Wuhrẹ No Ẹme Ọghẹnẹ Ze

Fikieme Ọghẹnẹ Ọ rọ Salọ Ahwo Jọ Kẹ Omariẹ?

Uzoẹme nana u dhunu te enọ jọ nọ o rẹ sae jọnọ whọ nọ no ẹdẹjọ, u te je dhesẹ oria nọ whọ rẹ sae jọ ruẹ iyo na evaọ Ebaibol ra. O te were Isẹri Jihova re a lele owhẹ ta ẹme kpahe iyo na.

1. Fikieme Ọghẹnẹ ọ rọ salọ emọ Izrẹl kẹ omariẹ?

Ọghẹnẹ ọ salọ uyẹ Abraham, o te ru ei fihọ orẹwho, jẹ kẹ orẹwho na izi nọ a re koko. O se orẹwho na Izrẹl, ọ tẹ kẹ orẹwho na owha-iruo nọ ọ rẹ rọ sẹro egagọ uzẹme gbe Ikereakere Efuafo na. (Olezi 147:19, 20) Onana o wha eghale se erẹwho akpọ na kpobi no.—Se Emuhọ 22:18.

Ọghẹnẹ ọ salọ emọ Izrẹl re a jọ isẹri riẹ. Okenọ a nya lele izi Ọghẹnẹ, a je wo eghale. (Iziewariẹ 4:6) Nọ ma tẹ romatotọ kiẹ ikuigbe emọ Izrẹl riwi, u re fi obọ họ kẹ omai riẹ eware buobu kpahe Ọghẹnẹ uzẹme na.—Se Aizaya 43:10, 12.

2. Fikieme ma ro wo utu Ileleikristi uzẹme evaọ oke nana?

Nọ oke o be nyaharo na, Jihova ọ tẹ siọ orẹwho Izrẹl jẹ rọ ukoko Ileleikristi na ro nwene iei. (Matiu 21:43; 23:37, 38) Taure orẹwho Izrẹl u te ti ku aruoriwo Ọghẹnẹ fiẹ, a jọ isẹri riẹ. Fikiere, ahwo kpobi nọ a gwọlọ jọ Ileleikristi uzẹme nẹnẹ a rẹ jọ isẹri riẹ re.—Se Iruẹru Ikọ Na 15:14, 17.

Jesu o wuhrẹ ilele riẹ re a se isẹri kpahe Jihova je ru ilele evaọ erẹwho kpobi. (Matiu 10:7, 11; 24:14; 28:19, 20) Iruo nana i bi te ekuhọ no. Nẹnẹ, Jihova o koko ima ahwo buobu họ rono erẹwho kpobi ze nọ i bi kuomagbe gọe evaọ egagọ uzẹme. (Eviavia 7:9, 10) Ileleikristi uzẹme a bi kuomagbe re a sae tuduhọ ohwohwo awọ je fi obọ họ kẹ ohwohwo. Wariẹ akpọ na họ, a bi ru iwuhrẹ rai no Ebaibol ze k’oka k’oka, yọ ọruẹrẹfihotọ ọvona a be jọ ikoko rai kpobi nya lele.—Se Ahwo Hibru 10:24, 25.

  3. Ẹvẹ ukoko Isẹri Jihova u ro muhọ evaọ oke mai na?

Ukoko Isẹri Jihova oke mai na u muhọ no anwọ ukpe 1870 ze. Ukpe yena utu osese orọ emọ-iwuhrẹ Ebaibol a ro mu uzẹme na họ ẹkiẹvia. A ruẹ vuhumu rono Ebaibol na ze inọ Jesu ọ kẹ Ileleikristi owha-iruo nọ a rẹ rọ ta usiuwoma na. Fikiere, a te muọ usiuwoma na họ ewhowho wariẹ akpọ na họ. Evaọ ukpe 1931, a te wo odẹ na, Isẹri Jihova.—Se Iruẹru Ikọ Na 1:8; 2:1, 4; 5:42.

4. Oghẹrẹ vẹ a be rọ rẹrote ukoko Isẹri Jihova nẹnẹ?

Evaọ ikpe-udhusoi ọsosuọ, ikoko Ileleikristi nọ e jọ ewho sa-sa e jẹ hai wo erere no ọkpọvio ugboma esuo oke yena ze, yọ ugboma esuo yena u vuhumu inọ Jesu họ ọnọ o wuzou ukoko Ileleikristi na. (Iruẹru Ikọ Na 16:4, 5) Epọvo na nẹnẹ re, Isẹri Jihova a rehọ Jesu inọ ọye họ Osu rai. (Matiu 23:9, 10) Ofariẹ, a bi wo erere no ekpakpọ ekpako nọ i wo onaa ziezi nọ e rrọ Ugboma Esuo oke nana ze, yọ Ugboma Esuo na o be kẹ ikoko Isẹri Jihova nọ i bu vi idu udhusoi (100,000) uduotahawọ gbe ekpọvio no Ebaibol na ze. Evaọ ukoko Isẹri Jihova kpobi, a rehọ ezae nọ e nyate itee Ikereakere na ro mu ekpako ukoko hayo esẹro. Ezae nana e be rọ uyoyou sẹro uthuru Ọghẹnẹ.—Se 1 Pita 5:2, 3.

A wuhrẹ Isẹri Jihova re a whowho emamọ usi na je ru ilele. Re a sai fi obọ họ kẹ ahwo evaọ oria kpobi, a be fa ebe evaọ evẹrẹ nọ i bu vi udhusoi akuasoi (500), jẹ be rehọ ebe na kẹ ahwo. A be ta usiuwoma no uwou ruọ uwou wọhọ epanọ ikọ Jesu a je ru. (Iruẹru Ikọ Na 20:20) A re wuhrẹ obe kugbe ohwo kpobi nọ ọ ginẹ gwọlọ riẹ uzẹme Ebaibol na ababọ ugho nọ a re mi ei. Fikinọ Isẹri Jihova a tẹrovi eruo oreva Jihova je bi fi obọ họ kẹ amọfa, a be wereva ẹsikpobi.—Se Olezi 33:12; Iruẹru Ikọ Na 20:35.

Rọkẹ evuẹ efa, rri uzou avọ 19 orọ obe nana, Eme Ebaibol na O Gine Wuhrẹ? onọ Isẹri Jihova a kere.