Eware Nọ E Rẹ Wha Evawere Ze Uviuwou

Wha Bọ Edikihẹ Abọ-Ẹzi Rai Ga Wọhọ Imava-Orọo

Frederick *: “Nọ ma rọo obọ, me ru rie fihọ oware ọgbahọ inọ mẹ avọ aye mẹ ma re ru uwuhrẹ Ebaibol kugbe. Mẹ gba riẹ mu inọ mẹ rẹ rọ oghẹrẹ kpobi ruẹ nọ iroro riẹ e rrọ uwuhrẹ na. Rekọ o wọhọ nọ oma o rẹ sa Leanne, aye mẹ okpọ nọ ọ tẹ keria kẹ uwuhrẹ. Yọ mẹ tẹ nọ onọ, uyo Ee hayo ijo ọvo ọ rẹ kẹ. Ọ jẹ kpahe ẹme oghẹrẹ nọ me roro nọ o rẹ jọ evaọ uwuhrẹ Ebaibol ho.”

Leanne: “Ikpe 18 mẹ jọ nọ mẹ avọ Frederick ma ruọ orọo. Ma jẹ hai ru uwuhrẹ Ebaibol kugbe ẹsikpobi, rekọ Frederick ọzae mẹ ọ jẹ hae rọ uvẹ uwuhrẹ na ta ethobọ mẹ kpobi k’omẹ gbe eware nọ u fo nọ me re ru wọhọ aye uwou-orọo. Onana u fi elọhoma họ omẹ oma je ru nọ mẹ gbẹ jẹ wereva ha!”

EME who roro nọ o jọ ẹbẹbẹ Frederick avọ Leanne na? Aimava na a wo emamọ iroro họ eva. Aimava na a you Ọghẹnẹ. Yọ aimava a vuhumu nọ u fo re a wuhrẹ Ebaibol na kugbe. Rekọ o wọhọ nọ oware nọ o hai fi obọ họ ru aimava kpekpe u bi ru usu rai godo. A je gine ru uwuhrẹ kugbe, rekọ a jẹ bọ edikihẹ abọ-ẹzi rai ga wọhọ imava-orọo ho.

Oghẹrẹ uruemu vẹ u fo nọ Ileleikristi a re wo? Fikieme o rọ gwọlọ nọ ọzae avọ aye riẹ a rẹ daoma wo uruemu nana? Ebẹbẹ jọ vẹ a sae rẹriẹ ovao dhe, kọ ẹvẹ a sai ro fi ai kparobọ?

Oghẹrẹ Uruemu Vẹ U Fo nọ Ileleikristi A Re Wo?

Ebaibol na u dhesẹ iruemu sa-sa nọ u fo nọ ahwo a re wo evaọ uzuazọ. (Jud 18, 19) Wọhọ oriruo, Pọl, omọvo enọ i kere Ebaibol na, o dhesẹ ohẹriẹ nọ o rrọ udevie ohwo nọ o wo adhẹẹ kẹ izi Ọghẹnẹ gbe ohwo nọ o wo adhẹẹ kẹ izi Ọghẹnẹ hẹ . Pọl ọ ta nọ ahwo nọ a wo eriwo abọ-iwo a rẹ tẹrovi omobọrai ọvo siọ amọfa ba. A re ru onọ o jọ ẹro obọrai kiehọ, ukpenọ a rẹ daoma rria lele izi Ọghẹnẹ.—1 Ahwo Kọrint 2:14; Ahwo Galesha 5:19, 20.

Wo ohẹriẹ, ahwo nọ a wo eriwo abọ-ẹzi a re rri izi Ọghẹnẹ ghaghae. A rehọ Jihova Ọghẹnẹ inọ yọ Ogbẹnyusu rai, yọ a rẹ daoma rọ aro kele iei evaọ uruemu rai. (Ahwo Ẹfẹsọs 5:1) Fikiere, a rẹ rehọ uyoyou, ẹwo gbe omaurokpotọ yeri kugbe  amọfa. (Ọnyano 34:6) Yọ a re yoẹme kẹ Ọghẹnẹ makọ evaọ okenọ o rrọ bẹbẹ re a ru ere. (Olezi 15:1, 4) Darren, ọzae nọ ọ rọo te ikpe 35 no, ọnọ ọ be rria obọ Canada ọ ta nọ: “Oghẹrẹ nọ me wo otoriẹ riẹ họ, ohwo nọ o wo edikihẹ abọ-ẹzi o re roro ẹsikpobi kpahe oghẹrẹ nọ ẹmeunu gbe uruemu riẹ e rẹ sai kpomahọ usu riẹ kugbe Ọghẹnẹ.” Jane, aye riẹ o fibae nọ: “Evaọ eriwo mẹ, aye nọ o wo edikihẹ abọ-ẹzi ọ rẹ daoma kẹdẹ kẹdẹ re ọ ruẹ nọ o dhesẹ ubi ẹzi Ọghẹnẹ evaọ uruemu riẹ.”—Ahwo Galesha 5:22, 23.

