Kọ Iyo na E Ginẹ Roja?

“Wha rẹ te riẹ uzẹme na, uzẹme na u re ti ru owhai emuyẹ.”—JỌN 8:32.

MA RẸ jọ Ebaibol na ruẹ uzẹme nọ o rẹ sai si omai no igbo eviẹhọ hayo iwuhrẹ erue nọ a bi wuhrẹ kpahe Jesu. Kọ oware kpobi nọ ma rọwo kpahe Jesu u muẹme? Ẹhẹ, u muẹme. U muẹme kẹ Jihova. U muẹme kẹ Jesu. Yọ u re muẹme kẹ omai re.

● Fikieme u ro muẹme kẹ Jihova? Fikinọ “Ọghẹnẹ họ uyoyou.” (1 Jọn 4:8) Jihova ọ gwọlọ nọ ma wereva bẹdẹ bẹdẹ. Jesu ọ ta nọ: “Ọghẹnẹ o you [ahwo-akpọ] na hrọ, ọ jẹ rehọ Ọmọvo riẹ kẹ, re k’ohwo k’ohwo nọ ọ rọwo riẹ o . . . wo uzuazọ ebẹdẹ bẹdẹ.” (Jọn 3:16) Ọghẹnẹ o vi Ọmọ riẹ ze re ọ dẹ omai no igbo je rovie uvẹ uzuazọ ebẹdẹ bẹdẹ họ kẹ omai evaọ Aparadase otọakpọ, wọhọ epanọ ọ jiroro riẹ evaọ oke ọsosuọ nọ ọ ma akpọ na. (Emuhọ 1:28) O rrọ isiuru Ọghẹnẹ re ọ rehọ okẹ uzuazọ ebẹdẹ bẹdẹ kẹ ahwo nọ a gwọlọ riẹ uzẹme na kpahe Ọmọ riẹ, jẹ be daoma ru oreva Ọghẹnẹ.—Ahwo Rom 6:23.

● Fikieme u ro muẹme kẹ Jesu? Jesu omariẹ o you ahwo-akpọ gaga. O dhesẹ uyoyou nọ o rro thesiwa ẹkwoma unevaze nọ o ro whu kẹ omai. (Jọn 15:13) Ọ riẹ nọ ẹkwoma uwhu riẹ ọvo ma sai ro wo esiwo. (Jọn 14:6) Agbẹta nọ Jesu ọ rọ gwọlọ nọ ahwo buobu a wo erere no idhe ẹtanigbo riẹ ze na. Oye jabọ nọ o ro vi ilele riẹ inọ a nyai wuhrẹ ahwo evaọ akpọ na soso kpahe oreva Ọghẹnẹ gbe ẹjiroro riẹ.—Matiu 24:14; 28:19, 20.

● Fikieme u re ro muẹme kẹ omai? Rehọ omoke jọ roro kpahe eware jọ nọ i wuzou kẹ owhẹ gaga, eware wọhọ uviuwou ra gbe epanọ whọ sai ro wo omokpokpọ. Kọ omokpokpọ gbe uzuazọ evawere nọ whẹ avọ uviuwou ra wha re yeri i bi si owhẹ urru? Jihova ọ rọ ẹkwoma Jesu ru ei lọhọ no re whẹ avọ ahwo nọ who you wha wo omokpokpọ ogbagba gbe uzuazọ nọ u wo oba ha evaọ akpọ ọkpokpọ nọ edada gbe uye-oruẹ e te jọ họ. (Olezi 37:11, 29; Eviavia 21:3, 4) Kọ irẹro yena i si owhẹ urru? Otẹrọnọ i si owhẹ urru, oware jọ o riẹ nọ o gwọlọ nọ who re ru.

Wariẹ rri eme Ebaibol nọ a kere fihọ otọ uzoẹme nana: “Wha rẹ te riẹ uzẹme na, uzẹme na u re ti ru owhai emuyẹ.” Uzẹme na kpahe Jesu avọ eware nọ o rugba evaọ ẹjiroro Ọghẹnẹ o rẹ sai si omai no igbo uzioraha gbe uwhu. Rekọ re whọ sai no igbo nana, o gwọlọ nọ whọ rẹ “riẹ uzẹme na.” Kọ whọ gbẹ gwọlọ epanọ whọ sae rọ riẹ uzẹme nana gbe epanọ whẹ avọ ahwo nọ who you wha sai ro wo erere noi ze? O te were Isẹri Jihova re a fi obọ họ kẹ owhẹ ru ere.