Oware Nọ Uvuhu Ogaga O Ginẹ Rrọ

UVUHU ogaga u re fi uzuazọ ohwo họ ọza. Uyero nọ ohwo ọ rẹ jọ ruẹ emu re d’oma ha, ruẹ ame tere he gbe onọ ọ rẹ tubẹ jọ ruẹ eware nọ a re ro koko erae họ, o tẹ jẹ kẹre te ababọ emamọ uwou, ababọ ẹruorote abọ usiwo-imu gbe uvẹ ewuhrẹ isukulu. Ahwo nọ a rrọ uyero utionana a bu te ima odu ọvo wariẹ akpọ na họ, unu nọ u bu te enwenọ ahwo nọ e rrọ America soso. Dede na, ahwo buobu evaọ eria wọhọ Western Europe gbe North America a riẹ oware nọ uvuhu ogaga o rrọ họ. Fikiere, joma yo mi ahwo jọ nọ uvuhu ogaga o rrọ oma.

Mbarushimana avọ aye gbe emọ isoi riẹ a be rria orẹwho Rwanda, evaọ Africa. Uliaro u kpe ọmọ avọ ezeza riẹ. Mbarushimana ọ ta nọ: “Ọsẹ mẹ ọ ghale otọ riẹ kẹ omai emọ ezeza nọ ọyomariẹ o yẹ. Ẹwẹ-otọ nọ o te omẹ o kawo vi epanọ o sai ro te omẹ avọ uviuwou mẹ ko oma, fikiere ma tẹ kwa kpohọ ẹwho nọ o rovie aro. Ekpa ibitho gbe ẹkpẹ eye mẹ avọ aye mẹ ma be wọ kẹ ahwo ro wo ugho. Uwou nọ ma be rria u wo iwindo ho. Ozae nọ o rrọ ogba iporisi ma re kpohọ jo vo ame. Ẹsiẹvo ma rẹ riemu evaọ okpẹdẹ, rekọ ẹdẹ nọ ma ruẹ iruo ru hu, ma vẹ jọ eveva okpẹdẹ na soso. Ẹdẹ otiọye na, me re no uwou no—mẹ rẹ sai thihakọ riẹ hẹ nọ mẹ tẹ be ruẹ emọ mẹ nọ i bi bo ubo ohọo yọ emu ọ riẹ hẹ.”

Victor avọ Carmen yọ imava-orọo nọ okọ rai o rrọ eviẹ eruẹrẹ. Te ai te emọ isoi rai a be rria ẹwho jọ nọ o siomano evaọ Bolivia. A haya ubruwou ovo jọ be rria evaọ uwou ẹkpẹ nọ o joma kporo no nọ idhe riẹ i bi fi, yọ u wo ikpẹ ẹlẹtriki hi. Emọ nọ e rrọ isukulu ẹwho na a bu vi ekwakwa nọ a re ro wuhrẹ evaọ isukulu na, u te ru nọ Victor ọvo o ro ku emẹjẹ avọ agbara kẹ ọmọtẹ riẹ re ọ sae rọ oma da oria jọ wuhrẹ. Re ọzae-avọ-aye nana a sae ruẹ ire nọ a re ro koko erae họ ro there emu je there ame nọ a rẹ da, a rẹ nya ugbo emaele ezeza. Aye na, Carmen, ọ ta nọ: “Ma wo oria ame-okuo ho. Fikiere, abotọ ethẹ ma re kpohọ jo kuame, yọ ethẹ ọvo nana ma rẹ jọ họ je ku ezuzu fihọ. Emọ mai i re dhe ẹmẹmọ.”

Francisco avọ Ilídia yọ imava-orọo nọ e be rria iwhre jọ evaọ Mozambique. Emọ ene a wo enẹna; uliaro u kpe ọrọ avọ isoi fikinọ edọkita ọ rọwo siwi ei hi. Ọzae-avọ-aye nana a rẹ kọ isikapa gbe iduku nọ i re te ai re evaọ emerae esa fihọ otọ osese rai. Ọzae na  Francisco, ọ ta nọ: “Ẹsejọ, uvo ogaga o rẹ raha ekakọ mai yọ iji i re tho ae, onana u ve ru nọ me re ro ko ikpoko zẹ kẹ ahwo nọ a rẹ rọ bọ iwou. Ma rẹ jẹ nya onya euwa ivẹ nyai ko ire nọ ma re ro koko erae họ. Mẹ avọ aye mẹ ma rẹ wọ ọvuọ ekru-ire riẹ, ma rẹ rọ ojọ there ẹbẹ evaọ ẹkpoka na, ma vẹ zẹ onọ u kiọkọ.”

Ahwo buobu a rri rie inọ okienyẹ o rrọ re omọvo evaọ usu imahrẹ kpobi evaọ akpọ na ọ rioja uvuhu wọhọ Mbarushimana, Victor, gbe Francisco, kpakiyọ ima ahwo buobu efa a be ruẹ re kiọkọ. Ahwo jọ a daoma no re a ruẹ nọ a ru oware jọ kpahe onana. Uzoẹme nọ o rrọ aro na o ta kpahe omodawọ rai.

[Uwoho nọ o rrọ ẹwẹ-obe avọ 3]

Carmen avọ emọ ivẹ riẹ nọ a be jọ ethẹ vo ame