Wuhrẹ No Ẹme Ọghẹnẹ Ze

Ẹvẹ Ma Sae rọ Salọ Emamọ Egbẹnyusu?

Uzoẹme nana u dhunu te enọ jọ nọ o rẹ sae jọnọ whọ nọ no ẹdẹjọ, u te je dhesẹ oria nọ whọ rẹ sae jọ ruẹ iyo na evaọ Ebaibol ra. O te were Isẹri Jihova re a lele owhẹ ta ẹme kpahe iyo na.

1. Fikieme u ro wuzou re ma fiẹrohotọ evaọ ẹsalọ egbẹnyusu mai?

O rẹ were ahwo buobu re a ruẹ nọ amọfa a jẹ rae rehọ. Onana u re ru nọ ma rẹ rọ gwọlọ raro kele ahwo nọ a wariẹ omai họ. Egbẹnyusu mai i re kpomahọ oghẹrẹ iroro nọ ma rẹ jọ udu mai wo. Fikiere, egbẹnyusu mai e rẹ sai kpomahọ oghẹrẹ ohwo nọ ma te jọ.—Se Itẹ 4:23; 13:20.

Devidi, omọvo enọ i kere Ebaibol na ọ rọ orimuo salọ egbẹnyusu riẹ. Ọ nya usu kugbe ahwo nọ a je fi obọ họ kẹe yọrọ ẹgbakiete riẹ wọhọ odibo Ọghẹnẹ. (Olezi 26:4, 5, 11, 12) Wọhọ oriruo, Devidi o wo emamọ usu kugbe Jonatan keme Jonatan ọ jẹ ta udu họ iẹe awọ inọ o fievahọ Jihova.—Se 1 Samuẹle 23:16-18.

2. Ẹvẹ whọ sae rọ jọ ogbẹnyusu Ọghẹnẹ?

Dede nọ Jihova họ erumeru na, ma rẹ sae jọ egbẹnyusu riẹ. Wọhọ oriruo, Abraham ọ jọ ogbẹnyusu Ọghẹnẹ. Abraham o fievahọ Jihova je yoẹme kẹe, fikiere Jihova ọ tẹ rehọ Abraham inọ yọ ogbẹnyusu riẹ. (Emuhọ 22:2, 9-12; Jemis 2:21-23) Ma te fievahọ Jihova je ru oware nọ ọ ta nọ ma ru, ma rẹ sae jọ egbẹnyusu riẹ re.—Se Olezi 15:1, 2.

  3. Ẹvẹ whọ sai ro wo erere no emamọ usu ze?

Emamọ egbẹnyusu a rẹ talamu owhẹ je fi obọ họ kẹ owhẹ ru oware nọ u kiehọ. (Itẹ 17:17; 18:24) Wọhọ oriruo, dede nọ o wọhọ nọ Jonatan ọ rọ ikpe 30 kpako vi Devidi, yọ Jonatan omariẹ họ ọreuku nọ ọ hae rehọ agbara-uvie orẹwho Izrẹl, ọ rọ udu kpobi tha Devidi uke wọhọ ọnọ Ọghẹnẹ ọ salọ re ọ jọ ovie. Emamọ egbẹnyusu a rẹ jẹ gbaudu kpọ owhẹ họ nọ a tẹ ruẹ nọ who bi ru oware uyoma. (Olezi 141:5) Who te wo egbẹnyusu nọ i you Jihova, a ti fi obọ họ kẹ owhẹ wo emamọ uruemu.—Se 1 Ahwo Kọrint 15:33.

Whọ rẹ sae jọ obọ Ọgwa Uvie Isẹri Jihova ruẹ ahwo nọ a you eware ezi wọhọ owhẹ. Whọ te ruẹ egbẹnyusu nọ e te ta udu họ owhẹ awọ nọ whọ be daoma ru eva were Ọghẹnẹ na.—Se Ahwo Hibru 10:24, 25.

Dede na, makọ egbẹnyusu nọ i you Ọghẹnẹ a rẹ sai ru eware nọ e rẹ kẹ omai uye ẹsejọ. Whọ hae kake dheva fiki ethobọ rai hi. (Ọtausiuwoma Na 7:9, 20-22) Kareghẹhọ nọ ohwo ọvuọvo ọ gba ha, yọ egbẹnyusu nọ i you Ọghẹnẹ a rrọ ghaghae k’omai. Ẹme Ọghẹnẹ ọ ta udu họ omai awọ inọ ma hae kpairoro vrẹ ethobọ ibe Ileleikristi mai.—Se Ahwo Kọlọsi 3:13.

4. Ẹvẹ otẹrọnọ ahwo nọ a se omarai egbẹnyusu ra a wọso owhẹ?

Ahwo buobu a ruẹ no inọ a te mu uwuhrẹ epanọ a re ro wo otoriẹ Ẹme Ọghẹnẹ họ no, egbẹnyusu rai jọ a rẹ wọso ae. O sae jọnọ egbẹnyusu yena a riẹ uvi ohrẹ hayo ẹruore nọ who duku no evaọ Ebaibol na ha. Ẹsejọhọ whọ sai fi obọ họ kẹ ae.—Se Ahwo Kọlọsi 4:6.

Evaọ ẹsejọ, egbẹnyusu jọ e rẹ sae rọ emamọ usi nọ o rrọ Ẹme Ọghẹnẹ na se ẹkoko. (2 Pita 3:3, 4) Ejọ e rẹ sai se owhẹ ẹkoko fikinọ whọ be daoma ru oware nọ u kiehọ. (1 Pita 4:4) Oyena o tẹ via kẹ owhẹ, koyehọ o te gwọlọ nọ whọ rẹ salọ sọ whọ rẹ jọ ogbẹnyusu ahwo otiọye na hayo ogbẹnyusu Ọghẹnẹ. Whọ tẹ salọ nọ whọ rẹ jọ ogbẹnyusu Ọghẹnẹ, kiyọ ogbẹnyusu nọ ọ mai woma kpaobọ whọ salọ na.—Se Jemis 4:4, 8.

Rọkẹ evuẹ efa, rri uzou avọ 12 gbe 19 orọ obe nana, Eme Ebaibol na O Gine Wuhrẹ? onọ Isẹri Jihova a kere.