Ebaibol Na O Re Nwene Uzuazọ Ohwo

EME ọ wọ ọmọtẹ jọ nọ o kiuke ku uwuhrẹ egagọ nọ a rọ yọrọ iẹe n’otọ ze wariẹ zihe kpohọ egagọ na? Se ẹme nọ ọ ta.

“Enẹna uzuazọ mẹ u wo uvi ẹjiroro no.”—LISA ANDRÉ

UKPE NỌ A YẸ OMẸ: 1986

ORẸWHO MẸ: LUXEMBOURG

IKU MẸ: ỌMỌ OGBỌFARIẸ

UZUAZỌ MẸ EVAỌ OKENỌ U KPEMU: Mẹ whẹro evaọ Bertrange, ẹwho ọsese nọ ọ rrọ fuafo, kare ozighi nọ ahwo a be jọ ruẹ re kiọkọ, onọ o kẹle okpẹwho Luxembourg. Mẹ họ ubreyẹ evaọ usu emọ isoi nọ ọsẹgboni mẹ a yẹ. Ọsẹgboni mẹ yọ Isẹri Jihova, yọ a daoma gaga wuhrẹ omai emọ na utee Ileleikristi.

Nọ me te ikpe ikpegbọ no, me te mu avro họ ewo kpahe iwuhrẹ Isẹri Jihova. Oke ọsosuọ, me je se avro nana gboware he, rekọ ẹmẹrera na ẹrọwọ mẹ o te ti whrehe kpobi no. Ọsẹgboni mẹ a dawo oma kpobi re a ruẹ nọ a kpọ omẹ họ edhere, rekọ mẹ siọ obufihọ rai. Mẹ jẹ hai kuomagbe izoge nọ i wo adhẹẹ kẹ uvumọ ohwo ho, rekọ ọsẹgboni mẹ a riẹ hẹ. Me je wo isiuru kpahe ufuoma orọ uzuazọ odode nọ o wọhọ nọ a jẹ reawere riẹ. Ma jẹ hai kpohọ epati ẹsikpobi, lele emezae epanọ u je, da idi odode jẹ rehọ imu egaga. Oke ọsosuọ o jẹ were omẹ oma inọ mẹ rrọ kugbe ahwo nọ o wọhọ nọ a be riakpọ kuoma.

Rekọ evaọ uzẹme, me gine wo evawere he. Uzuazọ kugbe ahwo yena u wo otọ họ; ohwo ọvuọvo nọ o je se oware gboja ọ jọ usu rai hi. Rekọ mẹ omamẹ, o jẹ hae kẹ omẹ uye nọ me te roro kpahe eware wọhọ okienyẹ nọ ọ da akpọ na fia. Nọ oke o be nyaharo na, ọkora ọ tẹ te ruọ omẹ oma.

EPANỌ EBAIBOL NA U RO NWENE UZUAZỌ MẸ: Ọkora ọ da omẹ oma fia ẹdẹjọ okenọ mẹ jọ ikpe 17. Nọ oni mẹ ọ ruẹ inọ eva e be were omẹ hẹ, ọ tẹ ta kẹ omẹ nọ mẹ wariẹ dawo elele izi Ebaibol. Ọ ta udu họ omẹ awọ nọ mẹ kiẹ iwuhrẹ Ebaibol na riwi re mẹ jiroro na kẹ omamẹ sọ me re lele ai hayo me re lele ai hi. Ẹme yena nọ mẹ avọ oni mẹ ma jọ horie eva kẹ ohwohwo na u fi obọ họ kẹ omẹ gaga. Mẹ tẹ rọwo inọ jọ Caroline oniọvo-ọmọtẹ mẹ ọrọ ọkpako avọ Akif ọzae riẹ a wuhrẹ Ebaibol kugbe omẹ. Akif ọ jọ Osẹri Jihova no emaha ze he, o kurẹriẹ ruọ ukoko Isẹri Jihova nọ o t’ohwo no. Fiki onana, me rri nọ mẹ rẹ sae ta eva mẹ kẹe, keme oyena o j’omẹ oja gaga.

