Ebaibol Na O Re Nwene Uzuazọ Ohwo

EME o fi obọ họ kẹ uzoge jọ nọ o re kuomagbe ahwo ho, nọ ile ozighi e rẹ were gaga nọ o bi ro you amọfa je bi fi obọ họ kẹ ae enẹna? Eme o wọ ọzae jọ evaọ obọ Mexico si obọ no uzuazọ ọfariẹ? Fikieme omọvo egba ebasikoro edhẹ evaọ Japan ọ rọ kpairoro vrẹ oyena re ọ sae gọ Ọghẹnẹ? Se eme nọ ahwo nana a ta.

“Mẹ wharo jẹ geva gaga vẹre.”—DENNIS O’BEIRNE

UKPE NỌ A YẸ OMẸ: 1958

ORẸWHO MẸ: ENGLAND

IKU MẸ: ILE OZIGHI E JẸ HAE WERE OMẸ, YỌ MẸ JẸ HAI KUOMAGBE AHWO HO

UZUAZỌ MẸ EVAỌ OKE NỌ U KPEMU: Ọsẹ mẹ yọ ohwo Ireland, yọ ichọche Kathọlik mẹ nya n’otọ ze. Dede na, mẹ ọvo mẹ jẹ hai kpohọ ichọche, fikiere o jẹ hae ruomẹ oma ha. Ghele na, ohọo abọ-ẹzi u je kpomẹ. Mẹ jẹ hae lẹ Olẹ Olori na ẹsikpobi, yọ mẹ kareghẹhọ inọ mẹ jẹ hai roro oware nọ olẹ nana u dikihẹ kẹ nọ mẹ tẹ rrọ ehwa evaọ aso. Mẹ jẹ hai kele eme olẹ na, jẹ daoma gwọlọ riẹ oware nọ eme na ọvuọvo i dhesẹ.

Okenọ mẹ jọ ikpe ikpegbọ, me te kuomagbe utu Rastafaria. Me te je wo isiuru kpahe itu isuẹsu wọhọ Anti-Nazi League (otu nọ ọ wọso isuẹsu Nazi). Rekọ me duoma le họ iruẹru ọkparesuọ erọ otu ile ozighi. Mẹ jẹ hae rehọ imu-egaga, maero kọ ige nọ mẹ jẹ hai vovo enwenọ k’ẹdẹ k’ẹdẹ. Fikinọ me wo uruemu ọ “Mẹ daezọ họ,” mẹ jẹ hae da idi thomawa, fi uzuazọ mẹ họ ọza, yọ me se uzuazọ amọfa gboware he. Mẹ jẹ hai kuomagbe ahwo ho, mẹ jẹ hai lele ahwo ta ẹme he, ajokpanọ me te roro nọ oware na u gine wuzou. Mẹ jẹ hae tubẹ se inọ a rehọ omẹ ifoto ho. Me te roro kpahe uzuazọ nọ me je yeri, mẹ rẹ sae ta nọ mẹ wharo jẹ geva gaga oke yena. Ohwo nọ ọ kẹle omẹ ọvo mẹ jẹ hai ruọghọ je dhesẹ uyoyou kẹ.

Nọ mẹ jọ oware wọhọ ikpe udhe, me te wo isiuru kpahe Ebaibol. Ogbẹnyusu mẹ jọ nọ ma gbẹ jẹ hae rehọ imu-egaga o mu Ebaibol họ ese evaọ okenọ ọ jọ uwou-odi, yọ ma raha oke kugbe gaga ẹdẹjọ ta ẹme kpahe egagọ, ichọche Kathọlik, gbe abọ nọ Setan o bi wo evaọ iruẹru akpọ nana. Mẹ tẹ dẹ Ebaibol je mu ei họ ese kẹ omamẹ. Mai imava ma jẹ hai se eria sa-sa evaọ Ebaibol na, kẹsena ma vẹ keria ta ẹme kpahe eware nọ ma se na gbe oware nọ ma roro nọ oria na o be ta. Ma ru onana evaọ emerae buobu.

