A Fere Osu Akpọ na nọ Ọ Ko Omariẹ Dhere na Via No

JESU ọ ta kẹ ahwo nọ a jẹ gaviezọ kẹe ẹdẹjọ inọ: “A ti le ọgba [osu, NW] akpọ na no.” Ọ ta oke ofa inọ ‘okpohwo [osu, NW] akpọ ọnana o wo ogaga vi ọyomariẹ hẹ’ gbe inọ “a bru oziẹ okpohwo [osu, NW] akpọ na no.” (Jọn 12:31; 14:30; 16:11) Ono Jesu ọ jẹ ta kpahe na?

Ma te roro kpahe oware nọ Jesu ọ ta kpahe ‘osu akpọ nana,’ o rrọ vevẹ inọ o sae jọnọ Ọsẹ riẹ, Jihova Ọghẹnẹ ọ jẹ ta kpahe na ha. O tẹ rrọ ere, kọ ono họ ‘osu akpọ nana’? Ẹvẹ a ti ro ‘lei no,’ kọ ẹvẹ a ro “bru oziẹ” riẹ no?

‘Osu Akpọ Nana’ O Dhesẹ Omariẹ Via

Wọhọ epanọ ogaga-uroseha o rẹ were ohwo ugbarugba na, ere oma u je mu Ẹdhọ okenọ ọ jẹ dawo Jesu, Ọmọ Ọghẹnẹ. Nọ Ẹdhọ o dhesẹ “uvie kpobi” nọ o rrọ akpọ na kẹ Jesu no, ọ tẹ ta kẹe nọ: “Mẹ rẹ te rehọ udu-ogaga enana kpobi kẹ owhẹ, gbe oro rai; keme a rehọ erai kẹ omẹ no; mẹ rẹ te rọ kẹ ọnọ oje omẹ. Fikiere who te diguẹ gọ omẹ, enana kpobi e rẹ te jọ era.”—Luk 4:5-7.

Otẹrọnọ iroro iyoma nọ e rrọ ohwo eva họ Ẹdhọ, wọhọ epanọ ahwo jọ a rẹ ta na, kọ ẹvẹ ma rẹ sae fotọ odawọ yena? Kọ iroro iyoma jọ nọ e jọ Jesu eva e jẹ dawo iẹe na, manikọ iroro obọriẹ e jẹ họre iẹe okenọ ọ họ-ame no? O tẹ rrọ ere, kọ ẹvẹ o sae rọ jọnọ “uzioraha ovo orọ eva riẹ hẹ”? (1 Jọn 3:5) Jesu ọ vro vievie he inọ Ẹdhọ o bi su ahwo-akpọ họ, ukpoye, Jesu ọ ta vevẹ inọ Ẹdhọ họ ‘osu akpọ nana’ je dhesẹ iẹe vevẹ wọhọ “ojihẹ” gbe “ọterue.”—Jọn 14:30; 8:44.

Nọ ikpe udhosa e ruemu rono okenọ Ẹdhọ ọ rọ dawo Jesu no, Jọn ukọ na ọ kareghẹhọ Ileleikristi epanọ udu-esuo Ẹdhọ o rro te nọ ọ ta nọ “akpọ na ọsoso ọ rọ obọ ogaga oyoma na.” Jọn ọ tẹ jẹ ta nọ ọyena ọ be “viẹ akpọ kpobi họ.” (1 Jọn 5:19; Eviavia 12:9) O rrọ vevẹ, omama ẹzi jọ nọ a rẹ ruẹ hẹ ọye Ebaibol na ọ ta nọ ọ rrọ ‘osu akpọ nana.’ Rekọ ẹvẹ esuo riẹ o bi kpomahọ ahwo-akpọ te?

Osu Akpọ na Ọ Rehọ Ogaga kẹ Ẹgba Riẹ

Nọ Pọl o je kere kpahe ohọre nọ Ileleikristi a be họre kẹ ẹrọwọ na, o dhesẹ ewegrẹ ilogbo Ileleikristi via vevẹ. Ọ ta gbiae nọ: “Orọnọ uwo gbe azẹ ma bi lele họra na ha, rekọ iride uzou na, bru egaga na, bi bru ikpahwo ebi akpọ nana, bi bru izi iyoma nọ e rọ eva eria ikpehru.” (Ahwo Ẹfẹsọs 6:12) Onana u dhesẹ nọ ohọre na u vi ohọre ugbobọ keme orọnikọ “uwo gbe azẹ” Ileleikristi a bi lele họre na ha rekọ “izi iyoma.”

Wọhọ epanọ efafa Ebaibol buobu nẹnẹ e fa ẹme na “izi iyoma,” u dhesẹ emama izi imuomu nọ i wo ogaga ulogbo orọnikọ iroro iyoma jọ họ. Efafa jọ e fa ẹme ọvona enẹ, “ẹgba emama izi nọ e be wha emuemu haro evaọ obọ idhiwu” (Revised Standard Version), “ogbaẹmo izi imuomu evaọ obọ idhiwu” (The Jerusalem Bible), gbe “emama izi imuomu nọ e ga thesiwa evaọ obọ idhiwu” (The New English Bible). Fikiere, Ẹdhọ ọ be wha ogaga isuẹsu riẹ haro ẹkwoma ijẹle aghẹmeeyo efa nọ e “nya siọ oria ẹria rai [evaọ obọ odhiwu] ba.”—Jud 6.

