Ebaibol Na O Re Nwene Uzuazọ Ohwo

EME ọ wọ ohwo nọ o je fi-edhọ, nọ ọ jẹ kpare ethẹ ruọ iwou ahwo tho eware, siọ ikpehre iruemu yena ba je nwene uzuazọ riẹ? Se ẹme nọ ọ ta.

“Enyenya nọ a rẹ rọ dhohrẹ e jẹ hae were omẹ gaga.”​—RICHARD STEWART

UKPE NỌ A YẸ OMẸ: 1965

ORẸWHO MẸ: JAMAICA

IKU MẸ: MẸ JẸ HAI FI-EDHỌ, MẸ JỌ IJAGUDA GBE OJI

UZUAZỌ MẸ EVAỌ OKENỌ U KPEMU: Mẹ whẹro evaọ okpẹwho-esuo Jamaica nọ a re se Kingston, onọ uvuhu o dafia nọ ahwo a vọ. Ahwo buobu a wo iruo ho yọ ozighi ọ da ẹwho na fia. Utu egbulegbu a je fi ahwo họ awa ẹsikpobi. Enwenọ ikẹdẹ kẹdẹ mẹ jẹ hai yo edo iwhunu.

Oni mẹ nọ ọ jọ ọgba-iruo ọ jẹ daoma kpobi re ọ ruẹ nọ ọ rẹrote omẹ gbe oniọvo-ọmọzae gbe oniọvo-ọmọtẹ mẹ nọ a yẹ tu omẹ. Ọ gwọlọ nọ ma re kpohọ isukulu ziezi. Me wo isiuru kpahe isukulu tere he, rekọ enyenya nọ a rẹ dhẹ o jẹ hae were omẹ gaga. Mẹ jẹ hae siọ isukulu ba kpohọ obonọ a rẹ jọ dhẹ enyenya. Mẹ jẹ hae tubẹ dhẹ enyenya na dede.

U kri hi, mẹ tẹ jẹ hai lele amọfa fi-edhọ kpahe utu ahwo nọ o te kparobọ evaọ ohrẹ-odhe enyenya. Me duoma leno họ uzuazọ ọfariẹ, jẹ hae wọ emetẹ epanọ u je. Me je vovo ige, yọ me je tho uji re mẹ ruẹse ruẹ ugho yeri uzuazọ ọfariẹ-ogbe mẹ. Me wo igbeke buobu, rekọ me yere Ọghẹnẹ inọ eghughu ujitho nọ mẹ jọ wobọ na, uvumọ ohwo o whu hu.

Uwhremu na, iporisi i te mu omẹ je fi omẹ họ uwou-odi. Nọ a ti si obọ no omẹ no, mẹ tẹ wariẹ zihe kpohọ oghẹrẹ uzuazọ nọ me je yeri vẹre. Evaọ uzẹme, me tube yoma vi epanọ mẹ jọ vẹre. Dede nọ ovao mẹ o jọ wọhọ ohwo nọ ọ rrọ wowolẹ, mẹ jọ ohwo nọ o wo udu ogaga, avọ evegaga, nọ eva i re kru ẹdha ha. U te no omamẹ no, mẹ jẹ hae daezọ uvumọ ohwo ho.

EPANỌ EBAIBOL NA O RO NWENE UZUAZỌ MẸ: Evaọ etoke nana nọ me je yeri uzuazọ ugbarugba na, Isẹri Jihova a te mu Ebaibol na họ ewuhrẹ kugbe oni mẹ, o te zihe ruọ omọvo rai. Me muẹrohọ emamọ inwene evaọ uruemu riẹ, mẹ tẹ jẹ gwọlọ riẹ oware nọ o soriẹ. Mẹ tẹ ta nọ mẹ rẹ kiẹ oware nọ oni mẹ o je bi ru inwene nana, onana u ru nọ mẹ rọ yare Isẹri Jihova re a wuhrẹ Ebaibol na kugbe omẹ.

Mẹ tẹ ruẹ vuhumu inọ iwuhrẹ Isẹri Jihova i wo ohẹriẹ no erọ egagọ efa, jẹ ruẹ nọ Isẹri Jihova na a rẹ rehọ ẹme kpobi nọ a be ta rono Ebaibol na ze. Ae ọvo họ utu egagọ nọ mẹ ruẹ nọ a be ta usiuwoma no uwou ruọ uwou wọhọ epanọ Ileleikristi ikpe-udhusoi ọsosuọ a ru. (Matiu 28:19; Iruẹru Ikọ Na 20:20) Nọ mẹ ruẹ uyoyou nọ a bi dhesẹ kẹ ohwohwo, u te mu omẹ ẹro inọ me duku egagọ uzẹme no.—Jọn 13:35.

