Wuhrẹ No Ẹme Ọghẹnẹ ze

Fikieme Ọghẹnẹ Ọ rọ Kuvẹ kẹ Emuemu gbe Uye-Oruẹ?

Uzoẹme nana u dhunu te enọ jọ nọ o rẹ sae jọnọ whọ nọ no ẹdẹjọ, u te je dhesẹ oria nọ whọ rẹ sae jọ ruẹ iyo na evaọ Ebaibol ra. O te were Isẹri Jihova re a lele owhẹ ta ẹme kpahe iyo na.

1. Ẹvẹ emuemu o ro muhọ?

Emuemu o muhọ evaọ otọakpọ okenọ Setan o ro tu gu ọrue. Setan ọ jọ omuomu hu evaọ okenọ a mae. Ọ jọ ukọ-odhiwu ọgbagba, rekọ o dikihẹ ga evaọ “uzẹme” he. (Jọn 8:44) O je siuru epanọ o re ro wo egagọ nọ i te Ọghẹnẹ ọvo. Setan o gu ọrue kẹ Ivi, aye ọsosuọ na, jẹ viẹe họ yoẹme kẹ ọyomariẹ viukpọ Ọghẹnẹ. Adamu o kuomagbe Ivi ghẹmeeyo kẹ Ọghẹnẹ. Owojẹ Adamu o tẹ wha uye-oruẹ gbe uwhu ze.—Se Emuhọ 3:1-6, 17-19.

Ẹkwoma Ivi nọ Setan ọ viẹ họ ghẹmeeyo kẹ Ọghẹnẹ, Setan ọ to ọwọsuọ họ mukpahe udu-esuo Ọghẹnẹ. Ahwo buobu evaọ akpọ na a ruabọ Setan no be siọ udu-esuo Ọghẹnẹ. Enẹ Setan o ro zihe ruọ “okpohwo [hayo, osu] akpọ ọnana.”—Se Jọn 14:30; Eviavia 12:9.

2. Kọ Ọghẹnẹ ọ ma emama riẹ avọ ethobọ?

Ahwo-akpọ gbe ikọ-odhiwu kpobi nọ Ọghẹnẹ ọ ma a jọ gbagba, epanọ a hẹ sai ro yoẹme kẹ izi riẹ gbagba. (Iziewariẹ 32:5) Ọghẹnẹ ọ ma omai avọ ufuoma nọ ma sae rọ salọ eruo oware uwoma hayo uyoma. Ufuoma yena o kẹ omai uvẹ nọ ma sai ro dhesẹ nọ ma you Ọghẹnẹ.—Se Jemis 1:13-15; 1 Jọn 5:3.

3. Fikieme Ọghẹnẹ ọ rọ kẹ uye-oruẹ uvẹ?

Jihova ọ kẹ ọwọsuọ mukpahe udu-esuo riẹ uvẹ no anwọ oke ọgbọ Idẹn ze. Fikieme? Re o dhesẹ via inọ esuo ohwo-akpọ ababọ riẹ o rẹ sae wha ewoma ze he. (Jerimaya 10:23) Ikpe idu ezeza (6,000) nọ e vrẹ nọ ahwo-akpọ a bi ro su omarai na, u ru uzẹme na dhesẹ oma via no. Isu ahwo-akpọ a re sai si ẹmo, ethube, okienyẹ, gbe ẹyao n’otọ họ.—Se Ọtausiuwoma Na 7:29; 8:9; Ahwo Rom 9:17.

Wo ohẹriẹ, ahwo nọ a jẹ Ọghẹnẹ rehọ wọhọ Osu rai a bi wo erere. (Aizaya 48:17, 18) Kẹle na, Jihova o ti si esuo ahwo-akpọ kpobi n’otọ. Ahwo nọ e salọ nọ Ọghẹnẹ o su ai ọvo họ enọ e te rria otọakpọ na.—Aizaya 2:3, 4; 11:9; se Daniẹl 2:44.

  4. Uvẹ vẹ akothiho Ọghẹnẹ u rovie kẹ omai?

Setan o seha inọ ohwo ọvo ọ te sae roma kpotọ kẹ Jihova ha. Akothiho Ọghẹnẹ o be kẹ omai kpobi uvẹ nọ ma re ro dhesẹ sọ abọ esuo Ọghẹnẹ hayo ọrọ ahwo-akpọ ma rrọ. Ma rẹ rọ oghẹrẹ nọ ma be rria uzuazọ mai dhesẹ abọ nọ ma rrọ.—Se Job 1:8-11; Itẹ 27:11.

5. Oghẹrẹ vẹ ma re ro dhesẹ nọ ma jẹ Ọghẹnẹ rehọ wọhọ Osu mai?

Ma re dhesẹ nọ ma salọ Ọghẹnẹ wọhọ Osu mai nọ ma tẹ be gọe evaọ egagọ uzẹme nọ i bi ru lele Ẹme riẹ, Ebaibol na. (Jọn 4:23) Ma rẹ jẹ whaha omadhehọ esuo-ohrowo gbe ẹmo-ofio, wọhọ epanọ Jesu o ru.—Se Jọn 17:14.

Setan ọ be rọ ogaga riẹ wha ọfariẹ-ogbe avọ iruemu iyoma efa haro. Egbẹnyusu gbe imoni mai jọ a rẹ sae poviẹ hayo wọso omai nọ ma te si oma no iruemu yena. (1 Pita 4:3, 4) Fikiere, ẹsalọ na obọmai o rrọ. Kọ ma ti kuomagbe ahwo nọ i you Ọghẹnẹ? Kọ ma ti yoẹme kẹ izi riẹ nọ i dhesẹ areghẹ gbe uyoyou riẹ via na? Ma te ru ere, yọ ma bi dhesẹ nọ ọrue Setan o gu nọ ọ ta inọ ohwo ọvo o ti yoẹme kẹ Ọghẹnẹ hẹ na.—Se 1 Kọrint 6:9, 10; 15:33.

Rọkẹ evuẹ efa, rri uzou avọ 11 orọ obe nana, Eme Ebaibol na O Gine Wuhrẹ? onọ Isẹri Jihova a kere.

[Uwoho nọ o rrọ ẹwẹ-obe avọ 24]

Adamu ọ salọ abọ oyoma

[Uwoho nọ o rrọ ẹwẹ-obe avọ 25]

Oghẹrẹ nọ ma bi yeri uzuazọ u re dhesẹ sọ ma gwọlọ nọ Ọghẹnẹ ọ jọ Osu mai