 Obe eruẹaruẹ Daniẹl orọ Ebaibol na o fere oghẹrẹ nọ “isu akpọ” enana a be rọ kpọ isuẹsu akpọ anwọ oke anwae ze. Fikinọ o wo ọdawẹ gaga kẹ ibe ahwo Ju riẹ nọ i zihe no igbo Babilọn kpo evaọ 537 B.C.E., Daniẹl ọruẹaro na ọ tẹ jẹ lẹ fiki rai evaọ ekpoka esa. Enjẹle nọ Ọghẹnẹ o vi ze te kẹ ọruẹaro nana omosasọ ọ vuẹ riẹ oware nọ o soriẹ nọ o gbe ro tei oma ẹruoke he. Enjẹle na ọ ta kẹ Daniẹl nọ: “[Ọmọzae] ovie obọ uvie Pasia ọ tẹ da-omẹ-ji edẹ udhegbọvo.”—Daniẹl 10:2, 13.

Ono họ “ọmọzae ovie obọ uvie Pasia” nana? O rrọ vevẹ inọ orọnikọ Sairọs, ovie Pasia ọye enjẹle na ọ jẹ ta kpahe na ha, keme evaọ oke yena Sairọs o wo aruoriwo kẹ Daniẹl avọ ibe ahwo Ju riẹ. Ofariẹ, ẹvẹ ohwo-akpọ gheghe ọ sae rọ da enjẹle ji ekpoka esa, kpakiyọ ẹnjẹle ọvo o kpe egba-ẹmo idu udhe-uzi gbe isoi (185,000) evaọ aso ọvo? (Aizaya 37:36) “Ọmọzae ovie obọ uvie Pasia” ọgeva yena ọ sae jọ omọfa ha rekọ ukọ Ẹdhọ, koyehọ, ukọ omuomu nọ Ẹdhọ ọ kẹ udu nọ ọ be rọ kpọ ofẹ Uvie-Ulogbo Pasia. Evaọ ikuigbe evona, enjẹle nọ Ọghẹnẹ o vi bru Daniẹl na ọ ta nọ ọ te wariẹ lele “ọmọzae ovie obọ uvie Pasia” na họre, gbe ukọ omuomu ọfa nọ ọ rrọ osu, “ọmọzae ovie Grisi.”—Daniẹl 10:20.

Eme ma rẹ sae ruẹ vuhumu no ikuigbe nana ze? Ma rẹ sae ta ababọ avro inọ u gine wo izi iyoma jọ nọ a rẹ ruẹ hẹ nọ e rrọ ‘isu akpọ’ na, ikọ imuomu nọ e rrọ emọ-ivie nọ e be rẹrote ofẹ sa-sa isuẹsu akpọ na evaọ otọ Setan Ẹdhọ nọ o wuzou rai. Rekọ eme họ ẹjiroro rai?

Osu Akpọ na O Dhesẹ Oghẹrẹ Ohwo nọ Ọ Ginẹ Rrọ Via

Evaọ obe urere Ebaibol na, Eviavia, Jọn ukọ na ọ ta epanọ Jesu, ọnọ ọ rrọ Maekẹl ukọ-odhiwu oride na, o ro fi Ẹdhọ avọ ikọ imuomu riẹ kparobọ jẹ ta kpahe eware iyoma nọ e roma via nọ a le ai no odhiwu ze no. Ma se nọ: “O da omẹ kẹ owhai, o akpọ . . . keme ukumuomu na ọ rehọ ofu ọgaga bru owhai ze, keme ọ riẹ nọ oke riẹ o re kpẹkpẹre.”—Eviavia 12:9, 12.

Ẹvẹ Ukumuomu na o ro dhesẹ ofu ọgaga no? Wọhọ epanọ ahwo ugbarugba buobu a rẹ gwọlọ ta họ amọfa obọ na, inọ a gbẹ rọwo orai hi ma re dhugbe whu na, ere Ẹdhọ avọ ikọ imuomu riẹ a gba riẹ mu inọ a re si otọakpọ na gbe ahwo nọ a riẹe leloma ruọ ọgọdọ. Fikinọ ọ riẹ nọ oke riẹ nọ u kiọkọ o rrọ kpẹkpẹe, Ẹdhọ ọ be rọ ekiọthuọ ologbo, onọ o rrọ ugogo abọjọ uzuazọ uyero ohwo-akpọ rọ wha ẹzi ẹdadẹ haro, onọ u bi ru nọ a be rọ raha otọ na gbe okegbe na wariẹ akpọ-soso họ, onọ u bi fi uzuazọ ohwo-akpọ họ ọza.—Eviavia 11:18; 18:11-17.

