Wuhrẹ No Ẹme Ọghẹnẹ Ze

Ẹvẹ Whọ Sai ro Vuhu Egagọ Uzẹme?

Uzoẹme nana u dhunu te enọ jọ nọ o rẹ sae jọnọ whọ nọ no ẹdẹjọ, u te je dhesẹ oria nọ whọ rẹ sae jọ ruẹ iyo na evaọ Ebaibol ra. O te were Isẹri Jihova re a lele owhẹ ta ẹme kpahe iyo na.

1. Kọ egagọ uzẹme ọvuọvo ọ riẹ?

Egagọ ọvo Jesu o wuhrẹ ilele riẹ, egagọ uzẹme na. O wọhọ edhere nọ o bi su kpohọ uzuazọ. Jesu ọ ta kpahe edhere yena nọ: “Enọ e ro riẹ e rẹ kakao.” (Matiu 7:14) Egagọ nọ o re ru lele Ẹme riẹ nọ ọ rrọ uzẹme na ọvo Ọghẹnẹ ọ rẹ jẹrehọ. Ahwo kpobi nọ a rrọ egagọ uzẹme na a re wo okugbe evaọ orọwọ ovo.—Se Jọn 4:23, 24; 14:6; Ahwo Ẹfẹsọs 4:4, 5.

2. Fikieme egagọ buobu a bi ro se omarai Ileleikristi?

Eruẹaro erue e rehọ iwuhrẹ erue gbe Egagọ-Ileleikristi ku no, jẹ be rọ ere wha isiuru rai haro. Wọhọ epanọ Jesu ọ ta nọ o te via, eruẹaro erue a bi dhesẹ omarai wọhọ “igodẹ” Jesu, rekọ a bi ru wọhọ erao ijihẹ nọ ohọo u bi kpe. (Matiu 7:13-15, 21, 23) Ileleikristi erue e romavia maero nọ ikọ Jesu a whu no.—Se Iruẹru Ikọ Na 20:29, 30.

3. Eme họ eware jọ nọ i ru egagọ uzẹme wo ohẹriẹ?

Egegagọ uzẹme a rẹ rọ adhẹẹ kẹ Ebaibol na wọhọ Ẹme Ọghẹnẹ. A rẹ daoma rria lele ehri-izi Ebaibol na. Fikiere, egagọ uzẹme u wo ohẹriẹ no egagọ nọ i bi lele iroro ahwo-akpọ. (Matiu 15:7-9) Egegagọ uzẹme a rẹ ta ojọ no a ru ofa ha.—Se Jọn 17:17; 2 Timoti 3:16, 17.

Egagọ uzẹme ọ rẹ kẹ odẹ Ọghẹnẹ, Jihova, adhẹẹ. Jesu o ru ahwo riẹ odẹ Ọghẹnẹ. O fi obọ họ kẹ ahwo riẹ Ọghẹnẹ je wuhrẹ ai re a lẹ inọ odẹ Ọghẹnẹ o jọ fuafo. (Matiu 6:9) Evaọ oria nọ whọ be rria, egagọ vẹ ọ be wha eroruiruo odẹ Ọghẹnẹ haro?—Se Jọn 17:26; Ahwo Rom 10:13, 14.

  4. Ẹvẹ whọ sai ro vuhu egegagọ uzẹme?

Ileleikristi uzẹme a rẹ ta usiuwoma Uvie Ọghẹnẹ. Ọghẹnẹ o vi Jesu ze te ta usiuwoma kpahe Uvie na. Uvie Ọghẹnẹ họ ẹruore ọvo nọ ọ rrọ kẹ ahwo-akpọ. Jesu ọ ta kpahe Uvie na rite ẹdẹ nọ o ro whu. (Luk 4:43; 8:1; 23:42, 43) Ọ ta kẹ ilele riẹ nọ a ta usiuwoma kpahe Uvie Ọghẹnẹ. Otẹrọnọ ohwo jọ o bru owhẹ ze be ta ẹme kpahe Uvie Ọghẹnẹ, egagọ vẹ who re roro nọ ohwo na ọ rrọ?—Se Matiu 10:7; 24:14.

Ilele Jesu a rrọ abọ ọvuọvo akpọ omuomu ọnana ha. A re wobọ evaọ isuẹsu hayo ohọre ẹwho ho. (Jọn 17:16) Ofariẹ, a rẹ raro kele akpọ na ha evaọ iruemu iyoma nọ e rẹ wha omonwa se omobọ ohwo gbe amọfa.—Se Jemis 1:27; 4:4.

5. Eme họ ugogo oware nọ a re ro vuhu egagọ uzẹme?

Ileleikristi uzẹme a re wo uyoyou nọ o viodẹ kẹ ohwohwo. A jọ Ẹme Ọghẹnẹ wuhrẹ nọ a rẹ rọ adhẹẹ kẹ ahwo uyẹ hayo erẹwho kpobi. Dede nọ ẹsibuobu egagọ erue a dikihẹ gaga be tha ẹmo-ofio erẹwho na uke, egegagọ uzẹme a se inọ a re wobọ evaọ ẹmo ho. (Maeka 4:1-4) Ukpoye, Ileleikristi uzẹme a be rọ ababọ oriobọ rehọ oke gbe eware nọ a wo fi obọ họ kẹ amọfa jẹ kẹ ae uduotahawọ.—Se Jọn 13:34, 35; 1 Jọn 4:20, 21.

Egagọ vẹ ọ be rehọ iwuhrẹ rai kpobi no Ẹme Ọghẹnẹ, Ebaibol na ze, be rọ adhẹẹ kẹ Odẹ Ọghẹnẹ, je bi whowho Uvie Ọghẹnẹ wọhọ ẹruore ọvuọvo nọ ọ rrọ kẹ ahwo-akpọ? Utu ahwo vẹ a bi dhesẹ uyoyou, jẹ se inọ a re wobọ evaọ ẹmo-ofio ho? Uzẹme na u dhesẹ oma via inọ Isẹri Jihova họ ahwo na.—1 Jọn 3:10-12.

Rọkẹ evuẹ efa, rri uzou avọ 15 orọ obe nana, Eme Ebaibol na O Gine Wuhrẹ? onọ Isẹri Jihova a kere.

[Uwoho nọ o rrọ ẹwẹ-obe avọ 16]

“A re dhesẹ oma nọ ae a riẹ Ọghẹnẹ, rekọ yọ a be rọ uruemu rai vro ẹe.”—Taitọs 1:16