rria mu utho ugho nọ who bi wo re. Who te bi ru ere, whọ rẹ sae whaha idhọvẹ gbe awaọruọ nọ ima ahwo buobu nẹnẹ a bi fi omarai họ.

[Ẹme nọ a fi ẹgba họ nọ ọ rrọ ẹwẹ-obe avọ 10]

“Ma rẹ keria momaa unuigho nọ ma rẹ sae raha”

[Ẹme nọ a fi ẹgba họ nọ ọ rrọ ẹwẹ-obe avọ 11]

‘Ukpenọ ma rẹ ruọ imoto-ofa kpohọ iwuhrẹ Ileleikristi, otọ ma be nya enẹna’

[Ẹme nọ a fi ẹgba họ nọ ọ rrọ ẹwẹ-obe avọ 11]

‘Mẹ be whaha uruemu ẹro-ọruẹ-k’ẹdẹ’