Eware jọ nọ ma wo otoriẹ rai no eware nọ ma se na ze ena: ma be rria edẹ urere akpọ nana; u fo nọ Ileleikristi a rẹ ta usi uwoma Uvie Ọghẹnẹ; Ileleikristi a rẹ jọ uvumọ abọ evaọ akpọ nana ha, te abọ isuẹsu riẹ; gbe inọ Ebaibol ọ kẹ ọkpọvio ọgbagba ọrọ utee uruemu. Ma ruẹ vevẹ inọ Ebaibol na yọ obe uzẹme, gbe inọ egagọ uzẹme jọ e te jariẹ. Rekọ ovẹ họ egagọ uzẹme na? Ma roro kpahe ichọche sa-sa nọ e viodẹ avọ oma udhesẹ gbe iruẹru rai, te abọ  nọ a bi wo evaọ esuo ohrowo, yọ ma ruẹ nọ Jesu ọ jọ ere he. Ma ruẹ vuhumu nọ Ọghẹnẹ ọ be rehọ ai ruiruo ho, fikiere ma tẹ ta nọ ma rẹ kiẹ kpahe itu egagọ nọ e viodẹ tere he re ma ruẹ oware nọ a bi ru.

Ma jẹ hae ruẹrẹ oke họ kugbe ahwo egagọ enana jẹ nọ ae enọ sa-sa. Ma riẹ oware nọ Ebaibol ọ ta kpahe enọ nana ọvuọvo, fikiere ma jẹ hai fiẹro họ sọ a te za enọ na rọwokugbe epanọ o rrọ Ebaibol. Nọ ma te ru enẹ no, mẹ jẹ hae lẹ se Ọghẹnẹ nọ, ‘Otẹrọnọ ahwo nana họ egagọ uzẹme, ivie k’omẹ ọwhọ nọ mẹ rẹ rọ gwọlọ wariẹ kuomagbe ai.’ Rekọ nọ ma lele ahwo egagọ itienana sa-sa ta ẹme te emerae jọ no, mẹ sai duku utu egagọ nọ e kẹ iyo enọ mai no Ebaibol na ze he; yọ mẹ jẹ hai wo ọwhọ nọ mẹ rẹ rọ wariẹ keria kugbe ae he.

Uwhremu na, mẹ avọ ogbẹnyusu mẹ ma tẹ ruẹ Isẹri Jihova. Ma tẹ nọ ae enọ evona, rekọ a rọ Ebaibol na kẹ omai iyo na. Iyo nọ a kẹ e nwane rọwokugbe eware nọ ma riẹ no vẹre. Fikiere ma tẹ nọ ae enọ efa nọ ma re sae ruẹ iyo rai evaọ Ebaibol na ha—wọhọ oriruo, eriwo Ọghẹnẹ kpahe ivovavovo gbe imu-egaga erehọ. A tẹ jẹ rọ Ebaibol na kẹ omai uyo na. Ma tẹ rọwo nọ ma re lele ai kpohọ obọ Ọgwa Uvie rai kẹ ewuhrẹ.

Ekpohọ ewuhrẹ o jọ bẹbẹ kẹ omẹ. Fikinọ me re kuomagbe ahwo ho, o jẹ were omẹ hẹ nọ ahwo ọsasa nana avọ ẹgọ kpatiẹ na a jẹ whẹtiẹ omẹ họ oma. Me je viẹro ku otu rai jọ inọ a wo oware jọ fihọ eva jabọ nọ a be rọ whẹtiẹ omẹ họ oma na, fikiere mẹ gbẹ jẹ gwọlọ kpohọ iwuhrẹ rai ofa ha. Rekọ wọhọ epanọ mẹ jẹ hai ru anwẹdẹ, mẹ tẹ lẹ se Ọghẹnẹ inọ ọ kẹ omẹ ọwhọ nọ mẹ rẹ rọ wariẹ kuomagbe ahwo na otẹrọnọ ginọ egagọ uzẹme ena, isiuru nọ me re ro kuomagbe Isẹri na wuhrẹ Ebaibol na e tẹ te jọ gaga.

