Wuhrẹ No Ẹme Ọghẹnẹ ze

Kọ Ẹruore Ọ Rrọ kẹ Enọ I Whu No?

Uzoẹme nana u dhunu te enọ jọ nọ o rẹ sae jọnọ whọ nọ no ẹdẹjọ, u te je dhesẹ oria nọ whọ rẹ sae jọ ruẹ iyo na evaọ Ebaibol ra. O te were Isẹri Jihova re a lele owhẹ ta ẹme kpahe iyo na.

1. Ẹruore vẹ ọ rrọ kẹ enọ i whu no?

Nọ Jesu o te ẹwho Bẹtani nọ o kẹle Jerusalẹm, yọ edẹ ene e vrẹ no anwẹnọ Lazarọs ogbẹnyusu riẹ o ro whu. Jesu avọ Mata gbe Meri, inievo-emetẹ Lazarọs nọ o whu na a te kpohọ oria nọ a ki rie fihọ. O raha oke he, ahwo buobu a te koko wariẹ ae họ. A re gbiku oghọghọ nọ o jọ udu Mata avọ Meri hi nọ Jesu ọ kpare Lazarọs ziọ uzuazọ!—Se Jọn 11:20-24, 38-44.

Mata o wo ẹrọwọ inọ a te kpare otu nọ o whu no zihe ziọ uzuazọ. U kri no nọ idibo Jihova nọ i wo ẹrọwọ a riẹ inọ evaọ obaro, Ọghẹnẹ ọ te kpare ahwo nọ a whu no zihe ziọ uzuazọ.—Se Job 14:14, 15.

2. Didi uyero iwhuowhu na e rrọ?

Dede nọ ẹgba uzuazọ hayo “ẹzi” oye u re ru ahwo-akpọ gbe erao jọ uzuazọ, mai yọ ẹzi nọ ọ be rria ugboma jọ gheghe he. (Ọtausiuwoma Na 3:19; Emuhọ 7:21, 22) Mai yọ oma uwo nọ a ma no ovu-otọ ze. (Emuhọ 2:7; 3:19) Nọ ẹvori mai ọ tẹ siọ iruo ba, yọ iroro mai e raha no. Fikiere, nọ a kpare Lazarọs no uwhu ze, ọ ta ha inọ ọ rọ ẹro ruẹ oware jọ, keme enọ i whu no e riẹ onahona ha.—Se Olezi 146:4; Ọtausiuwoma Na 9:5, 10.

O rrọ vevẹ, enọ i whu no a rẹ sae ruẹ uye he. Fikiere, uwuhrẹ na inọ Ọghẹnẹ ọ rẹ lahiẹ ahwo nọ a te whu no yọ ọrue. Uwuhrẹ yena o be raha odẹ Ọghẹnẹ. Re a fi ahwo họ erae mahe o rẹ dha Ọghẹnẹ eva.—Se Jerimaya 7:31.

  3. Kọ ma rẹ sai lele ahwo nọ a whu no ta ẹme?

Enọ i whu no a rẹ sae ta ẹme he. (Olezi 115:17) Rekọ ijẹle imuomu a re lele ahwo ta ẹme, a vẹ be viẹ ahwo họ inọ ae yọ izi ahwo nọ a whu no. (2 Pita 2:4) Jihova ọ ta nọ o thọ re ohwo ọ gwọlọ lele iwhuowhu ta ẹme.—Se Iziewariẹ 18:10, 11.

4. Amono a te kpare no uwhu ze?

Evaọ akpọ ọkpokpọ nọ ọ be tha na, a te kpare ima ahwo buobu nọ e rrọ uki zihe ziọ uzuazọ. Makọ otujọ nọ i ru eware iyoma fikinọ a riẹ Jihova ha, a te kpare ae ze.—Se Luk 23:43; Iruẹru Ikọ Na 24:15.

Ahwo nọ a kpare ze a te sai wuhrẹ uzẹme na kpahe Ọghẹnẹ je fi ẹrọwọ họ Jesu ẹkwoma erulele ẹme riẹ. (Eviavia 20:11-13) Enọ i ti ru ewoma evaọ usu ahwo nọ a te kpare ze na a te reawere uzuazọ ebẹdẹ bẹdẹ evaọ otọakpọ na. Dede na, otujọ evaọ usu enọ a te kpare ze na a te ruabọhọ eyoma oruo. Evaọ ukuhọ riẹ, ẹkparomatha ahwo otiọye na o te jọ orọ enọ e “kparoma ruọ oziẹobro.”—Se Jọn 5:28, 29.

5. Eme ọruẹrẹfihotọ ẹkparomatha na u wuhrẹ omai kpahe Jihova?

Obọ nọ Ọghẹnẹ o si no Ọmọ riẹ ze re ọ rọ uzuazọ riẹ ta omai u ru nọ ẹkparomatha nana o te rọ lọhọ. Fikiere, ẹkparomatha na yọ odhesẹvia uyoyou gbe aruoriwo Jihova.—Se Jọn 3:16; Ahwo Rom 6:23.

Rọkẹ evuẹ efa, rri uzou avọ 6 gbe orọ avọ 7 orọ obe nana, Eme Ebaibol na O Gine Wuhrẹ? onọ Isẹri Jihova a kere.

[Uwoho nọ o rrọ ẹwẹ-obe avọ 26]

Ovu-otọ a rọ ma Adamu