Owọ nọ A rẹ Sae Jẹ Kpahe Okpẹtu nọ A r’Obọ So Ho

Nọ okpẹtu nọ a r’obọ so ho ọ be hae romavia ẹsikpobi jẹ be raha ọraha gaga na, eme ohwo ọ rẹ sai ru nọ o tẹ romavia? Joma ta ẹme kpahe eware sa-sa nọ ohwo ọ rẹ sai ru nọ i re fi obọ họ.

Kẹnoma no eria ọza. Ebaibol na ọ ta nọ: “Ohwo owareghẹ ọ ruẹ ese o re siomano, rekọ ogbori o re zue ruẹe, ọ vẹ ruẹ uye riẹ.” (Itẹ 22:3) Onana yọ emamọ ohrẹ nọ a rẹ sai fihọ iruo evaọ ẹme okpẹtu nọ a r’obọ so ho. Nọ a tẹ kẹ unuovẹvẹ inọ otọ-nuhu, ẹvo, hayo ofou-ọwhibo ọ be te romavia, o rrọ oware areghẹ re ahwo nọ a rrọ oria na a dhẹ no etẹe kpohọ oria nọ o fọ oma. Uzuazọ o ghare vi uwou hayo ekwakwa efa kpobi.

Rọkẹ ahwo jọ, o rẹ sae lọhọ re a jiroro inọ a rẹ whaha ẹria oria ọza nọ okpẹtu ọ rẹ sae jọ romavia. Obe jọ o ta nọ: “U wo ugogo eria nọ ọza ọrọ okpẹtu ologbo ọ jẹ mae ga. Abọjọ kakao otọakpọ na ọ mae rrọ ọza ologbo otiọye na, yọ eria itieye na eye okpẹtu ilogbo buobu e te jọ romavia evaọ obaro.” Wọhọ oriruo, eria nọ e kẹle abade hayo eria nọ e jọ obotọ va yọ eria itieye na jọ. Otẹrọnọ whọ sae whaha ẹria oghẹrẹ eria itieye na, hayo kwa kpohọ oria nọ o mae fọ oma, ẹsejọhọ whọ sae whaha uye nọ u re no okpẹtu otiọye ze.

Wo omaa. Ghelọ omoyọrọ kpobi kẹhẹ, ẹsejọhọ okpẹtu nọ a r’obọ so ho ọ rẹ sai kpomahọ owhẹ ghele. Nọ who te wo emamọ omaa kpahotọ, ebẹbẹ nọ i re no okpẹtu itieye na ze e rẹ gbẹ yawo owhẹ oma gahrọ họ. Yọ onana o rọwokugbe ohrẹ nọ o rrọ obe Itẹ 22:3 nọ ma fodẹ no ẹsejọ na. Kọ who wo ẹkpa ọgbohrẹ idudhe nọ whọ ruẹrẹ eware fihọ kpahe no? Obe jọ nọ a re se 1-2-3 of Disaster Education o ta nọ usu eware nọ who re fihọ ẹkpa nana họ: Imu gbe oghẹrẹ eware efa nọ a sai ro siwi ohwo nọ ọ nwoma idudhe, ame, emu nọ ọ rẹ kake raha ha, gbe ebe nọ i wuzou k’owhẹ gaga. O rẹ jẹ jọ oware areghẹ re whọ hai lele uviuwou ra ta ẹme kpahe eghẹrẹ okpẹtu sa-sa nọ e rẹ sae romavia gbe oware nọ wha rẹ sai ru nọ ọjọ ọ tẹ romavia.

Yọrọ usu okpekpe kugbe Ọghẹnẹ. Onana o rẹ sai fi obọ họ evaọ oghẹrẹ uyero kpobi. Ebaibol ọ ta nọ Ọghẹnẹ yọ “Ọsẹ ohrọ kpobi jegbe Ọghẹnẹ omosasọ kpobi; ọnọ o [re] ru omai wo omosasọ eva uye mai.”—2 Ahwo Kọrint 1:3, 4.

Ẹhẹ, Ọghẹnẹ ọ riẹ oware kpobi nọ o be via kẹ ahwo nọ a fi ẹrọwọ họ iẹe. Ọ rrọ yoyou, yọ ọ rẹ kẹ omai uduotahawọ nọ o rẹ sasa omai oma evaọ idhere sa-sa. (1 Jọn 4:8) Ma rẹ lẹ se Ọghẹnẹ orọnikọ re o ru iruo igbunu kẹ omai hi, rekọ re ọ rọ ẹzi ọfuafo riẹ fi obọ họ kẹ omai evaọ otọ uyero kpobi. Ẹzi ọfuafo na ọ rẹ sae kareghẹhọ  ahwo nọ uye u te oma eria ikere nọ e rẹ kẹ omosasọ je ru udu kie ai vi. Ẹhẹ, udu o rẹ sai kie idibo Ọghẹnẹ nọ i wo ẹrọwọ vi wọhọ epanọ ọ jọ kẹ Devidi, ovie Izrẹl anwae nọ ọ ta nọ: “Mẹ tẹ make be nya eva ukpotọ uwoho uwhu, mẹ rẹ dhẹozọ oware uyoma ovo ho; keme who lele omẹ rọ; ọkpọ gbe umure ra, e rẹ sasa omẹ oma.”—Olezi 23:4.