EPANỌ EBAIBOL NA O RO NWENE UZUAZỌ MẸ: Mẹ riẹ nọ u fo re mẹ siọ imu-egaga erehọ ba, yọ mẹ ginẹ sai ru ere. Oware nọ o jọ ẹbẹbẹ kẹ omẹ họ obusino isigareti. Mẹ daoma unuẹse buobu re mẹ siọ ivovavovo ba, rekọ mẹ sai ru ei hi. Nọ me yo kpahe amọfa jọ nọ a gbolo isigareti rai kufiẹ je si obọ no ivovavovo riẹriẹriẹ, mẹ tẹ lẹ se Jihova kpahe onana. Uwhremu na, avọ obufihọ Jihova, mẹ tẹ te siọ ivovavovo ba. Mẹ ruẹ erere nọ ọ riẹ no re me horie eva kẹ Jihova evaọ olẹ.

Enwene ologbo ọfa nọ me ru no họ, abọ ẹgọ gbe osẹ mẹ. Orọ ọsosuọ nọ me ro kpohọ ewuhrẹ evaọ obọ Ọgwa Uvie, eto mẹ e zare vi avọ ekọlọ iburu nọ me ro gbe abọjọ. Nọ u te oke jọ, mẹ tẹ rọ ekọlọ ọwawae nọ ọ dina rrọ viẹviẹ ro gbe eto na. Mẹ jẹ hai ku etrọza ijinsi họ avọ ewu oviẹ-arao nọ a kere eme fihọ. Dede nọ Isẹri na a jẹ rọ ẹwo lele omẹ ta ẹme kpahe onana, o jọ omẹ oma nọ u wuzou hu re me nwene osẹ mẹ. Rekọ uwhremu na, me te roro kpahe eme nọ e rrọ 1 Jọn 2:15-17: “Wha you akpọ na hayo eware nọ e rọ eva akpọ na ha. Re ohwo jọ o te you akpọ na, uyoyou Ọsẹ na o riẹ eva ha.” Me te ti vuhumu inọ mẹ be rọ osẹ mẹ dhesẹ nọ me you akpọ na, jẹ ruẹ nọ re mẹ sai dhesẹ uyoyou mẹ kẹ Ọghẹnẹ, me re nwene obọ. Ere me gine ru.

Nọ oke o be nyaharo na, mẹ tẹ ruẹ nọ orọnikọ Isẹri na evo e gwọlọ nọ mẹ hai kpohọ iwuhrẹ Ileleikristi hi. Obe Ahwo Hibru 10:24, 25 o lẹliẹ omẹ riẹ inọ Ọghẹnẹ ọ gwọlọ oyena mi omẹ. Nọ me mu iwuhrẹ na kpobi họ ẹnya jẹ riẹ ahwo ukoko na ziezi no, mẹ tẹ jiroro nọ mẹ rẹ rọ ame-ọhọ dhesẹ omauromudhe mẹ kẹ Jihova via.

IRERE NỌ ME WO NO: Erorokpahe uvẹ nọ Jihova ọ kẹ omai re ma wo usu okpekpe kugbei u duobọte omẹ udu. Ohrọ gbe ẹruọsa riẹ o lẹliẹ omẹ wo isiuru nọ mẹ rẹ rọ raro kele iei avọ Ọmọ riẹ Jesu Kristi. (1 Pita 2:21) Mẹ ruẹ vuhumu inọ mẹ be daoma wo uruemu Oleleikristi na, mẹ rẹ sae tẹrovi iruemu ezi nana ziezi nọ a sai ro dhesẹ omẹ. Mẹ daoma gaga re me wo uyoyou gbe ọdawẹ. Mẹ be daoma raro kele Jesu evaọ oghẹrẹ nọ me bi yerikugbe aye gbe ọmọ mẹ. Yọ me wo ọdawẹ gaga kẹ inievo abọ-ẹzi mẹ. Aruorokele Jesu o lẹliẹ omẹ wo adhẹẹ gbe ọghọ no, je ru omẹ wuhrẹ epanọ mẹ sai ro wo uyoyou kẹ amọfa no.

