Si Kẹle Ọghẹnẹ

“A Gbẹ te Kareghẹhọ Eware Anwae He”

EKAREGHẸHỌ o rẹ sae jọ oware oghale. O rẹ sae kẹ ohwo evawere nọ ọ tẹ kareghẹhọ etoke jọ nọ o vrẹ, nọ ọye avọ ahwo nọ o you a ro ru oware jọ kugbe. Rekọ evaọ ẹsejọ, ekareghẹhọ jọ e rẹ sae wha edada ze. Kọ whọ be hae kareghẹhọ eware iyoma nọ e via kẹ owhẹ vrẹ no nọ e be hwa edada se owhẹ? O tẹ rrọ ere, ẹsejọhọ o be hae lẹliẹ owhẹ nọ inọ, ‘Kọ eware iyoma nana nọ e via kẹ omẹ vrẹ no na i ti no omẹ iroro ẹdẹjọ?’ Ma rẹ jọ eme nọ Aizaya ọruẹaro na o kere fihotọ ruẹ uyo nọ o rẹ sasa omai oma.—Se Aizaya 65:17.

Jihova ọ ya eyaa inọ o ti si eware nọ e be wha edada kpobi ze n’otọ. Ẹvẹ o ti ro ru ei? O ti ru onana ẹkwoma uyero akpọ omuomu nana nọ o ti si no, ọ vẹ rọ onọ o mai woma ro nwene iei. Jihova ọ ya eyaa na, onọ Aizaya o kere fihotọ inọ: “Mẹ [be] ma idhiwu ekpokpọ gbe akpọ ọkpokpọ.” Ma te wo otoriẹ eyaa nana, o rẹ lẹliẹ udu mai vọ avọ oghọghọ.

Eme họ idhiwu ekpokpọ na? Ma rẹ sae jọ Ebaibol na ruẹ eware ivẹ jọ nọ i re fi obọ họ kẹ omai wo otoriẹ onana. Orọ ọsosuọ, u te no Aizaya no, imava efa jọ evaọ usu ahwo nọ i kere Ebaibol na a ta kpahe idhiwu ekpokpọ re, yọ eme nọ a ta i dhesẹ obọdẹ inwene nọ Ọghẹnẹ o ti ru fihọ otọakpọ na. (2 Pita 3:13; Eviavia 21:1-4) Orọ avivẹ, nọ a tẹ jọ Ebaibol na fodẹ “idhiwu,” o rẹ sai dhesẹ isuẹsu, hayo egọmeti. (Aizaya 14:4, 12; Daniẹl 4:25, 26) Fikiere, idhiwu ekpokpọ na yọ egọmeti ọkpokpọ, onọ u ti zihe otọakpọ na ruọ oria uwoma. Esuo ọvuọvo ọ te sai ru onana, koyehọ Uvie Ọghẹnẹ, egọmeti obọ odhiwu nọ Jesu Kristi o wuhrẹ omai inọ ma lẹ kẹ na. Uvie yena u ti ru nọ a te rọ jọ otọakpọ na soso ru oreva Ọghẹnẹ.—Matiu 6:9, 10.

Eme họ akpọ ọkpokpọ na? Muẹrohọ eware ivẹ jọ evaọ Ebaibol na nọ i fi obọ họ kẹ omai wo otoriẹ ẹme nana gbagba. Orọ ọsosuọ, nọ Ebaibol na ọ tẹ fodẹ “akpọ,” evaọ ẹsejọ o rẹ sai dhesẹ ahwo nọ a rrọ akpọ na orọnikọ otọakpọ na ha. (Olezi 96:1) Orọ avivẹ, a jọ Ebaibol na ruẹaro inọ okenọ Uvie Ọghẹnẹ u te muhọ esuo no evaọ otọakpọ, ahwo nọ e te jọ akpọ na soso a ti wuhrẹ ẹrẹreokie. (Aizaya 26:9) Fikiere, akpọ ọkpokpọ na u dhesẹ ahwo nọ e te romakpotọ kẹ esuo Ọghẹnẹ jẹ rria lele izi ikiẹrẹe riẹ.

Kọ whọ gbẹ ruẹ epanọ Jihova o ti ro voro ekareghẹhọ eware nọ e be wha edada s’omai kpobi n’otọ? Kẹlena, Jihova o ti ru eyaa riẹ gba orọ idhiwu ekpokpọ gbe akpọ ọkpokpọ, ọ vẹ rọ ere zihe akpọ na ruọ akpọ udhedhẹ. * Evaọ akpọ ọkpokpọ yena, eware iyoma nọ e rẹ wha edada ugboma gbe erọ iroro ze e gbẹ te jariẹ hẹ. Ahwo nọ a te jọ akpọ yena a ti wo omaweromẹ uzuazọ vọvọ, yọ eware nọ e rẹ wha omaweromẹ ze ọvo a te kareghẹhọ evaọ ẹdẹ kpobi.

Kọ eme ọ te via kẹ eware nọ e be kẹ omai edada iroro evaọ obọnana? Eyaa Jihova nọ Aizaya o kere fihotọ na e ta haro inọ: “A gbẹ te kareghẹhọ eware anwae he hayo a gbe ti roro ai hi.” Edada kpobi nọ ma ruẹ uye rai evaọ akpọ omuomu nana e te rọ ẹmẹrera voro no iroro mai no. Kọ irẹro yena i si owhẹ urru? Otẹrọnọ i si owhẹ urru, kọ whọ gbẹ daoma gwọlọ epanọ whọ sai ro si kẹle Ọghẹnẹ nọ ọ ya eyaa yena nọ i ti rugba kẹle na?

[Oruvẹ-obotọ]

[Ẹme nọ a fi ẹgba họ nọ ọ rrọ ẹwẹ-obe avọ 29]

Jihova ọ ya eyaa inọ o ti si eware nọ e be wha edada kpobi ze n’otọ