Wuhrẹ No Ẹme Ọghẹnẹ Ze

Oghẹrẹ Vẹ Izi Ọghẹnẹ E rẹ rọ Kẹ Omai Erere?

Uzoẹme nana u dhunu te enọ jọ nọ o rẹ sae jọnọ whọ nọ no ẹdẹjọ, u te je dhesẹ oria nọ whọ rẹ sae jọ ruẹ iyo na evaọ Ebaibol ra. O te were Isẹri Jihova re a lele owhẹ ta ẹme kpahe iyo na.

1. Fikieme u ro fo re ma yoẹme kẹ Ọghẹnẹ?

Ẹmeoyo kẹ Ọghẹnẹ yọ oware nọ u fo—ọye ọ ma omai. Makọ Jesu o re yoẹme kẹ Ọghẹnẹ ẹsikpobi. (Jọn 6:38; Eviavia 4:11) Izi nọ Ọghẹnẹ o fihọ e kẹ omai uvẹ nọ ma re ro dhesẹ nọ ma you rie.—Se 1 Jọn 5:3.

Izi Jihova Ọghẹnẹ kpobi e rrọ rọkẹ ewoma mai. I re wuhrẹ omai edhere uzuazọ nọ ọ mai woma enẹna, je dhesẹ epanọ ma sai ro wo eghale ebẹdẹ bẹdẹ t’obọ evaọ obaro.—Se Olezi 19:7, 11; Aizaya 48:17, 18.

2. Oghẹrẹ vẹ izi Ọghẹnẹ i re ro fi obọ họ kẹ omai wo omokpokpọ?

Uzi Ọghẹnẹ nọ o ghọ idieda-thomawa o rẹ thọ omai no ikpehre eyao gbe asidẹnte. Udi nọ a rẹ da vrẹta o rẹ reria ohwo obọ, yọ o rẹ lẹliẹ ohwo ru eware igheghẹ. (Itẹ 23:20, 29, 30) Jihova ọ kẹ uvẹ re ma da udi ogaga, rekọ o rẹ jọ umutho.—Se Olezi 104:15; 1 Ahwo Kọrint 6:10.

Jihova ọ vẹvẹ omai unu re kpahe ihri-eriọ, ofu ọkpoo, gbe iruemu enwoma efa nọ i fo ho. Epanọ ma fi ehrẹ Jihova họ iruo te, ere i re fi obọ họ kẹ omai wo omokpokpọ te.—Se Itẹ 14:30; 22:24, 25.

3. Oghẹrẹ vẹ uzi Ọghẹnẹ o sae rọ thọ omai?

Uzi Ọghẹnẹ o ghọ owezẹ kugbe omọfa nọ ọ rrọ ọrivẹ-orọo ohwo ho. (Ahwo Hibru 13:4) Imava-orọo nọ i bi koko uzi nana a re viẹro ku ohwohwo ho, yọ uviuwou na o rẹ jọ oria evawere kẹ emọ rai. Evaọ abọdekọ riẹ, nọ ọzae hayo aye nọ ọ rọo no o te bruẹnwae, ẹsibuobu o rẹ wha eyao igberẹ nọ i re vo, orọo-ofa, ohọre, gbe edada-iroro ze, je ru nọ ọyewọ ọvo ọ rẹ rọ wọ owha ẹruorote uviuwou.—Se Itẹ 5:1-9.

Nọ ma tẹ be whaha iyero nọ i re fi omai họ odawọ nọ ma rẹ rọ wezẹ kugbe ohwo nọ ọ rrọ ọrivẹ-orọo mai hi, yọ ma be yọrọ usu mai kugbe Ọghẹnẹ. Onana u re je ru nọ ma gbẹ rọ wha enwoma se amọfa ha.—Se 1 Ahwo Tẹsalonika 4:3-6.

  4. Ẹvẹ adhẹẹ nọ ma re wo kẹ uzuazọ o rẹ rọ kẹ omai erere?

Ahwo nọ i wo adhẹẹ kẹ uzuazọ nọ Ọghẹnẹ ọ kẹ omai na a re wo omokpokpọ nọ a te si obọ no iruemu igbegbe wọhọ ivovavovo gbe iruemu efa nọ i re fi uzuazọ ohwo họ ọza. (2 Ahwo Kọrint 7:1) Makọ uzuazọ ọmọ nọ ọ gbẹ rrọ edhede oni riẹ dede o rrọ ghaghae kẹ Ọghẹnẹ. (Ọnyano 21:22, 23) Fikiere, ma re keke aro họ kpe ọmọ otioye nọ ọ gbẹ rrọ obeva ha. Ofariẹ, ahwo nọ a wo adhẹẹ kẹ eriwo Ọghẹnẹ kpahe uzuazọ a re se omoyọrọ nọ a rẹ rọ whaha omonwa gboja evaọ oria iruo rai, obọ uwou rai, gbe edhadhẹ imoto. (Iziewariẹ 22:8) U te no ere no, a re fi uzuazọ rai họ ọza evaọ arozaha oma-uru-sasa ha, keme uzuazọ yọ okẹ nọ u no obọ Ọghẹnẹ ze.—Se Olezi 36:9.

5. Ẹvẹ ma re ro wo erere nọ ma te rri azẹ ghaghae wọhọ epanọ Ọghẹnẹ ọ rehọ e riẹ?

Azẹ yọ oware nọ a re rri ghaghae keme Ọghẹnẹ ọ ta nọ azẹ họ uzuazọ. (Emuhọ 9:3, 4) Uzi Ọghẹnẹ nọ o ta nọ azẹ họ uzuazọ na o rẹ kẹ omai erere. Evaọ oghẹrẹ vẹ? Ọghẹnẹ ọ rọ ẹkwoma uzi yena ru ei lọhọ re ọ sae rọ izieraha mai vrẹ omai.—Se Iruo-Izerẹ 17:11-13; Ahwo Hibru 9:22.

Fikinọ Jesu ọ rrọ gbagba, azẹ riẹ o wo aghare vi azẹ mai. Jesu ọ rọ azẹ riẹ, onọ u dikihẹ kẹ uzuazọ riẹ ro dheidhe kẹ Ọghẹnẹ. (Ahwo Hibru 9:12) Azẹ riẹ nọ o ro dheidhe u rovie uvẹ uzuazọ ebẹdẹ bẹdẹ họ kẹ omai.—Se Matiu 26:28; Jọn 3:16.

Rọkẹ evuẹ efa, rri uzou avọ 12 gbe 13 orọ obe nana, Eme Ebaibol na O Gine Wuhrẹ? onọ Isẹri Jihova a kere.