No emuhọ ikuigbe ohwo-akpọ ze, isiuru nọ Ẹdhọ o wo kẹ ọkwa u bi dhesẹ oma via evaọ egagọ gbe isuẹsu ahwo-akpọ. Obe Eviavia u dhesẹ egaga-esuo akpọ na wọhọ erao ijihẹ nọ Ẹdhọ ọ rehọ “udu kpobi” kẹ. U te je dhesẹ usu omovuọ nọ egagọ i wo kugbe esuo akpọ na wọhọ ẹnwae-obro abọ-ẹzi ọtọtọ. (Eviavia 13:2; 17:1, 2) Roro kpahe  okienyẹ, oja-oriọ, ẹmo, gbe ohọre uyẹ nọ e be roma via anwọ ikpe buobu ze na, enọ i si uwhu kpe ima ahwo buobu no. Kọ ohwo jọ ọ sae ginẹ ta nọ eware imuozọ nọ e be via evaọ akpọ na yọ eware nọ ohwo-akpọ ọ be ginẹ rọ iroro obọriẹ ru? Manikọ emama izi imuomu jọ nọ a rẹ ruẹ hẹ e be wọ ahwo-akpọ ru eware iyoma nana?

Ebaibol o dhesẹ omama ẹzi nọ ọ be kpọ isu akpọ gbe egaga-esuo akpọ na vevẹ. Te a make riẹ hayo a riẹ hẹ, ahwo-akpọ a bi dhesẹ ẹzi osu akpọ na via, gbe uruemu riẹ orọ amọfa-ọtahobọ, a gbẹ rọwo ho kọ ma dhugbe whu no. Rekọ ẹvẹ ohwo-akpọ ọ te ruẹ uye evaọ otọ esuo Ẹdhọ kri te?

Ẹwẹ-Okuo Urere ọrọ Ẹdhọ

Eware nọ Jesu ọ jọ otọakpọ ru evaọ ikpe-udhusoi ọsosuọ i dhesẹ nọ kẹlena a be te raha Ẹdhọ avọ ikọ imuomu riẹ no. Okenọ ilele Jesu a n’iyẹrẹ kẹe kpahe epanọ a ro le idhivẹri no ahwo oma, Jesu ọ ta kẹ ae nọ: “Mẹ ruẹ Setan nọ o kie nọ ehru ze wọhọ egbrara.” (Luk 10:18) Jesu ọ rọ ẹkwoma ẹme nana jẹ ghọghọ kpahe obokparọ riẹ nọ o rrọ obaro tha, onọ o ti ro fi osu akpọ nana kparobọ okenọ ọyomariẹ o te zihe kpohọ obọ odhiwu no wọhọ Maekẹl ukọ-odhiwu oride na. (Eviavia 12:7-9) Nọ ma tẹ roma totọ kiẹ eruẹaruẹ Ebaibol riwi, ma rẹ ruẹ nọ obokparọ nana o roma via evaọ obọ odhiwu evaọ ukpe 1914 hayo nọ ukpe yena o nwane vrẹ no. *

Anwọ oke yena ze, Ẹdhọ ọ riẹ nọ oke nọ u kiọkọ re a tẹ raha iẹe u gbe tulo ho. Dede nọ ‘akpọ na soso ọ rrọ otọ ogaga riẹ,’ u wo ima ahwo buobu jọ nẹnẹ nọ ọ re te sae viẹhọ ruọ otọ esuo riẹ hẹ. Ebaibol na o fi obọ họ kẹ utu ahwo nana vuhu osu nana avọ eghẹ riẹ mu no. (2 Ahwo Kọrint 2:11) A bi wo ẹruore rono ẹme nọ Pọl o kere se ibe Ileleikristi riẹ ze, inọ: “Ọghẹnẹ udhedhẹ ọ rẹ te thahe Setan fihọ otọawọ rai obọ na.” *—Ahwo Rom 16:20.

Uviemenẹ Ẹdhọ o ti ku ẹwẹ urere riẹ! Evaọ otọ esuo oyoyou Kristi, ahwo ikiẹrẹe a ti zihe otọakpọ na nọ o rrọ uririawọ ẹwoho Ọghẹnẹ na ruọ aparadase. Ozighi, egrẹ, gbe uvou-uthei e gbẹ te jariẹ ofa ha. Wọhọ epanọ Ebaibol na ọ ta, “a gbẹ te kareghẹhọ eware anwae he.” (Aizaya 65:17) A te ruẹ unu gbiku riẹ hẹ, ufuoma ulogbo o te jọ kẹ ahwo nọ a no otọ osu akpọ nana nọ ọ ko omariẹ dhere na.

[Oruvẹ-obotọ]

[Ẹme nọ a fi ẹgba họ nọ ọ rrọ ẹwẹ-obe avọ 5]

Evaọ otọ esuo oyoyou Kristi, ahwo ikiẹrẹe a ti zihe otọakpọ na ruọ aparadase