Wuhrẹ Emọ Ra

Oware nọ O Soriẹ nọ Ahwo A ro You Dọkas

MAI kpobi ma gwọlọ nọ ahwo a you omai. Kọ ere o rrọ owhẹ oma?— * Ebaibol ọ ta kpahe aye jọ nọ a re se Dọkas, ọnọ ahwo buobu a you gaga.

Dọkas ọ jẹ rria Jopa, ẹwho nọ ọ kẹle Abade ọ Mediterenia. Emaele 35 ọvo Jerusalẹm o ro thabọ no Jopa. Dọkas ọ jọ omọvo Ileleikristi ọsosuọ.

Eme who roro nọ o soriẹ nọ ahwo a ro you Dọkas gaga?— Ebaibol ọ ta nọ o je ru eware iwoma buobu, yọ ọ jẹ hae kẹ ahwo ekẹ. O wọhọ nọ ọ jẹ hai ko iwu iwoma kẹ eyae-uku, koyehọ, eyae nọ ezae rai i whu no. Ọ jẹ hae vuẹ amọfa kpahe Jihova, Ọghẹnẹ uzẹme na, wọhọ epanọ Jesu o je ru.

Kọ whọ riẹ oware uyoma jọ nọ o via kẹ Dọkas?— Ọ jẹ mọ gaga, o te whu. Onana o da egbẹnyusu riẹ kpobi. Fikiere, a te vi ahwo jọ kpohọ ẹwho nọ Pita ukọ na ọ jọ, onọ o rọ  oware wọhọ emaele ikpe thabọ no etẹe. Ahwo na a lẹ Pita inọ ọ nyaze vẹrẹ vẹrẹ. Nọ Pita o te etẹe, ọ tẹ gadiẹ kpohọ ubruwou ehru nọ a wọ Dọkas fihọ. Eyae na kpobi e jẹ viẹ, a te dhesẹ iwu nọ Dọkas o ko kẹ ae rọ kẹe.

Pita ọ tẹ ta kẹ ahwo na kpobi nọ a ruọ otafe. Pita avọ ikọ efa a ru eware igbunu jọ no evaọ okenọ u kpemu, rekọ ọvuọvo ọ re te kpare ohwo nọ o whu ziọ uzuazọ họ. Eme who roro nọ Pita o ti ru obọnana?—

Pita o te kigwẹ kẹle ori na, ọ tẹ lẹ se Jihova. Kẹsena, ọ tẹ ta kẹ Dọkas nọ ọ kparoma. Dọkas ọ tẹ kparoma! Pita ọ tẹ riẹ obọ kẹe jẹ kpare iẹe dikihẹ. Kẹsena, Pita o te se eyae-uku gbe amọfa nọ e jọ etẹe ruọ eva uwou na, je dhesẹ Dọkas kẹ ae. Kọ whọ sai roro epanọ aikpobi a ghọghọ te?—

Enẹna, joma roro kpahe oware nọ whọ rẹ sai wuhrẹ no ikuigbe ẹkparomatha Dọkas na ze. Oware jọ nọ whọ rẹ sai wuhrẹ noi ze họ, who te bi fi obọ họ kẹ amọfa, ibuobu rai a ti you owhẹ. Rekọ onọ o mai wuzou họ, Ọghẹnẹ o ti you owhẹ jẹ kareghẹhọ owhẹ. Eware iwoma nọ who bi ru kẹ amọfa e te thọrọ Ọghẹnẹ ẹro vievie he. Yọ ọ te kẹ owhẹ uzuazọ ebẹbẹ bẹdẹ avọ evawere evaọ akpọ ọkpokpọ okiẹrẹe riẹ.

Jọ Ebaibol Ra Se

Iruẹru Ikọ Na 9:36-43

Eviavia 21:3-5

[Oruvẹ-obotọ]