Wuhrẹ No Ẹme Ọghẹnẹ Ze

Ẹvẹ Whọ Sai ro Si Kẹle Ọghẹnẹ?

Uzoẹme nana u dhunu te enọ jọ nọ o rẹ sae jọnọ whọ nọ no ẹdẹjọ, u te je dhesẹ oria nọ whọ rẹ sae jọ ruẹ iyo na evaọ Ebaibol ra. O te were Isẹri Jihova re a lele owhẹ ta ẹme kpahe iyo na.

1. Kọ Elẹ Kpobi Ọghẹnẹ Ọ rẹ Gaviezọ Kẹ?

Jihova o zizie ahwo erẹwho kpobi inọ a si kẹle iẹe evaọ olẹ. (Olezi 65:2) Rekọ orọnọ elẹ kpobi ọ rẹ gaviezọ kẹ hẹ. Wọhọ oriruo, evaọ okenọ ahwo Izrẹl a ruabọhọ emuemu, Ọghẹnẹ ọ gaviezọ kẹ elẹ rai hi. (Aizaya 1:15) Ofariẹ, elẹ ọzae nọ ọ rẹ lahiẹ aye riẹ e rẹ sai brudhe. (1 Pita 3:7) Dede na, Ọghẹnẹ ọ rẹ gaviezọ kẹ elẹ ahwo nọ a thọ izi ilogbo dede rekinọ a kurẹriẹ.—Se 2 Iruẹru-Ivie 33:9-13.

2. Oghẹrẹ vẹ u fo nọ ma rẹ lẹ?

Olẹ yọ uvẹ-ọghọ, o tẹ jẹ rrọ abọjọ egagọ mai, fikiere, Jihova ọvo u fo nọ ma rẹ lẹ se. (Matiu 4:10; 6:9) Nọ ma gba ha na, u fo nọ ma rẹ rọ odẹ Jesu lẹ keme ọye họ “edhere na,” nọ Ọghẹnẹ ọ jẹrehọ. (Jọn 14:6) Jihova ọ gwọlọ nọ ma hae wariẹ elẹ nọ ma se fihọ uzou hayo nọ ma kere fihọ obe he, ọ gwọlọ nọ ma lẹ no udu ze.—Se Matiu 6:7; Ahwo Filipai 4:6, 7.

Ọghẹnẹ ọ rẹ sai yo elẹ nọ ma lẹ h’eva dede. (1 Samuẹle 1:12, 13) O zizie omai nọ ma lẹ evaọ otọ uyero kpobi, wọhọ oriruo, nọ ma tẹ rọwo ze gbe evaọ urere okpẹdoke, nọ ma tẹ be re emu gbe okenọ ma rẹriẹ ovao ku ebẹbẹ.—Se Olezi 55:22; Matiu 15:36.

3. Fikieme u ro fo re Ileleikristi a hai kuomagbe?

O lọhọ tere he re ma si kẹle Ọghẹnẹ keme ma be rria udevie ahwo nọ a kare ẹrọwọ je bi se ẹkoko kpahe eyaa Ọghẹnẹ erọ akpọ ọkpokpọ udhedhẹ. (2 Timoti 3:1, 4; 2 Pita 3:3, 13) Fikiere, o gwọlọ nọ ma rẹ hai kuomagbe ibe Ileleikristi mai re ma sai wo ọbọga.—Se Ahwo Hibru 10:24, 25.

Whọ rẹ sai si kẹle Ọghẹnẹ nọ who te mu usu kugbe ahwo nọ a you Ọghẹnẹ. Whọ rẹ jọ obọ iwuhrẹ Isẹri Jihova ruẹ uvẹ sa-sa nọ who re ro wo erere no ẹrọwọ amọfa ze.—Se Ahwo Rom 1:11, 12.

  4. Ẹvẹ whọ sai ro si kẹle Ọghẹnẹ?

Whọ rẹ sai si kẹle Ọghẹnẹ nọ whọ tẹ be hai roro didi kpahe eware nọ who wuhrẹ no Ẹme riẹ, Ebaibol na ze. Hai roro kpahe iruẹru, ithubro, gbe eyaa riẹ. Whọ tẹ be hae lẹ jẹ hai roro didi, u ti ru nọ who ti ro wo ovuhumuo kẹ uyoyou Ọghẹnẹ gbe areghẹ riẹ.—Se Joshua 1:8; Olezi 1:1-3.

Re whọ sai si kẹle Ọghẹnẹ, o gwọlọ nọ who re fi ẹrọwọ họ iẹe jẹ rọ ẹro suẹe. Rekọ ẹrọwọ o wọhọ okakọ nọ o gwọlọ ẹruorote. O gwọlọ nọ whọ rẹ rẹrote ẹrọwọ ra ẹsikpobi ẹkwoma ẹkiẹriwo eware nọ e lẹliẹ owhẹ wo ẹrọwọ na.—Se 1 Ahwo Tẹsalonika 5:21; Ahwo Hibru 11:1, 6.

5. Ẹvẹ esikẹle Ọghẹnẹ o rẹ rọ kẹ owhẹ erere?

Jihova ọ rẹ sẹro ahwo nọ a you rie. Ọ rẹ thọ ai no oware kpobi nọ o rẹ sai fi ẹrọwọ gbe ẹruore uzuazọ ebẹdẹ bẹdẹ rai họ ọza. (Olezi 91:1, 2, 7-10) Ọ rẹ vẹvẹ omai unu kpahe uzuazọ uyero nọ o rẹ sai fi omokpokpọ gbe evawere mai họ ọza. Jihova o bi wuhrẹ omai edhere uzuazọ nọ o mai woma kpaobọ.—Se Olezi 73:27, 28; Jemis 4:4, 8.

Rọkẹ evuẹ efa, rri uzou avọ 17 orọ obe nana, Eme Ebaibol na O Gine Wuhrẹ? onọ Isẹri Jihova a kere.