Si Kẹle Ọghẹnẹ

Erugba Owha-Iruo Mai Evaọ Aro Ọghẹnẹ

KỌ WHỌ sae nọ omara no ẹdẹjọ inọ, ‘Eme họ ẹjiroro uzuazọ?’ Jihova ọ ma omai avọ ẹgba-iroro nọ ma sae rọ nọ onọ utioye na, gbe isiuru nọ ma rọ gwọlọ riẹ uyo na. U woma kẹhẹ, Ọghẹnẹ oyoyou mai na ọ ko uyo na dhere omai hi. Ma rẹ ruẹ uyo onọ yena nọ o rrọ omai oja na evaọ Ẹme riẹ, Ebaibol na. Muẹrohọ eme nọ Solomọn ovie na ọ ta evaọ Ọtausiuwoma Na 12:13.

Solomọn ọ jọ ohwo nọ uyero riẹ o jọ oghẹrẹsa. Fikiere, ọ sae ta kpahe epanọ a sae rọ ruẹ evawere je yeri uvi uzuazọ. Fiki areghẹ odidi, efe obuobu, gbe ọkwa ovie nọ Ọghẹnẹ ọ rọ ghale Solomọn, u ru nọ ọ sae rọ romatotọ kiẹ iruẹru ohwo-akpọ riwi, onọ o kẹre te efe gbe okpodẹ ule. (Ọtausiuwoma Na 2:4-9; 4:4) Kẹsena, avọ obufihọ ẹzi ọfuafo na, o te ku ẹme riẹ họ inọ: “Dhẹozọ Ọghẹnẹ, who koko izi riẹ; keme onana họ iruo kpobi nọ i te ohwo e ruo.” Eme yena i dhesẹ oware nọ o mai wuzou jẹ mae kẹ evevọwẹ nọ ohwo-akpọ ọ rẹ sai ru.

‘Dhozọ Ọghẹnẹ uzẹme na.’ Ẹme na “dhẹozọ Ọghẹnẹ” o rẹ nwani siuru tere he nọ ohwo o te yoi evaọ oke ọsosuọ. Rekọ onana yọ emamọ ozodhẹ nọ u re n’udu ze. Onana orọnikọ iguegue nọ ọrigbo ọ rẹ rọ yọroma re ọ siọ ọga ọgeva riẹ eva ba erudha ha, rekọ oghẹrẹ ozodhẹ orọ ọmọ nọ ọ gwọlọ ru eva were ọsẹ oyoyou riẹ. Obe jọ o ta nọ ozodhẹ nọ a re wo kẹ Ọghẹnẹ yọ “adhẹẹ gbe ọwhewhe nọ ahwo riẹ a re wo kẹe fikinọ a you rie je wo adhẹẹ kẹ ogaga gbe oruaro riẹ.” Ozodhẹ nana o rẹ wọ omai ru oreva Ọghẹnẹ keme ma you rie ma tẹ jẹ riẹ nọ o you omai. Emamọ ozodhẹ nana o rrọ oware nọ o rẹ jọ ohwo udu ọvo ho; a rẹ rọ uruemu dhesẹ iẹe via. Evaọ oghẹrẹ vẹ?

“Koko izi riẹ.” Ozodhẹ Ọghẹnẹ o rẹ wọ omai yoẹme kẹe. O rrọ oware areghẹ re ma yoẹme kẹ Jihova. Fikinọ ọye ọ ma omai, ọ riẹ oghẹrẹ nọ o mai woma nọ u fo nọ ma re yeri uzuazọ, nwane wọhọ epanọ ohwo nọ o ku oware ọ rẹ mae riẹ edhere nọ ọ mai woma nọ a rẹ rọ rehọ okwakwa na ruiruo na. Ofariẹ, Jihova o wo ewoma mai họ iroro. Ọ gwọlọ nọ ma wereva, yọ izi riẹ e rrọ rọkẹ ewoma mai. (Aizaya 48:17) Jọn ukọ na o fi ẹme na họ enẹ: “Uyoyou Ọghẹnẹ ona, nnọ ma re koko ijaje riẹ. Whaọ ijaje riẹ erọ owha ogbẹgbẹdẹ hẹ.” (1 Jọn 5:3) Ẹmeoyo mai u re dhesẹ uyoyou nọ ma wo kẹ Ọghẹnẹ via, yọ izi Ọghẹnẹ i dhesẹ uyoyou nọ o wo kẹ omai.

“Onana họ iruo kpobi nọ i te ohwo e ruo.” Eme nana i dhesẹ oware jọ nọ u ro wuzou re ma dhozọ Ọghẹnẹ je yoẹme kẹe. Re ma dhozọ Ọghẹnẹ yọ owhai-iruo nọ u te omai. Jihova họ Ọnọ ọ ma omai, fikiere, ọye o wo uzuazọ mai. (Olezi 36:9) O gwọlọ nọ ma re yoẹme kẹe hrọ. Nọ ma te bi yeri uzuazọ evaọ oghẹrẹ nọ ọ gwọlọ, yọ ma bi ru owha-iruo nọ u te omai gba.

Nọ o rrọ ere na, eme họ ẹjiroro uzuazọ? Re a tae kpẹkpẹ: Ma rrọ uzuazọ re ma ru oreva Ọghẹnẹ. Edhere ọfa ọ riẹ hẹ nọ o rẹ lẹliẹ owhẹ wo uvi ẹjiroro evaọ uzuazọ vi onana. Kọ who gbe wuhrẹ eware efa kpahe oreva Jihova gbe oghẹrẹ nọ whọ sai ro yeri uzuazọ ra rọwokugbe oyena? O te were Isẹri Jihova re a fi obọ họ kẹ owhẹ.