Okpẹtu Ọ Gbẹ te Jọ Họ!

OHWO jọ ọ tẹ vuẹ owhẹ nọ, “Kẹlena okpẹtu ọ gbẹ te jọ họ,” ẹvẹ who ti rri ẹme na? Ẹsejọhọ whọ te kpahe kẹe nọ, “Whọ be fake ta. Okpẹtu yọ abọjọ uzuazọ.” Hayo whọ sae jọ udu ra ta nọ, ‘Ono o roro nọ ọ be viẹhọ?’

Dedenọ o wọhọ nọ okpẹtu nọ a r’obọ so ho o ti n’otọ ẹdẹvo ho, ẹruore nọ o muẹro ọ riẹ inọ o ti n’otọ ẹdẹjọ. Dede na, orọnikọ omodawọ ohwo-akpọ o te wha enwene na ze he. Ahwo-akpọ a re sai wo otoriẹ uvevẹ orọ oware nọ o soriẹ gbe oghẹrẹ nọ ekwakwa otọ na gbe erọ idedeghe e be rọ wha ọraha ze he, kabikọ re a riẹ epanọ a rẹ rọ kpọ ae. Solomọn, ovie Izrẹl oke anwae nọ a riẹ wọhọ ohwo nọ o wo areghẹ gbe orimuo gaga na, o kere nọ: “Ohwo ọvo ọ sae riẹ otọ eware nọ e be via evaọ otọ akpọ na ha. Dede nọ ohwo ọ be ya re ọ riẹ otọ [riẹ], ọ sae gwọlọ iẹe via ha; dede nọ ohwo nọ o wo areghẹ ọ be ta nọ ọ riẹ . . . ọ sae gwọlọ iẹe via ha.”—Ọtausiuwoma Na 8:17.

Otẹrọnọ ahwo-akpọ a sai si okpẹtu nọ a r’obọ so ho n’otọ họ, kọ ono ọ rẹ sai ru ere? Ebaibol ọ ta nọ Ọnọ ọ ma omai na o ti ru onana. Ọye họ Ọnọ ọ ruẹrẹ ekwakwa otọakpọ na họ ẹta rai, wọhọ oriruo, oso ọ tẹ rọ no ehru ze, nọ uvou u je mu ame na, ọ vẹ wariẹ zihe kpohọ ehru wọhọ erri jẹ wariẹ rọ ze. (Ọtausiuwoma Na 1:7) Yọ wo ohẹriẹ gaga no ahwo-akpọ, Ọghẹnẹ o wo ogaga nọ u wo ibe he. Jerimaya ọruẹaro na ọ kẹ imuẹro onana nọ ọ ta nọ: “Ọnowo ỌGHẸNẸ! Ogaga ulogbo gbe ẹgba obọ ra who ro ru odhiwu gbe akpọ na. Oware ovo o rẹ bẹ kẹ owhẹ hẹ.” (Jerimaya 32:17) Nọ orọnọ Ọghẹnẹ ọ ma otọakpọ gbe eware kpobi nọ e riẹe eva na, u muẹro inọ ọ riẹ oghẹrẹ nọ ọ rẹ rọ kpọ eware nọ ọ ma nọ ahwo-akpọ a jẹ sae rria otọakpọ na dhedhẹ avọ ufuoma.—Olezi 37:11; 115:16.

Kọ ẹvẹ Ọghẹnẹ ọ te rọ wha enwene nọ o gwọlọ ze? Kareghẹhọ nọ uzoẹme avivẹ evaọ ẹme nana o ta nọ eware imuozọ buobu nọ e rrọ otọakpọ via nẹnẹ na i ru “oka” nọ u ti dhesẹ “urere akpọ na.” Jesu ọ ta nọ: “Nọ wha ruẹ eware enana nọ i biti ruẹ, wha riẹ nọ uvie Ọghẹnẹ o kẹle ino.” (Matiu 24:3; Luk 21:31) Uvie Ọghẹnẹ, koyehọ egọmeti obọ odhiwu Ọghẹnẹ, o te wha inwene ilogbo ziọ otọakpọ na, tube ru nọ ekwakwa otọ na gbe erọ idedeghe na e gbẹ te wha ọraha ze he. Dede nọ Jihova Ọghẹnẹ ọvo ọ rẹ sai ru onana, ọ rehọ iruo na kẹ Ọmọ riẹ.  Daniẹl ọruẹaro na ọ ta kpahe Ọmọ nana inọ: “Ọye a rehọ isuẹsu gbe oruaro gbe uvie rọ kẹ, re ahwo kpobi, erẹwho gbe evẹrẹ kpobi, re a ruẹse [romakpotọ kẹe].”—Daniẹl 7:14.

A kẹ Ọmọ Ọghẹnẹ, Jesu Kristi, udu nọ ọ rẹ rọ wha inwene nọ i fo ze re otọakpọ na o sae jọ oria omawere. Nọ Jesu ọ jọ otọakpọ na, oware wọhọ ikpe idu ivẹ nọ i kpemu, ọ rọ ogaga nọ Ọghẹnẹ ọ kẹ riẹ ro dhesẹ via inọ ọ rẹ sae kpọ ekwakwa otọ gbe erọ idedeghe na. Evaọ ẹdẹjọ nọ ọyomariẹ avọ ilele riẹ a jọ evaọ okọ evaọ Abade Galili, “ofou ologbo jọ o te fou, ẹvohẹ ọ tẹ tehe okọ [na], epa ere re okọ o tẹ ze vọ no.” Ozọ u mu ilele riẹ gaga. A te bi bo sei. Eme Jesu o ru? Ọ “whọku ofou, ọ tẹ ta kẹ abade nọ, ‘Fọ, o jere.’ Ofou ọ tẹ ka, ọ tẹ fọ rirẹ.” Akpọ o gbe ilele na unu, a tẹ jẹ nọ omoma rai nọ: “Kọ nọ ono, nọ makọ ofou gbe abade i re yo ẹme riẹ?”—Mak 4:37-41.

