“Ọrẹri, Ọrẹri, Ọrẹri Ọnowo”
Si Kẹle Ọghẹnẹ
“Ọrẹri, Ọrẹri, Ọrẹri ỌNOWO”
WHỌ tẹ gwọlọ rehọ ẹme ọvo jọ ro dhesẹ Jihova Ọghẹnẹ, koyehọ oghẹrẹ nọ ọ rrọ, ẹme vẹ who re ro dhesẹ iẹe? Evaọ ikpe-udhusoi avọ eree taure ekele oke mai na o te ti te, a kẹ Aizaya ọruẹaro na eruẹaruẹ jọ nọ ọ jọ yo emama ẹzi nọ e be rọ ugogo ẹme jọ nọ u dhesẹ oghẹrẹ nọ Jihova ọ rrọ bi ro jiri ei—ọrẹri. U fo nọ oware nọ Aizaya ọ ruẹ je yo na o rẹ kẹ omai ọwhewhe je ru omai si kẹle Jihova. Nọ ma be te kiẹ eme nọ e rrọ Aizaya 6:1-3 riwi na, dae rehọ iẹe nọ whọ rrọ etẹe.
Eme Aizaya ọ ruẹ? Aizaya ọ ta nọ: “Mẹ tẹ ruẹ ỌNOWO na nọ ọ keria ehru akaba-uvie okpekpehru, oruaro.” (Owọ 1) Orọnikọ Aizaya ọ ginẹ ruẹ Jihova, Olori Osu na ha. Ibiaro ohwo-akpọ e rẹ sae ruẹ eva odhiwu hu. Ebaibol ọ ta vevẹ nọ: “Ohwo ọvo ọ [re] te ruẹ Ọghẹnẹ oke ọvo ho.” (Jọn 1:18) Eruẹaruẹ Aizaya ọ jọ ruẹ ỌNOWO na. * Rekọ eruẹaruẹ na e jọ vevẹ—te epanọ i ro fi ọwhewhe họ Aizaya oma, wọhọ ẹsenọ ọ ginẹ rọ ẹro ruẹ Jihova.
Kẹsena Aizaya ọ tẹ ruẹ oware nọ o wọhọ nọ omọfa ọ re te jọ eruẹaruẹ ruẹ ẹdẹvo ho. O kere nọ: “Ikọ-odhiwu i dikihẹ obọ ehru uzou riẹ [Jihova]; ọvuọvo o wo ibekpe ezeza: Ọ rehọ ivẹ ruru ovao riẹ, ọ rehọ ivẹ ruru awọ riẹ, yọ ọ be rehọ ivẹ ra.” (Owọ avọ 2) Evaọ ẹvẹrẹ ọsosuọ nọ a ro kere Ebaibol na, ẹme nọ a jọ etenẹ fa “ikọ-odhiwu” na u dhesẹ emama ẹzi nọ i kpehru gaga. Aizaya ọvo họ ohwo nọ ọ ta ẹme kpahe ae evaọ Ebaibol na. Ikọ-odhiwu nana e ruẹrẹ oma kpahe ẹsikpobi re a ru oware kpobi nọ Ọghẹnẹ ọ ta kẹ ae. A ruru ovao gbe awọ rai, onọ u dhesẹ ọwhewhe gbe adhẹẹ nọ a wo kẹ Ọghẹnẹ fiki uvẹ-ọghọ nọ a be rọ gbodibo evaọ aro riẹ.
Orọnikọ oware nọ Aizaya ọ ruẹ ọvo u fi ọwhewhe họ iẹe oma ha rekọ te oware nọ o yo. Ikọ-odhiwu nọ e jọ aro Ọghẹnẹ na a ku unu gbe so ole. Aizaya o kere nọ: “Ohwohwo ọ be hẹ takẹ ohwo nọ, ‘Ọrẹri, ọrẹri, ọrẹri ỌNOWO Ogbaẹmo.’” (Owọ avọ 3) Ẹme Hibru nọ a fa “ọrẹri” na u dhesẹ oware nọ o rrọ fuafo, ọfure. Otofa ẹme na o tẹ jẹ kẹre te “oware nọ u wobọ ovuọvo kugbe uzioraha ha.” Evaọ oghẹrẹ nọ o wọhọ ole nọ ọjọ ọ be so te ekuhọ no ọdekọ ọ vẹ kpare iẹe, ikọ-odhiwu na a be so “ọrẹri” isiasa unọjọ utọjọ, onọ u fi ẹgba họ iẹe inọ Jihova ọ fo thesiwa. (Eviavia 4:8) Fikiere, ẹfuọ Jihova yọ oware nọ u ru rie rrọ oghẹrẹsa. Evaọ abọ kpobi, Jihova ọ fure, kare afuẹwẹ.
Nọ ma riẹ nọ Jihova ọrẹri na, o rẹ wọ omai si kẹle iẹe viere. Fikieme? Wo ohẹriẹ no isu ahwo-akpọ nọ oriobọ o rẹ sae wọ ru eware iyoma hayo okienyẹ, Jihova o re ru oware uyoma vievie he. Ẹfuọ riẹ o kẹ imuẹro inọ no ebẹdẹ rite ebẹdẹ ọ rrọ Ọsẹ nọ ọ mai woma, Osu okiẹrẹe, gbe Oguẹdhọ nọ ọ kare ọriẹwẹ. Ma wo ẹjiroro kpobi nọ ma re ro fi eva họ inọ Ọghẹnẹ nọ ọ rrọ ọrẹri evaọ kabọ kabọ na o ti ru oma vuọ omai vievie he.
[Oruvẹ-obotọ]
^ edhe-ẹme 4 Obe na Insight on the Scriptures o ta nọ: “Nọ Ọghẹnẹ ọ tẹ kẹ ohwo eruẹaruẹ evaọ etoke nọ ohwo na ọ rrọ owezẹ hẹ, o rẹ wọhọ ẹsenọ ohwo na ọ be jọ iroro riẹ ruẹ eware nọ a bi dhesẹ kẹe na. Ohwo na ọ rẹ sae kareghẹhọ eruẹaruẹ na jẹ rehọ eme obọriẹ dhesẹ ae hayo kere ae fihotọ.”—Onọ Isẹri Jihova a kere.
[Ẹme nọ a fi ẹgba họ nọ ọ rrọ ẹwẹ-obe avọ 32]
Nọ ma riẹ nọ Jihova ọrẹri na, o rẹ wọ omai si kẹle iẹe viere
