Okpẹtu nọ A r’Obọ So Ho​—Fikieme I Ro Bu Tenẹ?

O WỌHỌ nọ usi okpẹtu nọ a r’obọ so ho o be da iyẹrẹ fia enẹna. Ahwo nọ okpẹtu sa-sa nọ a r’obọ so ho u bi kpomahọ nẹnẹ a bi dhe ebuebu. Oria jọ evaọ orẹwho Belgium nọ a re jo ru ekiakiẹ kpahe okpẹtu nọ a r’obọ so ho o niyẹrẹ inọ evaọ ukpe ọ 2010 ọvo, okpẹtu sa-sa nọ e via i bu te udhusoi akuasa gbe udhosa gbe ikpegbesa (373), yọ o tẹ kawo ahwo nọ onana o wha uwhu se a bu te idu udhusoi akuava gbe udhone gbe ikpegbezeza (296,000).

Anwọ ikpe jọ ze na, unu okpẹtu nọ ohwo ọ r’obọ so ho nọ a niyẹrẹ rai i bu thesiwa no. Wọhọ oriruo, no ukpe ọ 1975 rite ukpe 1999, okpẹtu nọ a niyẹrẹ rai nọ e via k’ukpe k’ukpe e kawo vi udhusoi akuasa (300). Rekọ, no ukpe 2000 rite 2010, okpẹtu nọ e via k’ukpe k’ukpe e joma te udhusoi akuane (400). Ẹsejọhọ whọ rrọ usu ahwo nọ a wo onọ nana họ iroro inọ, ‘Fikieme okpẹtu ọ be rọ via kiti tenẹ enẹna?’

Dede nọ ahwo a be hae ta nọ okpẹtu itienana yọ “iruo-abọ Ọghẹnẹ,” orọnikọ ere o rrọ họ. Obọ Ọghẹnẹ o rrọ okpẹtu nọ ahwo buobu a be ruẹ uye riẹ nẹnẹ na ha. Dede na, Ebaibol ọ ta nọ okpẹtu sa-sa nọ a r’obọ so ho e te via evaọ oke mai na. Wọhọ oriruo, Jesu ọ ta evaọ obe Matiu 24:7, 8 inọ: “Ohọo u re ti muẹ gbe otọ u re ti nuhẹ eva egheghẹrẹ eria; rekọ enana họ emuhọ uye na.” Fikieme Jesu ọ rọ ta nọ eware itienana e te via, kọ didi otofa i wo k’omai nẹnẹ?

Jesu ọ ta eme yena rọ kuyo onọ nọ a nọ riẹ inọ: “Eme ọ rẹ te jọ oka . . . urere akpọ na?” (Matiu 24:3) Ọ fodẹ eware sa-sa nọ e te via, onọ o kẹre te eware okpẹtu nọ ma fodẹ no na. Kẹsena ọ tẹ ta ẹme nana nọ o wuzou gaga na inọ: “Nọ wha ruẹ eware enana nọ i biti ruẹ, wha riẹ nọ uvie Ọghẹnẹ o kẹle ino.” (Luk 21:31) Fikiere, eware okpẹtu nọ a r’obọ so ho na i wo otofa ulogbo kẹ omai. E riobọhọ etoke enwene ologbo nọ ọ te romavia kẹlena.

Eware nọ I bi Kuobọgbe Wha Okpẹtu nọ A r’Obọ So Ho Ze

Rekọ ahwo buobu a gbẹ be nọ inọ, Kọ otẹrọnọ Ọghẹnẹ ọ be wha okpẹtu na ze he, kọ eme hayo ono ọ be whae ze? Ma rẹ sae riẹ uyo na  otẹrọnọ ma wo otoriẹ ugogo uzẹme jọ nọ o rrọ Ebaibol na: “Akpọ na ọsoso ọ rọ obọ ogaga oyoma na.” (1 Jọn 5:19) Owọ ikere nana u dhesẹ inọ orọnọ Ọghẹnẹ ọ be wha okpẹtu nọ ahwo-akpọ a be ruẹ uye rai na ze he. Setan, “oyoma na”—ọnọ a jọ Ebaibol se “Ukumuomu” na họ ọnọ ọ be wha ibuobu okpẹtu na ze.—Eviavia 12:9, 12.