A kpare Jesu kpohọ odhiwu no wọhọ omama ẹzi anwọ oke yena, yọ a kẹ riẹ udu-esuo gbe ogaga ulogbo no. Wọhọ Ovie ọrọ Uvie Ọghẹnẹ, a kẹ Jesu iruo gbe ogaga nọ ọ te rọ wha inwene kpobi nọ ahwo-akpọ a gwọlọ ze, onọ u ti ru ahwo-akpọ wo udhedhẹ gbe omofọwẹ evaọ otọakpọ.

Dede na, wọhọ epanọ ma ruẹ vuhumu no na, ahwo-akpọ a bi fiba hayo wha ebẹbẹ gbe ikpẹtu buobu nọ e be via na ze ẹkwoma iruẹru oriobọ hayo uvou-uthei rai. Eme Uvie Ọghẹnẹ u ti ru kpahe ahwo nọ a be ruabọhọ iruemu itienana nọ a be rọwo nwene he? Ebaibol na ọ ta kpahe ẹtha Olori na Jesu inọ o ti “no odhiwu tha avọ otu ikọ-odhiwu iride riẹ avọ ebruerae. Ọ vẹ te rehọ uye hwa osa kẹ enọ e riẹ Ọghẹnẹ hẹ, gbe enọ e kezọ usiuwoma Jesu Ọnowo mai hi.” Ẹhẹ, ọ te ‘raha enọ e be raha akpọ na.’—2 Ahwo Tẹsalonika 1:7, 8; Eviavia 11:18.

Kẹsena, “Ovie ivie” nana, Jesu Kristi ọ vẹ te ruẹ nọ ekwakwa otọ na gbe erọ idedeghe na i ru iruo rai dẹdẹ. (Eviavia 19:16) Ọ te ruẹ nọ uvumọ ohwo ọ te gbẹ ruẹ uye okpẹtu hu evaọ otọ Uvie na. Ọ te rọ ogaga riẹ kpọ ekwakwa otọ gbe idedeghe na evaọ edhere nọ ẹroro hayo oso gbe ezi sa-sa e te rọ kẹ ohwo-akpọ erere. Onana u ve ti su kpohọ orugba oware nọ Jihova Ọghẹnẹ ọ ya eyaa riẹ kẹ idibo riẹ oke anwae inọ: “Me [ti] vi oso se owhai evaọ ezi riẹ, otọ na o vẹ kẹ ẹvi riẹ jegbe ire na e vẹ te mọ ibi rai.” (Iruo-Izerẹ 26:4) Ahwo a te bọ iwou ababọ ozọ inọ oghẹrẹ okpẹtu jọ ọ te raha iwou rai: “A rẹ te bọ iwou a vẹ ria ae tọ, a rẹ te kọ ọgbọ-evaene a vẹ re ibi riẹ.”—Aizaya 65:21.

Eme O Gwọlọ nọ Who re Ru?

Ababọ avro, wọhọ epanọ o rrọ kẹ ahwo buobu, o te were owhẹ re whọ rria akpọ nọ okpẹtu ọ te jọ họ. Kọ eme o gwọlọ nọ who ru re whọ ruẹse rria akpọ yena? Nọ o rọnọ ‘enọ e riẹ Ọghẹnẹ hẹ, gbe enọ e kezọ usiuwoma na ha’ a te sae ruọ akpọ ọkpokpọ nọ ọ kare okpẹtu hu na, o rrọ vevẹ inọ o gba ohwo họ inọ o re wuhrẹ kpahe Ọghẹnẹ enẹna jẹ tha ọruẹrẹfihotọ esuo riẹ kẹ otọakpọ na uke. Ọghẹnẹ ọ gwọlọ nọ ma riẹ ọyomariẹ je yoẹme kẹ emamọ usi orọ Uvie nọ ọ rọ ẹkwoma Ọmọ riẹ ru ọruẹrẹfihotọ riẹ no na.

Edhere nọ ọ mai woma nọ whọ sai ro wuhrẹ epanọ who re ro ru onana họ, Ebaibol na nọ whọ rẹ romatotọ wuhrẹ. Ebaibol na o wo ehrẹ nọ i re fi obọ họ kẹ ohwo te kẹ uzuazọ ufuoma nọ o te jọ otọ esuo Uvie na. Kọ whọ gbẹ ta kẹ Isẹri Jihova re a fi obọ họ kẹ owhẹ riẹ oware nọ Ebaibol na o wuhrẹ? A tubẹ ruẹrẹ oma kpahe kẹ ayare otioye. Oware jọ u muẹro—whọ tẹ ginẹ daoma re whọ riẹ Ọghẹnẹ je yoẹme kẹ emamọ usi na, eme ọ obe Itẹ 1:33 i re ti rugba k’owhẹ: “Ohwo nọ ọ gaviezọ kẹ omẹ ọ rẹte ria evaọ omofọwẹ, ọ rẹ te jọ udhedhẹ, ababọ ozọ eyoma.”