Wuhrẹ No Ẹme Ọghẹnẹ Ze

Kọ Ebaibol na O Ta Kpahe Eware nọ E te Jọ Obaro Via?

Uzoẹme nana u dhunu te enọ jọ nọ o rẹ sae jọnọ whọ nọ no ẹdẹjọ, u te je dhesẹ oria nọ whọ rẹ sae jọ ruẹ iyo na evaọ Ebaibol ra. O te were Isẹri Jihova re a lele owhẹ ta ẹme kpahe iyo na.

1. Kọ eruẹaruẹ Ebaibol e fodẹ ugogo eware jọ nọ e te via?

Ọghẹnẹ Erumeru na ọvo ọ rẹ sae riẹ eware nọ e te jọ obaro via. (Emọs 3:7) Wọhọ oriruo, no anwọ emuhọ akpọ na ze ọ rọ ta kpahe omarọvia ohwo jọ nọ a re se Mesaya hayo Kristi. Eruẹaruẹ na e ta nọ Mesaya na o ti no uyẹ Abraham, ọzae nọ o wo ẹrọwọ gaga na ze. A ruẹaro inọ Mesaya na ọ te jọ osu nọ o ti fi obọ họ kẹ ahwo-akpọ nọ i koko izi Ọghẹnẹ wariẹ wo uzuazọ ogbagba nọ ẹyao ọ te jọ họ. (Emuhọ 22:18; Aizaya 53:4, 5) Eruẹaruẹ na i dhesẹ nọ ohwo nana nọ a ya eyaa riẹ na o ti no Bẹtlẹhẹm ze.—Se Maeka 5:2.

Whaọ Jesu họ Mesaya na. Bu vi ikpe udhusoi akuahrẹ taure a te ti yẹe, Ebaibol na ọ rọ ruẹaro kpahotọ inọ ọmọtẹ nọ ọ riẹ ọzae he o re ti yẹ Mesaya na, yọ ahwo a ti rri rie vo. O re ti whu re ibuobu i wo erọvrẹ izieraha, gbe inọ a ti kiei kugbe edafe. (Aizaya 7:14; 53:3, 9, 12) Ebaibol na ọ ta kpahotọ inọ Jesu ọ te rọ eketekete dhẹruọ Jerusalẹm yọ a te rọ ewẹe isiliva ọgba vivie. Eruẹaruẹ nana i rugba tọkọ t’oni nọ o vrẹ ikpe udhusoi akuasoi no.—Se Zekaraya 9:9; 11:12.

2. Kọ Ọghẹnẹ ọ rẹ fodẹ oke nọ eware i re ro rugba?

Bu vi ikpe udhusoi akuasoi taure Mesaya na ọ tẹ te romavia yọ Ebaibol na ọ ruẹaro ugogo ukpe na fihotọ no. Eruẹaruẹ na e ta nọ omarọvia Mesaya na o te rehọ ekpoka sa-sa, yọ ẹdẹ ọvo o dikihẹ kẹ ukpe ọvo, koyehọ ẹkpoka ọvo o theri te ikpe ihrẹ. Eruẹaruẹ na e tẹ jẹ ta nọ ekpoka ihrẹ (7) gbe ekpoka udhosa gbivẹ (62) e te jariẹ, a je ku ai kugbe e vẹ jọ ekpoka udhosa gbizii (69) erọ ikpe. Fikiere, ekpoka udhosa gbizii ẹko ihrẹ rai i bu te ikpe udhusoi akuane gbe udhone gbe esa (483). Kọ okevẹ ekele na o ro muhọ? Wọhọ epanọ Ebaibol ọ ta, oke nana u muhọ nọ Atagzazis, ovie Pasia, ọ kẹ Nehemaya udu re ọ wariẹ bọ Jerusalẹm. Ikuigbe ẹwho Pasia nọ a kere fihotọ i dhesẹ nọ a kẹ Nehemaya udu ebabọ na evaọ ukpe ọ 455 B.C.E. (Nehemaya 2:1-5) Nọ who te kele no ukpe 455 B.C.E. rite ukpe 29 C.E. nọ Jesu ọ rọ họ-ame je zihe ruọ Mesaya na, o rehọ ikpe 483.—Se Daniẹl 9:25.

  3. Kọ eruẹaruẹ Ebaibol i bi rugba enẹna?

Jesu ọ ruẹaro eware igbunu jọ nọ e te via evaọ oke mai na. Ọ jọ eruẹaruẹ na ta inọ a te jọ akpọ na soso ta usiuwoma Uvie Ọghẹnẹ, nọ o te wha omosasọ se enọ i bi koko izi Ọghẹnẹ. Uvie na o te raha uyero akpọ omuomu nana nọ ma be rria na.—Se Matiu 24:14, 21, 22.

Eruẹaruẹ Ebaibol i dhesẹ uzedhe eware sa-sa nọ e te via nọ i ti dhesẹ nọ urere akpọ na o kẹlino. Ukpenọ ẹnyaharo eware-ikuo o wha ewoma ze, Ebaibol ọ ta nọ ahwo a te rehọ ae raha akpọ na. Ebẹbẹ nọ ẹmo, ohọo, etọ nọ i re nuhu, gbe eyao e te wha ze, i re ti vihọ. (Luk 21:11; Eviavia 11:18) Uruemu ahwo u ti dhe eyeyoma. Evaọ udevie ebẹbẹ nana kpobi, ilele Jesu a te ta usiuwoma Uvie Ọghẹnẹ evaọ erẹwho kpobi.—Se Matiu 24:3, 7, 8; 2 Timoti 3:1-5.

4. Ẹvẹ uyero akpọ na o te jọ evaọ obaro?

Ọghẹnẹ Erumeru na ọ ruẹrẹ eware iwoma họ kẹ ahwo akpọ nọ i bi koko izi riẹ. Mesaya na, Jesu Kristi, avọ ahwo 144,000 nọ i ti leliei su, esuo rai o ti te obọ otọakpọ obonẹ. A ti su te ikpe odu ọvo. A te kpare ahwo nọ a whu no ze, jẹ kẹ ae uvẹ rria uzuazọ, kẹsena evaọ ekuhọ odu-ikpe na, a ve ti gu ai ẹdhọ sọ a te kẹ ewo uzuazọ ebẹdẹ bẹdẹ. Ofariẹ, uvumọ ohwo ọ te mọ evaọ otọ Uvie yena ha, keme a ti si uwhu gbe ẹyao no.—Se Eviavia 20:6, 12; 21:4, 5.

Rọkẹ evuẹ efa, rri ẹwẹ-obe avọ 23 rite 25 gbe 197 rite 201 ọrọ obe na Eme Ebaibol na O Gine Wuhrẹ? nọ uwoho riẹ o rrọ etenẹ na.