Uzẹme, orọnọ ohwo nọ ọ rọo no ọvo o gwọlọ nọ ọ rẹ daoma bọ edikihẹ abọ-ẹzi riẹ ga ha. Ẹhẹ, Ebaibol na o wuhrẹ omai nọ o rrọ owha-iruo omomọvo re o wuhrẹ kpahe Ọghẹnẹ jẹ raro kele iei.—Iruẹru Ikọ Na 17:26, 27.

Fikieme U ro Fo re Imava-Orọo A Bọ Edikihẹ Abọ-Ẹzi Rai Ga?

Fikieme u ro fo re imava-orọo a daoma bọ edikihẹ abọ-ẹzi rai ga? Roro kpahe ọtadhesẹ nana: Imava jọ i wo ẹwẹ-otọ kugbe nọ a gwọlọ kọ eware fihọ. Ọjọ ọ gwọlọ nọ ọ rẹ kọ eware fihọ iẹe evaọ ugogo etoke jọ, rekọ ọdekọ o roro nọ oke ofa a rẹ rọ kọ eware na. Ọjọ ọ gwọlọ gua isọ erifẹ kugbe otọ na re ekakọ na e sae rro ziezi, rekọ ọdekọ ọ rọwo ho, o roro nọ ekakọ na e gwọlọ oware utioye he. Ọjọ ọ gwọlọ nọ ọ rẹ hai ruiruo evaọ udhu na ẹsikpobi. Ọdekọ ọ gwọlọ nọ ọ rẹ keria ọvo viukpenọ o kpohọ udhu na nyai ruiruo. Evaọ uyero utioye, ekakọ na e rẹ sae mọ, rekọ e rẹ te mọ te epanọ o hae te jọ họ o hae jọnọ imava nọ i wo udhu na a rọwokugbe evaọ oware nọ a re ru jẹ daoma ruiruo kugbe rẹrote udhu na.

Ọzae-avọ-aye a wọhọ imava yena nọ i wo udhu kugbe na. Omọvo rai jọ ọ tẹ be bọ edikihẹ abọ-ẹzi riẹ ga, oyerikugbe rai imava o rẹ sai woma omojọ. (1 Pita 3:1, 2) Rekọ dai roro epanọ oyerikugbe rai o re woma te nọ ai imava na a tẹ be rria lele izi Ọghẹnẹ jẹ daoma tha ohwohwo uke nọ a be gọ Ọghẹnẹ na! Solomọn ovie owareghẹ na o kere nọ: “Imava i woma vi omọvo.” Fikieme? “Keme a wo emamọ osaohwa rọkẹ iruo rai. Keme a te kie, ọjọ ọ rẹ kpare ọrivẹ riẹ.”—Ọtausiuwoma Na 4:9, 10.

Ẹsejọhọ o rrọ isiuru ra re whẹ avọ ọrivẹ-orọo ra wha bọ edikihẹ abọ-ẹzi rai ga. Rekọ wọhọ epanọ o rrọ evaọ ẹruorote udhu na, isiuru na ọvo e rẹ bọ edikihẹ abọ-ẹzi rai ga ha. Roro kpahe isẹ-abọ ivẹ jọ nọ wha rẹ sae rẹriẹ ovao dhe gbe oghẹrẹ nọ wha sai ro fi ae kparobọ.

USE-ABỌ ỌSOSUỌ: Ma be sai wo uvẹ hẹ. Aye jọ nọ a re se Sue nọ ọ rọo obọ, ọ ta nọ: “Ọzae mẹ ọ rẹ ziọ oria iruo mẹ te wọ omẹ kpo evaọ ighọjọ ihrẹ owọwọ. Nọ ma te te obọ uwou, yọ iruo uwou e vọ otọ be hẹrẹ omai. Iroro mai avọ ugboma mai i ve bi muabọ; udu mai o rẹ vuẹ omai nọ u fo re ma rọ oke jọ keria wuhrẹ kpahe Ọghẹnẹ, rekiyọ oma nọ o whọlọ omai no o be gwọlọ ekiẹzẹ.”