Rono eware nọ me wuhrẹ no Ebaibol ze, mẹ tẹ ruẹ nọ u fo re me ru inwene ilogbo jọ evaọ uzuazọ mẹ. Mẹ ruẹ nọ Jihova Ọghẹnẹ o mukpahe  igberẹ-ibro, gbe inọ re mẹ ruẹsi ru ei eva were, o gwọlọ nọ me re si obọ no iruemu nọ i re gbe oma mẹ ku. (2 Ahwo Kọrint 7:1; Ahwo Hibru 13:4) U duobọte omẹ udu nọ me wuhrẹ nọ uruemu mẹ o rẹ sae kẹ Jihova uye hayo evawere. (Itẹ 27:11) Fikiere, mẹ tẹ gbaemu inọ mẹ rẹ siọ ige ba evovo, si obọ no igbeke, jẹ daoma kpọ uruemu mẹ vi. Inwene jọ nọ e jọ bẹbẹ gaga kẹ omẹ họ, obusino ọfariẹ-ogbe avọ edhọ-ifio.

Oke ọsosuọ, mẹ jẹ gwọlọ nọ egbẹnyusu mẹ a riẹ nọ Isẹri Jihova a bi wuhrẹ omẹ Ebaibol ho. Rekọ me te ti nwene iroro nọ me se obe Matiu 10:33, oria nọ Jesu ọ jọ ta nọ: “Ohwo nọ ọ vro omẹ aro ahwo, mẹ rẹ vrẹ e re aro Ọsẹ mẹ nọ ọ rọ obọ odhiwu.” Ẹme nana ọ wọ omẹ vuẹ egbẹrioma mẹ inọ Isẹri Jihova a bi wuhrẹ Ebaibol kugbe omẹ. Akpọ o gbe rai unu. U mu rai ẹro vievie he inọ ohwo wọhọ omẹ ọ be gwọlọ jọ Oleleikristi. Rekọ mẹ tẹ ta kẹ ae inọ mẹ gbẹ gwọlọ w’obọ ovuovo kugbe oghẹrẹ uzuazọ nọ me je yeri vẹre he.

IRERE NỌ ME WO NO: Oma o were oni mẹ thesiwa nọ ọ ruẹ nọ me mu izi Ebaibol họ elele no. Enẹna, ọ gbẹ be ruawa ha inọ ẹsejọhọ me ti ru oware uyoma jọ. Enẹna ma be ta ẹme kugbe kpahe oware nọ u bi ru omai imava kpekpe—uyoyou nọ ma wo kẹ Jihova. Ẹsejọ, nọ me te roro kpahe oghẹrẹ uzuazọ nọ me je yeri vẹre, inwene nọ Ọghẹnẹ o fi obọ họ kẹ omẹ ru no i ve bi gb’omẹ unu. Me gbe bi siuru uzuazọ ọfariẹ gbe omawere akpọ nọ me je jo zue vẹre na ha.

Ogbẹrọ uwuhrẹ Ebaibol nọ mẹ jowọ lele he, ẹsejọhọ nwanọ me whu no hayo rrọ uwou-odi. Whaọ enẹna, me wo emamọ uviuwou nọ o be wereva ziezi. O be kẹ omẹ evawere gaga inọ mẹ avọ aye mẹ nọ ọ be tha omẹ uke gbe ọmọtẹ mai nọ o bi yoẹme ziezi, ma be gọ Jihova Ọghẹnẹ kugbe. Me yere Jihova gaga kẹ uvẹ nọ ọ kẹ omẹ nọ mẹ rọ rrọ omọvo okugbe-inievo Ileleikristi nọ e rrọ yoyou. Eva e be were omẹ gaga kẹ omodawọ nọ ohwo jọ o ru nọ o ro wuhrẹ omẹ uzẹme Ebaibol na. Yọ me rri uvẹ nọ me bi ro fi obọ họ kẹ amọfa riẹ oware nọ Ebaibol na o wuhrẹ ghaghae. Maero, me yere Jihova Ọghẹnẹ gaga rọkẹ uyoyou-ẹwo riẹ nọ o ro si omẹ kẹle oma.

[Ẹme nọ a fi ẹgba họ nọ ọ rrọ ẹwẹ-obe avọ 27]

“Me wuhrẹ nọ uruemu mẹ o rẹ sae kẹ Jihova uye hayo evawere”

[Uwoho nọ o rrọ ẹwẹ-obe avọ 27]

Mẹ avọ aye mẹ gbe ọmọtẹ mai

[Uwoho nọ o rrọ ẹwẹ-obe avọ 27]

Me muẹrohọ emamọ inwene evaọ uruemu oni mẹ