 Mẹ riẹ nọ oghẹrẹ uzuazọ nọ me je yeri na u fo kẹ Osẹri Jihova ha, rekọ evaọ ọsosuọ, me rri rie nọ oghẹrẹ kpobi nọ me yeri uzuazọ mẹ yọ ẹme obọmẹ. Dede na, nọ me bi wuhrẹ Ebaibol na, me te ti vuhumu inọ uruemu mẹ o rẹ sae da Jihova hayo ru eva were iẹe. (Olezi 78:40, 41; Itẹ 27:11) Me te je vuhumu inọ uruemu mẹ u re kpomahọ amọfa re.

Nọ mẹ bi se Ebaibol na haro na, mẹ ruẹ nọ eware buobu e riẹ nọ e kẹ imuẹro inọ Ebaibol na yọ Ẹme Ọghẹnẹ. Wọhọ oriruo, me se kpahe eruẹaruẹ buobu evaọ Ebaibol na nọ i rugba—nọ oware ovuovo o jọ rugba kiọkọ họ. Eware yena nọ me wuhrẹ na i fi obọ họ kẹ omẹ si avro nọ me wo oke ẹdẹ na no udu.

Nọ me wuhrẹ Ebaibol na te oware wọhọ ukpe ovo no, mẹ avọ ọsẹgboni mẹ ma te weze bru oniọvo-ọmọzae mẹ ọrọ ọkpako nọ ọ rrọ omọvo ahwo nọ a bi ru iruo unevaze evaọ uwou ogha Isẹri Jihova nọ o rrọ Germany. U duobọte omẹ udu gaga nọ mẹ ruẹ oghẹrẹ nọ oniọvo-ọmọzae mẹ o wo evawere te. Evawere itieye na mẹ be gwọlọ evaọ uzuazọ! Ibe Isẹri nọ a gbe bi ru iruo unevaze evaọ uwou ogha na a si omẹ urru gaga re. A wo ohẹriẹ gaga no otu ewhariọ nọ e rẹ gwọlọ uzuazọ omawere nọ me je lele nyusu na. Omoke jọ o vrẹ no, mẹ tẹ lẹ se Jihova no udu ze, ya eyaa kẹe inọ mẹ rẹ rehọ edẹ uzuazọ mẹ nọ i kiọkọ gọe. Nọ me te ikpe 19 no, mẹ tẹ họ-ame ro dhesẹ omauromudhe mẹ kẹ Jihova via.

IRERE NỌ ME WO NO: Enẹna uzuazọ mẹ u wo uvi ẹjiroro no. O be kẹ omẹ evawere nọ mẹ be rọ Ebaibol wuhrẹ amọfa na, bi fi obọ họ kẹ ae wuhrẹ kpahe Jihova gbe eyaa nọ ọ ya kpahe obaro na. Uviuwou mẹ u wo erere no re; a gbẹ be ruawa fiki mẹ hẹ.

Mẹ riẹ nọ me yeri ekpehre uzuazọ evaọ okenọ u kpemu, rekọ mẹ be kuvẹ hẹ re iroro yena e kẹ omẹ ọkora. Ukpoye, mẹ be hai roro kpahe erọvrẹ Jihova ẹsikpobi gbe uyoyou nọ o wo kẹ omẹ. Mẹ rọ udu mẹ kpobi rọwokugbe eme ọ obe Itẹ 10:22, onọ o ta nọ: “Oghale ỌNOWO na u re ru ohwo họ ọdafe, o re ku enuobro kugbe ei hi.”

[Ẹme nọ a fi ẹgba họ nọ ọ rrọ ẹwẹ-obe avọ 20]

“Ma jẹ hai kpohọ epati ẹsikpobi, lele emezae epanọ u je, da idi odode jẹ rehọ imu egaga”

[Ẹme nọ a fi ẹgba họ nọ ọ rrọ ẹwẹ-obe avọ 21]

“Mẹ riẹ nọ me yeri ekpehre uzuazọ evaọ okenọ u kpemu, rekọ mẹ be kuvẹ hẹ re iroro yena e kẹ omẹ ọkora”