Oware nọ o rẹ sai fi obọ họ: Wha nwene omaa rai lele uyero rai je ruiruo kugbe. Aye nọ a re se Sue, ọ ta nọ: “Mẹ avọ ọzae mẹ ma jiroro nọ ma rẹ hae kake kpama re ma se jẹ ta kpahe oria jọ Ebaibol na taure ma te kpohọ iruo. Ọzae mẹ o re je fi obọ họ kẹ omẹ evaọ iruo uwou re mẹ sae ruẹ oke rọ jọ kugbei.” Didi irere i re no omodawọ utiona ze? Ed, nọ ọ rrọ ọzae Sue ọ ta nọ: “Mẹ ruẹ no inọ mẹ avọ Sue aye mẹ ma tẹ be hae ta kpahe eware abọ-ẹzi kugbe ẹsikpobi, ma rẹ sae rẹriẹ ovao dhe ebẹbẹ mai ziezi jẹ sai fi awaọruọ mai kparobọ.”

U te no ẹme nọ wha rẹ ta kugbe no, u wuzou re wha hae rọ oke jọ lẹ kugbe k’ẹdẹ k’ẹdẹ. Ẹvẹ oyena o sai ro fi obọ họ? Ọzae jọ nọ a re se Ryan, ọnọ ọ rọo te ikpe 16 no ọ ta nọ: “Omoke jọ nọ u kpemu, mẹ avọ aye mẹ ma rẹriẹ ovao dhe ẹbẹbẹ ọgaga jọ evaọ orọo mai. Rekọ ma ruẹrẹ oke fihọ nọ ma jẹ hae rọ lẹ kugbe k’aso k’aso, ta awaọruọ mai kẹ Ọghẹnẹ. Mẹ ruẹ nọ olẹ nọ ma jẹ hae lẹ kugbe na u fi obọ họ kẹ omai fi ebẹbẹ na kparobọ jẹ sae wariẹ wo evawere evaọ orọo mai.”

DAO ONANA: Wha fi omoke jọ họ evaọ owọwọ ẹdẹ kpobi nọ wha rẹ rọ ta ẹme kugbe wọhọ imava-orọo kpahe emamọ eware nọ e via kẹ owhai evaọ ẹdẹ yena, eware nọ wha rẹ sae rọ fiki rai kẹ Ọghẹnẹ uyere. Wha vẹ jẹ ta kpahe ebẹbẹ nọ wha rẹriẹ ovao ku, enọ wha jọ mae gwọlọ obufihọ Ọghẹnẹ. Rekọ muẹrohọ:  Whọ rehọ oyena wọhọ uvẹ nọ whọ rẹ rọ riobọhọ ethobọ ọrivẹ-orọo ra ha. Ukpoye, nọ wha te lẹ kugbe, fodẹ eware nọ o gwọlọ nọ whai imava wha rẹ kpọhọ kugbe. Evaọ okiokiọ riẹ, wha daoma ruiruo kpahe eware nọ wha lẹ kpahe na.

USE-ABỌ AVIVẸ: Ma wo ẹgba hayo onaa ovona ha. Ọzae jọ nọ a re se Tony ọ ta nọ: “Me wo ehoo gaga kẹ obe-use.” Natalie aye riẹ ọ ta nọ: “Obe-use o rẹ were omẹ gaga, yọ o rẹ were omẹ re mẹ ta kpahe eware nọ me wuhrẹ no isase mẹ ze. Ẹsejọ o rẹ jọ omẹ oma inọ ozọ o rẹ dina mu Tony ọzae mẹ inọ ọ riẹ te omẹ hẹ nọ ma tẹ be ta ẹme kpahe eware nọ ma wuhrẹ no Ebaibol ze.”

Oware nọ o rẹ sai fi obọ họ: Wha tha ohwohwo uke, orọnikọ wha re gu ohwohwo ẹdhọ hayo gwọlọ ọnọ ọ mae riẹ hẹ. Jiri ọrivẹ-orọo ra kẹ ẹgba gbe onaa riẹ re o kẹe ajọwha. Tony ọ ta nọ: “Ẹsejọ ọwhọ nọ aye mẹ ọ rẹ rọ ta ẹme kpahe iwuhrẹ Ebaibol o rẹ gahrọ kẹ omẹ, fikiere evaọ okenọ u kpemu, o jẹ hai fou omẹ ehoo re me lele iei ta ẹme kpahe Ebaibol na. Rekọ Natalie aye mẹ ọ rẹ kẹ omẹ ajọwha. Enẹna ma be hae ta ẹme kugbe kpahe Ebaibol na ẹsikpobi, yọ mẹ ruẹ no inọ u du gwọlọ nọ mẹ rẹ dhozọ vievie he. Ẹmeọta kugbe aye mẹ kpahe Ebaibol o be were omẹ oma enẹna. Onana u fi obọ họ kẹ omai wo omosasọ gbe udhedhẹ no wọhọ imava-orọo.”