 “A bru ọghọ họ omẹ oma.”—GUADALUPE VILLARREAL

UKPE NỌ A YẸ OMẸ: 1964

ORẸWHO MẸ: MEXICO

IKU MẸ: ME JE YERI UZUAZỌ ỌFARIẸ

UZUAZỌ MẸ EVAỌ OKE NỌ U KPEMU: Mẹ yọ omọvo emọ ihrẹ nọ ọsẹgboni mẹ a yẹ, nọ a yọrọ evaọ ẹwho nọ a re se Hermosillo, eva Sonora, Mexico, oria nọ uvuhu o jọ r’obọ duotọ. Ọsẹ mẹ o whu nọ mẹ jọ ọmaha, fikiere oni mẹ ọvo ọ ruẹ uye rẹrote omai. Awọ gheghe mẹ jẹ hae rọ nya keme ugho o jariẹ nọ ma rẹ rọ dẹ eviẹ hẹ. Nọ mẹ gbẹ jọ ọmaha me ro mu iruo họ eru re mẹ sai fi obọ họ evaọ ẹruorote araha uviuwou na. Wọhọ epanọ o jọ kẹ iviuwou buobu, mai kpobi ma jẹ hae keke oma họ uwou nọ u tulo ho.

Evaọ enwenọ okpẹdoke na soso, oni mai ọ jẹ hae jọ uwou re ọ rẹrote omai hi. Nọ mẹ jọ ikpe ezeza, ọmọzae ikpe ikpegbisoi jọ o te mu omẹ họ ẹgba lele wezẹ. Onana o via unuẹse buobu. O wha riẹ ze nọ ẹme owezẹ o rọ jọ omẹ aro gede gede. Me te je roro nọ o thọ họ re me wo isiuru owezẹ kẹ ibe ọmọzae mẹ. Nọ mẹ nya bru edọkita gbe isu ichọche re a fi obọ họ kẹ omẹ, a tẹ vuẹ omẹ nọ oware ovo o thọ kugbe omẹ hẹ, inọ isiuru mẹ na e thọ họ.

Nọ me te ikpe ikpegbene no, mẹ tẹ jiroro nọ mẹ rẹ rọ uruemu gbe osẹ mẹ dhesẹ kẹ akpọ inọ mẹ yọ ohwo nọ o re lele ibe ọzae wezẹ. Uzuazọ yena me yeri evaọ ikpe ikpegbọvo, yọ me lele ezae sa-sa rria epaọ ọzae-avọ-aye. Uwhremu na, me te wuhrẹ iruo eto nọ a re ru je rovie oria iruo obọmẹ. Dede na, me wo evawere he. Mẹ jẹ hai kie ruọ ẹbẹbẹ ẹsikpobi, yọ ahwo nọ me fi eva họ a jẹ hae viẹ omẹ họ. Mẹ ruẹ nọ uzuazọ nọ me bi yeri u kiehọ họ. Me te mu oma mẹ họ ẹnọ inọ, ‘Kọ emamọ ahwo jọ a ginẹ riẹ?’

Me te roro kpahe oniọvo-ọmọtẹ ọkpako mẹ. Isẹri Jihova a je wuhrẹ Ebaibol kugbei, ọ tẹ họ-ame. Ọ jẹ hae vuẹ omẹ eware nọ o je wuhrẹ, rekọ mẹ jẹ gaviezọ kẹe he. Dede na, oghẹrẹ uzuazọ riẹ gbe oghẹrẹ nọ uviuwou-orọo riẹ o jọ o jẹ hae were omẹ. Mẹ ruẹ nọ ọyomariẹ avọ ọzae riẹ a gine wo uyoyou gbe adhẹẹ kẹ ohwohwo. A jẹ rọ ẹwọ yeri kugbe ohwohwo. Nọ oke o be nyaharo na, omọvo Isẹri Jihova jọ o te mu Ebaibol na họ ewuhrẹ kugbe omẹ. Oke ọsosuọ, mẹ jẹ keria ọvo—me gine wo uvi isiuru hu. Rekọ oyena u nwene uwhremu na.