Avọ ẹzi oriobọ nọ o be wọe, ọwegrẹ Ọghẹnẹ nana o bi rri ahwo-akpọ wọhọ ekwakwa gheghe nọ a rẹ sai kufiẹ evaọ okenọ u je. Nọ akpọ na kpobi ọ rrọ otọ riẹ na, ọ whẹ ẹzi oriobọ ọvona họ ahwo-akpọ no. Ẹhẹ, Ebaibol ọ fodẹ onana inọ “eva edẹ urere,” ahwo “a re ti you oma-obọrai, je you igho, a ve ti heri-oheri avọ oma-ovia.” (2 Timoti 3:1, 2) Fikiere, u re gb’omai unu hu inọ Setan o bi ru ahwo wo ẹzi oriobọ gbe ikpehre iruemu itieye na efa wariẹ akpọ-soso họ. O bi ru ahwo rọ oriobọ gbe uvou-uthei ru eware, onọ u bi fi uzuazọ ahwo họ ọza.

Oghẹrẹ vẹ ẹzi uvou-uthei nọ o d’otọ fia nẹnẹ u bi ro kuobọgbe wha okpẹtu ze? Iyẹrẹ nọ i no Ukoko Okugbe Erẹwho na ze e ta nọ: “Ẹsibuobu ahwo a be hae rria eria nọ e rrọ ọza nọ okpẹtu ọ rẹ sae jọ romavia, wọhọ eria nọ ẹvo o re ku. U te no ere no, ewhawho nọ a bi kpe gbe etẹre nọ a bi di no u ru nọ otọ na o gbẹ be sae roma za okpẹtu hu. Onọ o mae rro họ, ẹroro ọgaga nọ o bi no iruẹru ohwo-akpọ ze . . . onọ u bi ru idedeghe na roro vrẹta jẹ be ghra ekpalekpa-ame abade, nọ u ru nọ ame abade o bi ro bu.” Dede nọ a be ta nọ “iruẹru ahwo-akpọ” nana e rọ rọkẹ ẹnyaharo ekọ, uzẹme riẹ họ ẹzi oriobọ gbe uvou-uthei nọ e da akpọ na fia o be wha onana ze.

Fikiere, ahwo nọ a ru ekiakiẹ a ruẹ vuhumu no inọ eware nọ ahwo-akpọ a bi ru epanọ u je u bi ru nọ ọraha nọ o bi no okpẹtu nọ a r’obọ so ho ze ọ be rọ ga thesiwa. Evaọ uzẹme, ahwo-akpọ a bi kuobọgbe Setan Ẹdhọ na raha akpọ na.

Ma ruẹ vuhumu no inọ okpẹtu buobu nọ ma be ruẹ uye rai nẹnẹ na e be romavia fikinọ ahwo-akpọ a be daezọ iruẹru rai hi. Ikpẹtu jọ e hae te raha ọraha tere he o gbẹ rrọ oghẹrẹ eria nọ e jọ romavia ha. Evaọ eria buobu akpọ na, ọraha nọ e be romavia e be ga thesiwa fiki ahwo oyoma nọ a be rọ ekwakwa nọ e rẹ raha akpọ na ruiruo, hayo fikinọ ahwo a be rria eria nọ u fo nọ ahwo a hae rria ha fiki ẹbẹbẹ ugho nọ ọ da akpọ inẹnẹ fia na. Uzẹme, ahwo jọ a be ruẹ uye ọraha, orọnikọ fiki iruo-abọ omọfa jọ hayo abọgbekẹ hẹ rekọ fikinọ eware idudhe e rẹ sae via kẹ ohwo kpobi.—Ọtausiuwoma Na 9:11.

Ghelọ oware nọ o wha okpẹtu ze kpobi, eme whọ rẹ sai ru nọ ẹbẹbẹ na ọ gbẹ yawo owhẹ oma gahrọ họ? Obọnana, ma be te ta ẹme kpahe oware nọ a rẹ sai ru nọ ọraha nọ o re no okpẹtu ze ọ gbẹ gahrọ họ.

[Uwoho nọ o rrọ ẹwẹ-obe avọ 5]

Ubu-ahwo evaọ okegbe

[Uwoho nọ o rrọ ẹwẹ-obe avọ 5]

Ewhawho nọ a bi kpe

[Uwoho nọ o rrọ ẹwẹ-obe avọ 5]

Okegbe nọ a be nua

[Enọ i wo iwoho nọ o rrọ ẹwẹ-obe avọ 5]

Ẹkpẹlobọ: © Mark Henley/Panos Pictures

Udevie: © Jeroen Oerlemans/Panos Pictures