Ahwo buobu nọ a rọo no a ruẹ no inọ eware e rẹ riẹ nya evaọ uwou-orọo nọ ọzae avọ aye riẹ a tẹ be hae rọ oke jọ ru uwuhrẹ Ebaibol kugbe k’oka k’oka. Rekọ muẹrohọ: Nọ whọ tẹ be ta kpahe ohrẹ Ebaibol jọ, ta epanọ whẹ omara whọ sai ro fi ei họ iruo, orọnọ ọrivẹ-orọo ra whọ rẹ rehọ iẹe rri hi. (Ahwo Galesha 6:4) Wha rọ oke ofa ta kpahe ẹbẹbẹ orọo rai nọ whai imava wha jọ wo avro, orọnọ evaọ etoke uwuhrẹ na ha. Fikieme?

Roro kpahe onana: Nọ whẹ avọ ahwo uviuwou ra wha tẹ be re emu, kọ oke yena whọ rẹ rọ rehọ ame nyẹ omola nọ u wo ori? Vievie. Oyena u re ru emu na no ahwo oma. Jesu o dhesẹ ewuhrẹ kpahe Ọghẹnẹ gbe eruo oreva Riẹ wọhọ emuọriọ. (Matiu 4:4; Jọn 4:34) Whọ tẹ be hae rọ eware nọ e rẹ kẹ ohwo edada iroro lahwe oke kpobi nọ wha tọlọ Ebaibol bi se, o rẹ sai ru nọ who re ro kpe isiuru nọ ọrivẹ-orọo ra o wo kẹ ẹmeọta kpahe Ebaibol. Uzẹme, o gwọlọ nọ wha rẹ ta ẹme kpahe ebẹbẹ rai. Rekọ wha rehọ oke nọ u fo kẹ oyena ta kpahe ae.—Itẹ 10:19; 15:23.

DAO ONANA: Kere iruemu ezi ivẹ hayo esa jọ nọ ọrivẹ-orọo ra o wo nọ e were owhẹ gaga fihotọ. Oke ofa nọ wha te ta ẹme te ẹme nọ o kpomahọ iruemu itieye na evaọ uwuhrẹ Ebaibol rai, vuẹ ọrivẹ-orọo ra epanọ iruemu ezi yena nọ o wo na e were owhẹ te.

Oware nọ Whọ Kọ Oye Who re Vu

Wha tẹ be bọ edikihẹ abọ-ẹzi rai ga wọhọ imava-orọo, irere gbe udhedhẹ rai e te hai vihọ. Ẹhẹ, Ebaibol ọ ta nọ “koware koware nọ ohwo ọ kọ e, oye o re vuẹ.”—Ahwo Galesha 6:7.

Frederick gbe Leanne, enọ ma wariẹ eme rai evaọ obọ emuhọ uzoẹme nana a ruẹ uzẹme ehri-uzi Ebaibol yena. A rrọ orọo te ikpe 45 no yọ a rọ ẹro ruẹ no inọ omodawọ ẹsikpobi o rẹ kẹ erere. Ọzae na, Frederick ọ ta nọ: “Mẹ jẹ hae fuọ aye mẹ inọ ọye ọ wha riẹ ze nọ ma gbẹ jẹ sae ta ẹme kugbe he. Rekọ me te ti vuhumu inọ o gwọlọ nọ mẹ rẹ dawo oma evaọ abọ nana.” Aye na Leanne ọ ta nọ: “Ugogo oware nọ u fi obọ họ kẹ omai evaọ etoke ebẹbẹ na họ uyoyou nọ mai imava ma wo kẹ Jihova Ọghẹnẹ. Anwọ ikpe buobu ze na, ma be hai ru uwuhrẹ kugbe jẹ lẹ kugbe. Nọ mẹ ruẹ epanọ ọzae mẹ Frederick ọ be daoma te dhesẹ ekwakwa-aghae Ileleikristi, u ru rie lọhọ kẹ omẹ nọ uyoyou nọ me wo kẹe o be rọ ga.”

[Oruvẹ-obotọ]

NỌ OMARA NỌ . . .

▪ Oke vẹ kẹle ma lẹ kugbe wọhọ imava-orọo?

▪ Eme mẹ rẹ sai ru rọ ta udu họ ọrivẹ-orọo mẹ awọ wo ajọwha nọ o re ro lele omẹ ta ẹme kpahe Ebaibol na?