EPANỌ EBAIBOL NA O RO NWENE UZUAZỌ MẸ: Ẹdẹjọ Isẹri na a te zizie omẹ kpohọ ewuhrẹ rai, mẹ tẹ nya. Mẹ re ruobọ oware utioye ẹdẹvo ho. Ahwo a jẹ hai se omẹ ẹkoko, rekọ Isẹri na a ru ere he. A nabi yere omẹ ziezi, je bru ọghọ họ omẹ oma. Onana u duobọte omẹ udu.

Eriwo owoma nọ me wo kpahe Isẹri na ọ ga nọ me kpohọ okokohọ rai. Mẹ ruẹ inọ makọ evaọ udevie ogbotu otiọye dede, ahwo nana a wọhọ oniọvo-ọmọtẹ mẹ—ahwo uzẹme gbe evezi. Mẹ tẹ ta kẹ oma mẹ inọ o sae jọnọ emamọ ahwo nọ mẹ be gwọlọ anwẹdẹ na ena. Uyoyou gbe okugbe rai u gbe omẹ unu, gbe oghẹrẹ nọ a rẹ rọ rehọ Ebaibol na kẹ uyo onọ kpobi. Me vuhumu inọ Ebaibol ọ be kpọ ae, jẹ wọ ae ru ewoma na. Yọ mẹ ruẹ re inọ re mẹ sae jọ omọvo rai, o gwọlọ nọ me re ru inwene buobu evaọ uzuazọ mẹ.

Evaọ uzẹme, o gwọlọ nọ me re nwene uzuazọ mẹ kpobi riẹriẹriẹ, keme me je yeri uzuazọ wọhọ ẹsenọ mẹ rrọ aye dede nọ mẹ yọ ọzae. O gwọlọ nọ me re nwene oghẹrẹ ẹmeọta mẹ, owojẹ mẹ, osẹ, oghẹrẹ nọ me re ru eto mẹ, gbe egbẹnyusu mẹ. Egbẹnyusu mẹ a jẹ nọ omẹ  unu inọ: “Fikieme who bi ro ru onana? Epanọ whọ rrọ anwẹdẹ u kiehọ. Siọ uwuhrẹ Ebaibol ba. Who wo eware kpobi nọ whọ gwọlọ.” Dede na, oware nọ o mae bẹ omẹ enwene kpaobọ họ, uzuazọ ọfariẹ nọ me je yeri.

Rekọ mẹ riẹ nọ o lọhọ re ohwo o ru inwene ilogbo itieye, keme eme nọ e rrọ obe 1 Ahwo Kọrint 6:9-11 i duobọte omẹ udu, o ta nọ: “Wha gbẹ riẹ nọ e nọ ikiẹrẹe he e rẹ sae reuku uvie Ọghẹnẹ hẹ? Wha viẹ oma obọ rai họ họ; hayo eva egbegbe, hayo e nọ e rọ edhọ ẹgọ, hayo ibruẹnwae, hayo igberedha, . . . hayo imuọwhọ, . . . e rẹ sae reuku uvie Ọghẹnẹ hẹ. Ere otu rai jọ ọ jọ. Rekọ a họ owhai, je ru owhai fo.” Jihova o fi obọ họ kẹ ahwo oke yena ru inwene, yọ o fi obọ họ kẹ omẹ re. O rehọ omẹ ikpe buobu gbe omodawọ ogaga, rekọ ohrẹ gbe uyoyou Isẹri na u fi obọ họ kẹ omẹ gaga.