Ileleikristi a re fi obọ họ kẹ ohwohwo. Evaọ ikpe-udhusoi ọsosuọ, Oleleikristi jọ nọ ọ jọ ọruẹaro nọ a re se Agabọs ọ ta nọ “ohọwo ulogbo jọ u bi ti muẹ evaọ akpọ na ọsoso; nọ o ghinẹ te via evaọ edẹ Klọdiọs.” Ohọo na u kpomahọ ilele Jesu buobu nọ e jọ obọ Judia gaga. Eme ilele nọ e jọ obọfa a ru nọ a yo kpahe ẹbẹbẹ nọ o te ibe Ileleikristi rai? Ikuigbe na e ta nọ: “Ilele na, duohwo duepanọ omomọvo ọ rẹ sai ruẹ, a te roro nọ, a re kpeze uko obufihọ se imoni nọ e rọ obọ Judia.” (Iruẹru Ikọ Na 11:28, 29) A rọ uyoyou jowọ ẹkwoma ekwakwa nọ a zọhọ ze ro fi obọ họ kẹ ae.

Nọ okpẹtu ọ tẹ romavia nẹnẹ, idibo Ọghẹnẹ a rẹ jẹ ọkpọ owọ ovona. A riẹ Isẹri Jihova inọ a rẹ dhogbo bru ibe Ileleikristi rai nọ okpẹtu o te oma. Wọhọ oriruo, nọ otọ nọ u nuhu gaga evaọ orẹwho Chile evaọ February 27, 2010 o wha ọraha ze, Isẹri Jihova a dhogbo bru ahwo nọ onana u kpomahọ ababọ oke-oraha. Omọvo Isẹri Jihova jọ nọ a re se Karla, ọnọ ẹkporo nọ o no abade ze ọ wọ uwou riẹ kufiẹ ọ ta nọ: “O jọ oware uduotahawọ gbe omosasọ nọ [ibe Isẹri Jihova] a dhogbo no eria efa ze okiokiọ riẹ ti fi obọ họ kẹ omai. Avro ọ riẹ hẹ, Jihova ọ rọ inievo nọ e fialoma ze na kẹ omai omosasọ. Mẹ ruẹ vuhumu inọ Jihova o gine you omẹ jẹ be kẹ omẹ uketha.” Ọsẹ-ode riẹ nọ ọ rrọ Osẹri Jihova ha ọ rọ ẹro ruẹ obufihọ inievo Ileleikristi na. Ọ ta nọ: “Onana u wo ohẹriẹ gaga no oware nọ mẹ ruẹ no evaọ ichọche mẹ anwọ ikpe buobu ze na.” Oware nọ ọ ruẹ o wọ riẹ yare Isẹri Jihova inọ a wuhrẹ Ebaibol kugbei.

Ma tẹ rrọ usu ahwo nọ a you Ọghẹnẹ o rẹ sai fi obọ họ gaga nọ okpẹtu ọ tẹ romavia. Ghele na, kọ oke jọ o te sae jariẹ nọ a gbẹ te rọ ẹro ruẹ okpẹtu nọ a r’obọ so ho evaọ otọakpọ na soso? Joma ruẹ oware nọ Ebaibol o ta kpahe onana.

[Uwoho nọ o rrọ ẹwẹ-obe avọ 6]

Kọ who wo ẹkpa ọgbohrẹ idudhe nọ whọ ruẹrẹ eware fihọ kpahe no?

[Uwoho nọ o rrọ ẹwẹ-obe avọ 7]

Ma rẹ lẹ se Ọghẹnẹ orọnikọ re o ru iruo igbunu kẹ omai hi, rekọ re ọ rọ ẹzi ọfuafo riẹ fi obọ họ kẹ omai evaọ otọ uyero kpobi

[Uwoho nọ o rrọ ẹwẹ-obe avọ 7]

Ileleikristi a re fi obọ họ kẹ ohwohwo nọ okpẹtu ọ tẹ romavia

[Uwoho nọ o rrọ ẹwẹ-obe avọ 7]

“Mẹ ruẹ vuhumu inọ Jihova o gine you omẹ jẹ be kẹ omẹ uketha”