Wuhrẹ Emọ ra

Kọ Oma O rẹ j’Owhẹ Goli avọ Ozọ Ẹsejọ?

AHWO buobu nẹnẹ a rẹ jọ goli; a re roro nọ ohwo ọvo ọ be daezọ rai hi. Ahwo nọ e kpako no a re roro ere ẹsibuobu. Rekọ emọ buobu nẹnẹ, makọ enọ e be gọ Ọghẹnẹ dede a be hae jọ goli avọ ozọ re. Kọ whọ riẹ oware nọ o soriẹ?— *

Eware buobu e rẹ sae wha onana ze. Joma ta ẹme kpahe oriruo ọzae jọ nọ ọ rria etoke thethei nọ u kpemu—oware wọhọ ikpe odu ọvo taure a te ti yẹ Jesu. Elaeja họ odẹ ọzae na. Ọ rria okenọ orẹwho Izrẹl u ro kiuke ku egagọ Ọghẹnẹ uzẹme na, Jihova. Ibuobu ahwo na a jẹ gọ Ebale, ọghẹnẹ ọrue. Elaeja ọ ta nọ: “Mẹ oma mẹ ọvo, me kiọkọ.” Rekọ who roro nọ Elaeja ọvo o gine kiọkọ nọ ọ jẹ gọ Jihova?—

Dede nọ Elaeja ọ riẹ hẹ, amọfa a gbẹ jọ Izrẹl nọ a jẹ gọ Ọghẹnẹ uzẹme na. Rekọ a dhẹ dhere evaọ oke nana. Ozọ u je mu ai. Kọ whọ riẹ oware nọ o soriẹ?—

Ehab, ovie Izrẹl, ọ jẹ gọ Jihova ha; ọ jẹ gọ Ebale, ọghẹnẹ ọrue nọ aye ọgeva riẹ, Jezibẹl ọ jẹ gọ. Fikiere, aye na avọ Ehab a jẹ gwọlọ ahwo nọ e jẹ gọ Jihova re a kpe ai no, maero kọ Elaeja. Oye o wha riẹ ze nọ Elaeja ọ rọ dhẹ dhere. Ọ dhẹ kpohọ udhude Horẹb, oria nọ a jọ Ebaibol na se Saena re, onọ u thabọ te enwenọ emaele udhusoi akuasa (300). Ikpe udhusoi buobu nọ i kpemu taure a te ti yẹ Elaeja, etenẹ Jihova ọ jọ kẹ idibo riẹ Ijaje  Ikpe na gbe izi efa. Elaeja o siomano eghogho-utho jọ evaọ Horẹb. Kọ who roro nọ u fo re ozọ u mu Elaeja?—

Ebaibol na ọ ta nọ taure onana o tẹ te via, Jihova ọ rọ Elaeja ru iruo igbunu ilogbo. Etoke jọ o jariẹ nọ Jihova ọ k’uyo olẹ Elaeja inọ o vi erae no obọ odhiwu ze te mahe idhe riẹ. Jihova ọ rọ oyena dhesẹ inọ Ọye họ Ọghẹnẹ uzẹme na orọnikọ Ebale he. Nọ Elaeja ọ jọ eghogho-utho na, Jihova ọ ta ẹme kẹe.

Jihova ọ nọ riẹ nọ: ‘Eme whọ rọ etenẹ ru?’ Oke nana Elaeja ọ rọ ta nọ, ‘Mẹ ọvo me kiọkọ evaọ usu ahwo nọ e be gọ owhẹ.’ Jihova ọ rọ ẹwo kpọ Elaeja họ inọ, ‘Me gbe wo ahwo idu ihrẹ nọ e be gọ omẹ.’ Jihova ọ tẹ ta kẹ Elaeja inọ o zihe, inọ o gbe wo iruo kẹe nọ o ti ru.

Eme who roro nọ ma rẹ sai wuhrẹ no oriruo Elaeja ze?— Makọ ahwo nọ a be gọ Jihova a rẹ sae dhozọ ẹsejọ. Fikiere, o gwọlọ nọ mai kpobi, te emaha te ekpako, ma hae kareghẹhọ yare Jihova kẹ obufihọ. Ebaibol na ọ ya eyaa inọ: “ỌNOWO na ọ kẹle enọ i [bi] bo se ei kpobi.”

Oware ofa o riẹ nọ ma re wuhrẹ no ikuigbe nana ze: Ma jọ oria kpobi wo inievo-emezae gbe inievo-emetẹ nọ i you Jihova je you omai. Ebaibol na ọ ta nọ: “Uye utiona ovo na egbobọ te imoni [mai] nọ erọ akpọ na soso du.” Kọ eva e gbẹ be were owhẹ nọ whọ rọ riẹ nọ ma rrọ goli hi?—

Jọ Ebaibol Ra Se

1 Ivie 19:3-18

Iziewariẹ 5:1-22

Olezi 145:18

1 Pita 5:9

[Oruvẹ-obotọ]