IRERE NỌ ME WO NO: Me bi yeri emamọ uzuazọ enẹna. Mẹ rọo no, mẹ avọ aye mẹ ma be rehọ ehri-izi Ebaibol wuhrẹ ọmọzae mai. Me si obọ no uzuazọ nọ me je yeri vẹre no riẹriẹriẹ, yọ mẹ be reawere eghale gbe uvẹ-iruo sa-sa evaọ egagọ Ọghẹnẹ enẹna. Mẹ yọ ọkpako enẹna evaọ ukoko Isẹri Jihova, yọ me fi obọ họ kẹ amọfa wuhrẹ uzẹme Ẹme Ọghẹnẹ no. Inwene nọ me ru evaọ uzuazọ mẹ e lẹliẹ eva were oni mẹ te epanọ ọ rọ ta nọ a wuhrẹ Ebaibol kugbei, yọ ọ họ-ame no enẹna. Oniọvo-ọmọtẹ mẹ jọ nọ o je yeri uzuazọ ọfariẹ o nwene je zihe ruọ omọvo Isẹri Jihova no re.

Ahwo jọ nọ a riẹ oghẹrẹ uzuazọ nọ me je yeri vẹre a ruẹ nọ me gine zihe ruọ emamọ ohwo no. Yọ mẹ riẹ oware nọ u ru inwene yena lọhọ. Oke ọsosuọ mẹ jẹ hae nya bru edọkita gbe isu-egagọ kẹ obufihọ, rekọ a jẹ kẹ omẹ ekpehre ohrẹ. Jihova o fi obọ họ kẹ omẹ. Dede nọ me rri oma mẹ nọ me fioka ha, Jihova o muẹrohọ omẹ je wo odiri gbe uyoyou kẹ omẹ. O kẹ omẹ uduotahawọ gaga nọ mẹ ruẹ nọ Ọghẹnẹ erumeru nọ o wo areghẹ gbe uyoyou ulogbo utioye o se omẹ gb’ohwo jẹ gwọlọ nọ me yeri emamọ uzuazọ.

“O jọ omẹ oma inọ mẹ rrọ goli jẹ kare uvi evevọwẹ evaọ uzuazọ.”—KAZUHIRO KUNIMOCHI

UKPE NỌ A YẸ OMẸ: 1951

ORẸWHO MẸ: JAPAN

IKU MẸ: ỌGBA EBASIKORO EDHẸ

UZUAZỌ MẸ EVAỌ OKE NỌ U KPEMU: Ẹwho unueri evaọ Shizuoka Prefecture, Japan, nọ edo ọ jẹ hae jọ tere he mẹ jọ whẹro, uviuwou mai orọ imaree ma jẹ rria umuwou osese jọ. Ọsẹ mẹ ọ jẹ hae zẹ jẹ ruẹrẹ ebasikoro. Nọ mẹ gbẹ jọ ọmaha, ọ jẹ hae wha omẹ lele oma nyai rri arozaha ebasikoro edhẹ, u te ru nọ me ro wo isiuru kpahe iẹe. Ọsẹ mẹ o te mu omaa họ ẹma re mẹ jọ ọgba ebasikoro edhẹ. Nọ mẹ gbẹ jọ isukulu epramare, ọsẹ mẹ o te mu omẹ ebasikoro edhẹ họ ewuhrẹ. Nọ mẹ jọ ekọleji, mẹ rehọ oria ọsosuọ ikpe esa othotha evaọ usu egba orẹwho na soso. A kẹ omẹ okẹ-ewuhrẹ-ọvọvẹ nọ me re ro kpohọ yunivasiti, rekọ mẹ se riẹ, me te kpohọ isukulu nọ a rẹ jọ wuhrẹ egba ebasikoro edhẹ. Nọ mẹ jọ ikpe ikpegbizii, yọ me zihe ruọ ọgba edhadhẹ no.

Oke yena, utee mẹ evaọ uzuazọ họ, epanọ mẹ rẹ rọ jọ ọgba ọsosuọ evaọ orẹwho Japan soso k’ukpe k’ukpe. Mẹ gwọlọ nọ me re fe re mẹ sai fi obọ  họ kẹ uviuwou mẹ yeri emamọ uzuazọ. Mẹ rọ oma kpobi kẹ uwuhrẹ na. Oke kpobi nọ abọjọ uwuhrẹ edhadhẹ na o tẹ bẹ omẹ gaga, mẹ jẹ hae vuẹ omamẹ nọ ebasikoro edhẹ a yẹ omẹ ze kẹ gbe inọ oghẹrẹ kpobi kẹhẹ mẹ rẹ daoma. Yọ me gine le utee na t’obọ. Mẹ ginẹ ruẹ erere omodawọ mẹ. Evaọ ukpe ọsosuọ nọ me nwrotọ no uwuhrẹ mẹ no, mẹ kobaro evaọ usu amọfa nọ a nwrotọ no isukulu na ze obọ re. Evaọ ukpe avivẹ, mẹ dhẹ woma te epanọ a rọ salọ omẹ fihọ usu ahwo nọ a te dhẹ nọ a te rọ riẹ ọgba Japan soso. Isiazeza mẹ rehọ oria avivẹ evaọ usu ahwo nana.

Fikinọ mẹ jẹ hae jọ omọvo ahwo nọ a kobaro ẹsikpobi, a te mu odẹ-ovao kẹ omẹ nọ “awọ ọgaga ọrọ Tokai,” ubrotọ jọ evaọ Japan. Omuhrowo o daruọ omẹ azẹ. Ahwo a te ti mu ozọ mẹ họ ẹdhẹ keme mẹ jẹ hai rri ohwo aro ho nọ me te muhọ ẹdhẹ no. Me te ti wo ugho ziezi, yọ mẹ jẹ sae dẹ oware kpobi nọ o were omẹ. Mẹ dẹ uwou jọ nọ a bọ oria oma-uru-jaja fihọ nọ ekwakwa oma-uru-jaja nọ e mai woma e jọ. Mẹ tẹ jẹ dẹ omoto nọ a jọ orẹwho ofa ku nọ unuigho riẹ o joma te ugho nọ a sae rọ bọ uwou. Re mẹ seba ekie, mẹ tẹ jẹ dẹ etọ jẹ bọ iwou hotọ, je fi igho họ ekọmpene gbe ekiọthuọ amọfa nọ a rẹ jọ ghale erere te omẹ.

Dede na, o jọ omẹ oma inọ mẹ rrọ goli jẹ kare uvi evevọwẹ evaọ uzuazọ. Oke yena yọ mẹ rọo je wo emọ no, rekọ ẹsibuobu mẹ jẹ hai dhuaro ku uviuwou mẹ. Mẹ jẹ hae va ku aye gbe emọ mẹ fiki omoware kpobi nọ o via. U te epanọ a jẹ hai ro no ovao mẹ rri sọ u bi ti kuye iwiri.

Nọ oke o be nyaharo na, Isẹri Jihova a te mu Ebaibol họ ewuhrẹ kugbe aye mẹ. Oyena o wha inwene buobu ze. Aye mẹ ọ tẹ vuẹ omẹ nọ ọ gwọlọ kpohọ ewuhrẹ Isẹri Jihova, fikiere mẹ tẹ ta nọ mai uviuwou na soso ma tubẹ nya. Mẹ rẹ gbẹ sae kareghẹhọ owọwọ ẹdẹ nọ ọkpako ukoko na jọ ọ rọ ziọ uwou mai ti mu uwuhrẹ Ebaibol họ kugbe omẹ. Eware nọ me wuhrẹ i duobọte omẹ udu gaga.

EPANỌ EBAIBOL NA O RO NWENE UZUAZỌ MẸ: Oghẹrẹ nọ oware nọ me se evaọ obe Ahwo Ẹfẹsọs 5:5 u duobọte omẹ udu te o rẹ thọrọ omẹ ẹro ho. O ta nọ: “Ogberedha ọvuọvo, hayo ọnọ ọ kare ẹfuọ, hayo ọnọ ọ rẹ guọlọ eware amọfa, (ọyena yọ ọgẹdhọ); o wo ukuoriọ eva uvie Kristi gbe orọ Ọghẹnẹ hẹ.” Mẹ ruẹ nọ omuhrowo ebasikoro edhẹ u wobọ kugbe edhọ-ifio, yọ o rẹ wha ẹzi uvou-uthei haro. Udu mẹ u te je brukpe omẹ. Mẹ tẹ vuẹ omamẹ nọ mẹ tẹ gwọlọ ru Jihova Ọghẹnẹ eva were, me re si obọ no omuhrowo ebasikoro edhẹ. Rekọ owojẹ nana o jọ bẹbẹ kẹ omẹ.

Ukpe yena mẹ mai wo obokparọ evaọ ebasikoro edhẹ na, yọ mẹ gbẹ gwọlọ kparo viere. Rekọ mẹ ruẹ inọ ewuhrẹ Ebaibol o jẹ kẹ omẹ ẹzi udhedhẹ—onọ u wo ohẹriẹ gaga no oghẹrẹ ẹzi nọ o gwọlọ mi omẹ re mẹ sae kparobọ evaọ omuhrowo edhadhẹ na. Isiasa ọvo mẹ wariẹ dhẹ nọ me mu Ebaibol họ ewuhrẹ no, dede na udu mẹ o gbẹ jọ edhadhẹ na. Yọ mẹ riẹ oghẹrẹ nọ mẹ te sae rọ ko uviuwou mẹ hẹ nọ me te si obọ no edhadhẹ na. Mẹ gbẹ riẹ onọ me re ru hu, yọ imoni mẹ a be ta udu mẹ raha kpahe egagọ nana nọ mẹ be ro na. Iroro nana nọ mẹ jẹ na o kẹ ọsẹ mẹ uye gaga. Idhọvẹ mẹ i te epanọ e rọ lẹliẹ omẹ wo ẹyao omola-eva.

Uwuhrẹ Ebaibol gbe iwuhrẹ Isẹri Jihova enya nọ mẹ ruabọhọ i fi obọ họ kẹ omẹ gaga etoke yena. Ẹmẹrera na, ẹrọwọ mẹ ọ tẹ te ga. Mẹ yare Jihova inọ ọ gaviezọ kẹ elẹ mẹ je fi obọ họ kẹ omẹ ruẹ nọ ọ be ginẹ gaviezọ. Awaọruọ mẹ o kpotọ gaga nọ aye mẹ ọ kẹ omẹ imuẹro inọ ọyomariẹ ọ gwọlọ okpuwou re ọ tẹ wereva ha. Ẹmẹrera na, mẹ tẹ te nyaharo ziezi.

IRERE NỌ ME WO NO: Me vuhumu nọ eme Jesu nọ e rrọ Matiu 6:33 na ginọ uzẹme. Ọ ta nọ: “Wha kake guọlọ uvie riẹ gbe ẹrẹreokie riẹ, eware enana kpobi a reti fi ai họ kẹ owhai.” Eware efa nọ e r’oja kẹ uzuazọ uyero, nọ Jesu ọ ta ẹme te na, e re te kare omai ẹdẹvo ho. A tẹ ghale ugho nọ me je wo evaọ edhadhẹ ebasikoro kpohọ abọ ọgba, abọvo riẹ me bi wo enẹna, rekọ mẹ avọ uviuwou mẹ ma re te rioja oware ovo ho anwọ ikpe udhe nọ e vrẹ na.

Oware uwoma ofa jọ họ, nọ me te kuomagbe inievo abọ-ẹzi mẹ evaọ egagọ hayo bi ru eware efa kugbe ae, me re wo oghẹrẹ evawere gbe evevọwẹ nọ mẹ jẹ hai wo ho. Oke o rẹ dhẹ vẹrẹ w’umuo ho nọ ma tẹ rrọ kugbe. Uzuazọ uyero uviuwou mẹ u woma gaga no re. Emezae esa mẹ avọ ọvuọ aye riẹ a be gọ Jihova enẹna.